Milinkievič vyrašyŭ hałasavać u Miensku

Kandydat ad abjadnanaj apazycyi Alaksandar Milinkievič prapisany ŭ vioscy Bieršty Ščučynskaha rajonu Haradzienskaj vobłaści, adnak 19 sakavika hałasavać jon budzie ŭ Miensku, paviedamlaje «Radyjo Svaboda». Siońnia spadar Milinkievič razam z žonkaj Inaj Kulej ułučany ŭ śpisy dla hałasavańnia na adnym ź mienskich vybarčych učastkaŭ. Inšyja kandydaty buduć hałasavać pa miescy svajoj prapiski. Pakul nichto ź ich nia vykazaŭ žadańnia hałasavać daterminova.

Pieršapačatkova Alaksandar Milinkievič chacieŭ hałasavać u rodnych Bierštach. Ale zazvyčaj pracedura hałasavańnia kandydataŭ na prezydenta vyklikaje vialikuju cikavaść žurnalistaŭ i hramadzkaści, a Bieršty znachodziacca ŭ pamiežnaj zonie, i heta stvaryła b peŭnyja niazručnaści. Praŭda, jość i inšyja matyvy pieranosu miesca hałasavańnia. Havoryć Alaksandar Milinkievič: «Tak chacieŭ by pajechać u svaju viosku, takaja nastalhija. I chacieŭ na mahiły prodkaŭ schadzić… Ale, vidać, ja paprostu fizyčna nie paśpieju. Akramia taho, bajusia: źjedu ź Miensku, a ludziej u hety dzień buduć zatrymlivać na darohach. Tady ci zdoleju viarnucca?.. Heta było b niesumlenna adnosna tych, kaho ja zaprašaŭ pryjści na płošču».

Siońnia proźviščy Milinkieviča j jahonaj žonki Iny Kulej byli ŭpisany ŭ śpis vybarcaŭ učastku numar 13, pa vulicy Čechava, 8, u pamiaškańni siaredniaj škoły numar 166. Kiraŭnik jurydyčnaj słužby štabu Milinkieviča Ŭładzimier Łabkovič paviedamiŭ, što heta robicca zhodna z Vybarčym kodeksam: «U suviazi z tym, što spadar Milinkievič pražyvaje ŭ horadzie Miensku ŭ časie vybarčaj kampanii razam sa svajoj žonkaj, było pryniata ŭzhodnienaje z CVK rašeńnie dazvolić im hałasavać pa miescy časovaha pražyvańnia. Heta zakonna».

Takim čynam, pa-za Mienskam budzie hałasavać tolki lider ŁDPB Siarhiej Hajdukievič. Jak paviedamiła jahonaja sakratarka, spadar Hajdukievič prahałasuje ŭ Siomkavym Haradku, dzie jon stała žyvie.

Presavaja sakratarka Alaksandra Kazulina Nina Šydłoŭskaja zaznačyła, što spadar Kazulin ź siamjoj i paŭnahadovaj dačkoj budzie hałasavać 19 sakavika pa miescy žycharstva na vulicy Staražoŭskaj u Miensku.

Alaksandar Łukašenka budzie hałasavać u Akademii fizvychavańnia na praspekcie Pieramožcaŭ, – paviedamili ŭ presavaj słužbie dziejnaha prezydenta. Pad čas hetaj pracedury na ŭčastku zmoža prysutničać tolki akredytavanaja presa, niahledziačy na toje, što na ŭsie inšyja ŭčastki, pavodle zakonu, žurnalisty majuć volny dostup.

Radyjo «Svaboda»

Milinkievič budzie hałasavać u niadzielu a 10-j na vybarčym učastku №13 (vuł. Čechava, 8, siaredniaja škoła №166)

• 0
• 0
• 0
• 0
• 0
• 0
• 0
• 0