Minabarony papiaredziła kiraŭnika misii PA ABSIE: Nie ŭvodźcie ŭ zman

Ministerstva abarony Biełarusi zaklikała kiraŭnika misii karotkaterminovych naziralnikaŭ Parłamienckaj asamblei ABSIE Matea Miekačy «być bolš uvažlivym pry acency vybarčaj kampanii ŭ Biełarusi i nie ŭvodzić u zman mižnarodnuju hramadskaść».

Pryčynaj dla takoj zajavy, jak paviedamili ŭ pres-słužbie Minabarony, źjavilisia słovy jeŭrapiejskaha palityka na bryfinhu pra toje, što ŭ naziralnikaŭ ad ABSIE nie było mahčymaści ažyćciaŭlać nazirańnie za hałasavańniem u voinskich čaściach, tamu što takoje nie praduhledžana biełaruskim zakanadaŭstvam.

«Na žal, sp. Miekačy prajaviŭ jaŭnuju niekampietentnaść u biełaruskim zakanadaŭstvie, u jakim niama navat namioku na zabaronu ažyćciaŭlać nazirańnie za hałasavańniem u voinskich čaściach», — havorycca ŭ paviedamleńni Minabarony.

Adnačasova na sajcie abaronnaha viedamstva raźmieščana infarmacyja ab prysutnaści naziralnikaŭ na vybarčych učastkach, dzie hałasavali vajskoŭcy. Zhodna z hetymi źviestkami 7 vieraśnia na ŭčastku № 8 u 6-j asobnaj miechanizavanaj bryhadzie ŭ Hrodnie ŭ jakaści naziralnika byŭ pradstaŭnik ad ABSIE z Małdovy, 22 vieraśnia tam ža — pradstaŭniki ad ABSIE sa Słavienii i Hiermanii.

23 vieraśnia na vybarčym učastku № 672 u Vajennaj akademii znachodzilisia naziralniki ad SND z Kazachstana i ABSIE z Estonii, na ŭčastku № 23 u 11-j asobnaj miechbryhadzie ŭ Słonimie (Hrodzienskaja vobłaść) — ad ABSIE z Kazachstana i Hiermanii, na ŭčastku № 42 u 86-j bryhadzie suviazi ŭ Minsku — ad ABSIE z Rasii i Tadžykistana, na ŭčastku № 77 u 361-m bataljonie achovy i absłuhoŭvańnia ŭ Minsku — ad Čyrvonaha Kryža ź Biełarusi, a taksama ad BDIPČ ABSIE sa Šviecyi i Finlandyi, na ŭčastku № 668 u 120-j asobnaj miechbryhadzie ŭ Minsku — ad SND, na ŭčastku № 34 u 188-j inžyniernaj bryhadzie ŭ Mahilovie — ad BDIPČ ABSIE z Hruzii i Hiermanii, na ŭčastku № 600 u asobnym bataljonie achovy i absłuhoŭvańnia VPS i vojskaŭ SPA ŭ Minsku — ad BDIPČ ABSIE z Polščy, Litvy i Biełarusi, na ŭčastku № 37 u 2-j inžyniernaj bryhadzie pad Minskam — niezaležny naziralnik ź Vienhryi.

Aprača taho, 23 vieraśnia hrupa zamiežnych karespandentaŭ pracavała na vybarčym učastku № 668 vybarčaj akruhi № 109 u 120-j asobnaj miechanizavanaj bryhadzie z 8.00 da 9.00 (karespandenty ahienctvaŭ Jeŭrapiejskaje Presfota, Frans Pres, Rojtarz Uschodniaja Jeŭropa, Asašyejted Pres).

• 0
• 0
• 0
• 0
• 0
• 0
• 0
• 0