Jeŭraparłamientaryi prapanoŭvajuć krainam ES zabaranić prodaž infarmacyjnych technałohij represiŭnym režymam

Kamitet Jeŭraparłamienta pa zamiežnych spravach prapanoŭvaje krainam ES uvieści zabaronu na prodaž infarmacyjnych technałohij represiŭnym režymam, jakija mohuć ich vykarystać dla cenzury infarmacyi i prasłuchoŭvańnia apanientaŭ.

Adpaviednaja rezalucyja raspracavana Leanidasam Donskisam, jeŭraparłamientaryjem ź Litvy, paviedamlaje sajt Jeŭraparłamienta.

U śpisie krain, jakim kamitet pa zamiežnych spravach Jeŭraparłamienta nie rekamienduje pradavać infarmacyjnyja technałohii, uvachodzić i Biełaruś.

«Jeŭraparłamientaryi zastajucca nadzvyčaj zaniepakojenymi niedachopam demakratyi, viaršenstva zakona, asnovatvornych svabod i pravoŭ čałavieka ŭ Biełarusi, vykazvajuć hłybokuju zaniepakojenaść aryštam kandydata ŭ łaŭreaty Sacharaŭskaj premii 2012 hoda Alesia Bialackaha ŭ žniŭni 2011 i škadujuć adnosna dziejańniaŭ polskich i litoŭskich čynoŭnikaŭ, jakija paspryjali aryštu Bialackaha, padaŭšy bankaŭskuju infarmacyju», — skazana ŭ rezalucyi.

«Jeŭrapiejskija kampanii, ich daččynyja pradpryjemstvy i partniory pavinny adyhryvać klučavuju rolu ŭ raspracoŭcy i prasoŭvańni sacyjalnych standartaŭ va ŭsim śviecie», — padkreślivajecca ŭ dakumiencie.

Jeŭraparłamientaryjami asudžany toj fakt, što niekatoryja jeŭrapiejskija pradpryjemstvy dajuć «nieabmiežavany dostup aŭtarytarnym režymam» u svaje banki danych pad pryčynaj adpaviednaści miascovamu zakanadaŭstvu — tak było ŭ vypadku z kampanijaj Teliasonera u niekatorych postsavieckich dziaržavach, u tym liku ŭ Biełarusi.

Deputaty Jeŭraparłamienta vitajuć rašeńnie Savieta ES zabaranić ekspart niekatorych infarmacyjnych technałohij u Siryju i Iran i nastojvajuć na tym, kab heta zabarona pasłužyła ŭ nastupnym precedentam dla abmiežavalnych mier suprać inšych represiŭnych režymaŭ.

Zaraz u Brusieli znachodziacca žonki dvuch biełaruskich palitźniavolenych — Maryna Adamovič, žonka eks-kandydata ŭ prezidenty Mikałaja Statkieviča, i Natalla Pinčuk, žonka pravaabaroncy Alesia Bialackaha. 7 listapada jany sustrelisia sa staršynioj Jeŭraparłamienta Marcinam Šulcam, členami kamiteta pa pravach čałavieka JEP i jeŭraparłamientaryjem z Polščy Jacakam Saryušam-Volskim. Na čaćvier zapłanavanyja ich sustrečy z kamisaram ES pa pytańniach pašyreńnia palityki dobrasusiedstva Štefanam Fiule.

• 0
• 0
• 0
• 0
• 0
• 0
• 0
• 0