Prykancy hodu najstarejšy kinateatar Horadni «Čyrvonaja zorka» zapracuje ŭ novym farmacie: kruhłasutkava, z kanapami, baram i miescami dla zakachanych. Kinahurmany pryčakajuć viartańnia kinaklubu «Rakurs», jaki raniej prezentavaŭ u Horadni šedeŭry eŭrapiejskaha kino.
Haradzienski «Kinavideaprakat» u śniežni planuje skončyć rekanstrukcyju najstarejšaha haradzienskaha kinateatru «Čyrvonaja zorka». U abnoŭlenym kinateatry amal utraja pamienieje miescaŭ, ale zatoje źjaviacca kanapy i stoliki ź indyvidualnym aśviatleńniem. Na halorcy buduć admysłovyja miescy dla zakachanych, na jakija buduć pradavać tolki padvojnyja kvitki. U kinateatry zapracuje bar, jaki budzie absłuhoŭvać i hledačoŭ. Akramia kinaprahladaŭ u «Čyrvonaj zorcy» buduć ładzić načnyja zabaŭlalnyja prahramy. Dziela hetaha pierad ekranam abstaluć tanc‑placoŭku.
U ciopły čas sutak hledačy zmohuć adpačyć za stolikami va ŭnutranym dvoryku. Dla naviednikaŭ kinateatru praduhledžanaja kruhłasutkavaja achoŭvajemaja aŭtastajanka.
U kinateatry ustalujuć sučasnaje abstalavańnie, u tym liku i systemu «Dolby». Razam z tym, u časie rekanstrukcyi adrestaŭrujuć aŭtentyčnyja elementy dekoru stroha budynku.
Kinahurmanaŭ čakaje pryjemnaja navina — u adnoŭlenym kinateatry iznoŭ zapracuje klub «Rakurs». Da rekanstrukcyi heta było ci nie adzinaje miesca ŭ horadzie, dzie možna było pabačyć najlepšyja filmy eŭrapejskaha kiniematohrafu.
Najstarejšy kinateatar Horadni byŭ pabudavany ŭ 1914 h. i pieršapačatkova nazyvaŭsia «Edem». Paśla, jak śpiavaje haradzienski bard Viktar Šałkievič, pryjšła novaja ŭłada i ad 1940 h. «Edem» pieratvaryŭsia ŭ «Čyrvonuju zorku», i pad hetaj nazvaj isnuje dahetul.
Ciapier čytajuć
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1414
Kamientary