Eks-kiraŭnika sakrataryjata savieta respubliki nie asudzili

Spravu Hleba Biadryckaha ŭ Minskim haradskim sudzie pačali razhladać jašče 10 vieraśnia. Sud zrabili zakrytym pa inicyjatyvie prakurora. Maŭlaŭ,

u spravie prysutničaje intymnaja infarmacyja, jakaja tyčycca abvinavačanaha.

Advakat i sam Biadrycki nastojvali, kab na pracesie mahli prysutničać usie žadajučyja. Ale sudździa Taćciana Tupik padtrymała prakurora.

Adna ź niepaćvierdžanych viersij aryštu čynoŭnika — raźmierkavańnie premij.

Nibyta načalnik sakrataryjata vypisvaŭ vialikija sumy dla zaachvočvańnia svaich «lubimčykaŭ».

U funkcyi Biadryckaha na vysokaj pasadzie, akramia techničnych (kantrol za vykanańniem abaviazkaŭ struktur sakrataryjata, zaćviardžeńnie hrafikaŭ adpačynkaŭ), uvachodziŭ mienavita kantrol za hrašyma. Jon nie tolki pradstaŭlaŭ materyjały dla premiravańnia, ale moh rasparadžacca majomaściu i finansami sakrataryjata, vyrašaŭ pytańni vydačy inšych hrašovych vypłat supracoŭnikam.

Čynoŭnik byŭ zatrymany 19 kastryčnika 2011.

Jon abvinavačvajecca pa dvuch artykułach Kryminalnaha kodeksa: «Kradziež šlacham złoŭžyvańnia słužbovymi paŭnamoctvami» i «Złoŭžyvańnie ŭładaj albo słužbovymi paŭnamoctvami».

Ananimnaja krynica paviedamiła «NN», što spravu Biadryckaha ŭskładniaje jaho prašeńnie na imia Alaksandra Łukašenki, napisanaje ŭ lipieni. Tym samym jon pryznaŭ siabie vinavatym.

Biadrycki raźličvaŭ na zastupnictva z boku vysokich čynoŭnikaŭ, z kim pracavaŭ, jak adkaz na svaju addanuju pracu. Ale nibyta nichto jaho nie padtrymaŭ.

U dadatak, prašeńnie Łukašenka nie zadavoliŭ. I ciapier eks-čynoŭniku nie z ruki admaŭlać svaju vinu.

Hleb Biadrycki naradziŭsia 27 studzienia 1974 u Navapołacku. U 1996 skončyŭ Biełaruskuju dziaržaŭnuju politechničnuju akademiju pa śpiecyjalnaści «pramysłovaje i hramadzianskaje budaŭnictva», u 2000-m — Akademiju kiravańnia pry prezidencie pa śpiecyjalnaści «suśvietnaja ekanomika i mižnarodnyja ekanamičnyja adnosiny». Pracavaŭ u Ministerstvie architektury i budaŭnictva, pasolstvie Biełarusi ŭ Hiermanii, aparacie Savieta ministraŭ. Pasadu načalnika sakrataryjata savieta respubliki zaniaŭ u vieraśni 2003. Heta značyć, litaralna praz dva miesiacy paśla taho, jak u apazicyju pierajšoŭ tahačasny kiraŭnik vierchniaj pałaty parłamienta, akademik Alaksandr Vajtovič. Musić, tady ŭ peŭnych strukturach zrazumieli, što prahapili Vajtoviča i što kantrol nad pałataj treba «ŭzmacniać».

Hleb Biadrycki nie byŭ publičnaj asobaj. Jaho rola ŭ saviecie respubliki nie praduhledžvała i kantaktaŭ z presaj. Składana nie tolki adšukać źviestki pra jaho, ale i jaho samoha na fotazdymkach navat z aficyjnych mierapryjemstvaŭ. Viadoma, što

jon žanaty, maje dvuch niepaŭnaletnich dziaciej: 11-hadovuju dačku i 4-hadovaha syna.

Za svaju pracu ŭznaharodžany tryma miedalami, niekalkimi hramatami Savieta ministraŭ Biełarusi, maje šerah padziakaŭ.

Miesca Biadryckaha na pasadzie načalnika sakrataryjata savieta respubliki nacyjanalnaha schodu zaniaŭ Siarhiej Biervin.

• 0
• 0
• 0
• 0
• 0
• 0
• 0
• 0