Pad Baranavičami «chutkaja» prajechała mima «viełasipiedysta», što lažaŭ na ŭzbočynie — videa
Miascovaja DAI ŭ čarhovy raz pravieryła kiroŭcaŭ na spahadlivaść.
31 kastryčnika Baranavickaja DAI praviała čarhovy ekśpierymient, piša hazieta «Intex-press». Na adnym z učastkaŭ darohi Baranavičy-Hrodna inśpiektary pakłali maniekiena na viełasipiedzie. Nie zaŭvažyć jaho było niemahčyma: ekśpierymient pravodzili dniom, maniekien lažaŭ na ŭzbočynie.
4 kastryčnika miascovaja DAI ŭžo ładziła padobny ekśpierymient z «piešachodam» na darozie. Vyniki byli niesuciašalny — kala 80% kiroŭcaŭ prajechali mima.
Hetym razam kiroŭcy byli kudy bolš spahadlivy. Niekatoryja navat patelefanavali na «102».
Najbolš urazili inśpiektaraŭ dziejańni miedykaŭ. Pa pałasie, na krai jakoj lažaŭ «viełasipiedyst», prajechała aŭto «chutkaj dapamohi» i navat nie spyniłasia. Heta pry tym, što pobač na darozie nikoha nie było.
«My navat padumać nie mahli, što «chutkaja» moža prajechać mima. Kali b na śpiecaŭtamabili byli ŭklučanyja majački, možna było b padumać, što «chumktaja» śpiašajecca na vyklik. Ale jany nie byli ŭklučanyja! Ad kaho ad kaho, ale ad miedykaŭ my takoha nie čakali», – raskazali supracoŭniki DAI, jakija sačyli za ekśpierymientam.
Kamientary