Прыканцы году найстарэйшы кінатэатар Горадні «Чырвоная зорка» запрацуе ў новым фармаце: кругласуткава, з канапамі, барам і месцамі для закаханых. Кінагурманы прычакаюць вяртаньня кінаклюбу «Ракурс», які раней прэзэнтаваў у Горадні шэдэўры эўрапейскага кіно.
Гарадзенскі «Кінавідэапракат» у сьнежні плянуе скончыць рэканструкцыю найстарэйшага гарадзенскага кінатэатру «Чырвоная зорка». У абноўленым кінатэатры амаль утрая паменее месцаў, але затое зьявяцца канапы і столікі з індывідуальным асьвятленьнем. На галёрцы будуць адмысловыя месцы для закаханых, на якія будуць прадаваць толькі падвойныя квіткі. У кінатэатры запрацуе бар, які будзе абслугоўваць і гледачоў. Акрамя кінапраглядаў у «Чырвонай зорцы» будуць ладзіць начныя забаўляльныя праграмы. Дзеля гэтага перад экранам абсталюць танц‑пляцоўку.
У цёплы час сутак гледачы змогуць адпачыць за столікамі ва ўнутраным дворыку. Для наведнікаў кінатэатру прадугледжаная кругласуткавая ахоўваемая аўтастаянка.
У кінатэатры усталююць сучаснае абсталяваньне, у тым ліку і сыстэму «Dolby». Разам з тым, у часе рэканструкцыі адрэстаўруюць аўтэнтычныя элемэнты дэкору строга будынку.
Кінагурманаў чакае прыемная навіна — у адноўленым кінатэатры ізноў запрацуе клюб «Ракурс». Да рэканструкцыі гэта было ці не адзінае месца ў горадзе, дзе можна было пабачыць найлепшыя фільмы эўрапэйскага кінематографу.
Найстарэйшы кінатэатар Горадні быў пабудаваны ў 1914 г. і першапачаткова называўся «Эдэм». Пасьля, як сьпявае гарадзенскі бард Віктар Шалкевіч, прыйшла новая ўлада і ад 1940 г. «Эдэм» ператварыўся ў «Чырвоную зорку», і пад гэтай назвай існуе дагэтуль.
Цяпер чытаюць
Амаль усе чаты і суполкі калоній і СІЗА Беларусі прызналі экстрэмісцкімі фармаваннямі. Пад пагрозай тысячы чалавек4
Каментары