Top-5 jarkich momantaŭ vybaraŭ-2012: vyśpiatak ad Fiaduty, pryznańni Abramavaj, źbićcio žurnalistaŭ

Sioletnija vybary ŭ parłamient možna nazvać adnymi z samych nievyraznych i niecikavych. Ci nie tamu adnymi z samych zapaminalnych momantaŭ kampanii stali skandały. Prapanavanyja redakcyjaj padziei padadzienyja ŭ kalandarnaj paśladoŭnaści.

1. Vyśpiatak ad Fiaduty

Dla apazicyi kampanija pačałasia sa skandału. 31 studzienia pradstaŭniki demsiłaŭ sabralisia dla padpisańnia dekłaracyi «Ab hramadskaj dyskusii pra mety i formy ŭdziełu biełaruskaj apazicyi ŭ vybarach 2012 hoda». Prapanoŭvaŭsia prymalny dla ŭsich varyjant-minimum: kali ŭłady nie vyzvalajuć palitviaźniaŭ, kandydaty ad apazicyi źnimajucca z vybaraŭ. Adnak padpisańnie damovy sarvaŭ Vital Rymašeŭski z Chryścijanskaj demakratyi. Heta tak razzłavała Alaksandra Fiadutu z «Havary praŭdu», što jon daŭ Rymašeŭskamu vyśpiatka.

U apošnija dni vybaraŭ, kali stała jasna, što praces idzie pa adpracavanym hadami scenary (adfiltroŭvańnie patencyjna niebiaśpiečnych kandydataŭ, daterminovaje hałasavańnie), žurnalisty pačali žartavać što vyśpiatak Fiaduty moža stać samym zapaminalnym momantam kampanii.

2. Pikiety na Kamaroŭcy i boršč

Pavialičyć

Treba pryznać, što i ŭłady, i apazicyja ŭsio ž prykłali namahańni, kab vyjści ŭ narod i nahadać pra kampaniju z dapamohaj pikietaŭ. Časam jany navat sustrakalisia ŭ adnym miescy. Kropkaj takoha niezvyčajnaha sudakranańnia stała minskaja Kamaroŭka, dzie možna było ci nie adnačasova sustreć ahitataraŭ za bajkot ad apazicyi i pradstaŭnikoŭ praŭładnych BRSM i «Biełaj Rusi».

Adnym ź simvałaŭ kampanii staŭ boršč. Simvałam biezdapamožnaści i biessensoŭnaści. Žurnalisty vyviedvali jaho recept u biazźmiennaj staršyni CVK Lidzii Jarmošynaj, kandydaty ŭ deputaty raili varyć boršč svaim kankurentam, aktyvisty demanstravali jaho na pikietach. Niahledziačy na lutyja pakarańni za heta.

3. Pryznańni Abramavaj

Pavialičyć

Byłaja deputatka parłamienta Volha Abramava vyrašyła zahavaryć. Jana raskazała žurnalistam pra falsifikacyju vynikaŭ vybaraŭ pa jaje minskaj akruzie № 108 na vybarach 2008 hoda. Pa jaje słovach, u tuju kampaniju joj adkrytym tekstam prapanavali admovicca ad udziełu ŭ abmien na pasadu. Nibyta takuju prapanovu ahučyła tahačasnaja kiraŭnica administracyi Łukašenki Natalla Piatkievič. Abramava admoviłasia. I tady, pa jaje słovach, na jaje pačali cisnuć. A pa vynikach vybaraŭ pieramoh małaviadomy kandydat.

4. «Pravierka dakumientaŭ»

Pavialičyć

18 vieraśnia ŭ pieršy dzień daterminovaha hałasavańnia siabry moładzievaha kryła kampanii «Havary praŭdu!» — «Zmena» vyrašyli razdać boršč kala ŭniviersama «Frunzienski». Na toj momant aktyvisty apazicyi paśpieli skarystacca z prava na praviadzieńnie pikietaŭ, kab zładzić kolki fłešmobaŭ. Što, napeŭna, pačało kahości mocna razdražniać. Kulinarna-palityčny pikiet razahnali brutalna: milicyjanty ŭ cyvilnym z prymianieńniem hrubaj siły pachapali i aktyvistaŭ, i žurnalistaŭ, u tym liku zamiežnych. U časie zatrymańnia fotakarespandentu Associated Press Siarhieju Hrycu raźbili kułakom tvar. Potym milicyja zajavić, što nikoha nie źbivali, a žurnalistaŭ zatrymali dla pravierki dakumientaŭ.

5. Kryžanoŭski i kaŭbasa

Z teledebataŭ zapomniłasia niekalki kandydataŭ. Rasiejskamoŭny kandydat ad Partyi BNF Alaksandr Harasiuk, jaki pracuje rabočym na miasakambinacie, prynios u telestudyju kaŭbasu. «Ja prosty rabočy. Ja varu kaŭbasu i ja prynios hetu kaŭbasu», — hetyja słovy adnaho z kandydataŭ Łuninieckaj akruhi №3 na karotki čas stali chitom u bajnecie.

Niekatoryja z kandydataŭ pieratvaryli svaje vystupy ŭ fars, jak kandydat ad ŁDP humaryst Jaŭhien Kryžanoŭski. «U parłamiencie raspusta, pjanstva, łajdaki! Ja chaču brać u hetym udzieł!» — hrymieŭ jon na sustrečy z vybarščykami. Štopraŭda, heta byŭ aniekdot pra parłamient u vykanańni humarysta-kandydata. Aniekdot pra Łukašenku jon raskazać pabajaŭsia.

• 0
• 0
• 0
• 0
• 0
• 0
• 0
• 0