U Miensku pačaŭsia Kanhres demakratyčnych siłaŭ

U Pałacy kultury MAZ pačaŭsia Kanhres demakratyčnych siłaŭ. Rehistracyja pakazała, što prysutničajuć 568 delehataŭ z 916 zajaŭlenych — kvorum jość. Kala 100 delehataŭ z rehijonaŭ padjechali paźniej. U zali prysutničali 29 byłych palitviaźniaŭ. Bačnyja niekalki raściažak “Małady Front”, šmat bieł-čyrvona-biełych i niekalki čyrvonych ściahoŭ.

Z pryvitalnym słovam ad arhanizataraŭ vystupiŭ Alaksandar Buchvostaŭ. Śledam słova ŭziaŭ Mikoła Statkievič: “Dajcie mnie try chviliny. Dumaju, heta nia tak šmat paśla dvuch hadoŭ”. Jon pieršym punktam pracy Kanhresu zaklikaŭ razhledzieć pytańnie vybaru stratehii. Na tym samym akcentavaŭ uvahu i Pavał Sieviaryniec. Treba vyznačycca, ci my źbirajemsia pieramahać pad bieł-čyrvona-biełymi ściahami, ci biaź ich, kab nie złavać kamunistaŭ, skazaŭ jon.

Uvohule, Kanhres pačynaŭsia vielmi napružana, u zali stajaŭ hvałt, padčas vystupu kamunista Mikoły Pietrušenki pačułasia skandavańnie “Hańba!” Abražany vystupoŭca, jaki pačaŭ byŭ havaryć pa-biełarusku, pierajšoŭ na rasiejskuju. Viadučy Kanhresu Valer Uchnaloŭ niervavaŭsia, nie kantralavaŭ sytuacyju ŭ zali. Tady Stanisłaŭ Šuškievič vyzvaŭsia ŭziać kiraŭnictva schodam na siabie. I zdoleŭ navieści paradak.

Alaksandar Milinkievič u svaim vystupie adznačyŭ, što letašniaja prezydenckaja kampanija była najlepšaj kampanijaj apazycyi za apošnija hady, što jana zdoleła dać ludziam nadzieju, zahłušyć ich strach. Kampanija nie była prajhranaja, adznačyŭ A.Milinkievič, bo nie było spabornictva. Milinkievič adznačyŭ, što siońnia treba stratehija dziejsnaj baraćby, a nie jaje imitacyi j padtrymaŭ stratehiju “Eŭrakaalicyi”. Taksama jon padkreśliŭ, što apazycyja pieražyvaje hłyboki kryzis, vyklikany ŭnutranym zmahańniem za ŭładu. “Dla tych, chto mnie daviaraje, ja hatovy zastavacca adzinym lideram apazycyi”, adznačyŭ jon.

Siarhiej Kalakin pahadziŭsia ź Milinkievičam u acency vybaraŭ 2006 h., taksama adznačyŭ, što nia bačyć pryncypovaj roźnicy miž stratehijaj «Eŭrakaalicyi» i stratehijaj abjadnanaj apazycyi: i tam, i tam viadzieca pra kanstytucyjnuju źmienu ŭłady. Lider kamunistaŭ adznačyŭ, što ŭłada pojdzie na pieramovy tolki z mocnaj apazycyjaj, i zaklikaŭ da kansalidacyi.

Paśla pierapynku havaryŭ Anatol Labiedźka, jaki zaklikaŭ abjadnać namahańni, kab abaranić ludziej, u jakich adabrali sacyjalnyja harantyi i lhoty. «Heta niekalki miljonaŭ našych hramadzian, niekalki miljonaŭ vybarščykaŭ. Nadrukujem miljonnymi tyražami ŭlotki, hazety, i pojdziem da ludziej».

Vincuk Viačorka ŭ svajoj pramovie adznačyŭ važnuju rolu Alaksandra Milinkieviča ŭ mižnarodnaj pracy, nazvaŭ dyplamatyčnym praryvam, sytuacyju, jakaja skłałasia za apošni čas.

«Najvažniejšymi vynikami hetaha dyplamatyčnaha praryvu byli niepryznańnie padziejaŭ 19 sakavika 2006 hodu biez spraviadlivych i prazrystych vybaraŭ usimi eŭrapiejskimi krainami, ZŠA i mižnarodnymi eŭrapiejskimi i eŭraatlantyčnymi arhanizacyjami. Taksama pastanoŭka pytańnia pra vyzvaleńnie palityčnych viaźniaŭ. Toje, što siońnia pobač z nami, prynamsi, ich častka – my rady ich bačyć — heta ŭ peŭnym sensie recha toj pracy. Toje, što siońnia adbyvajecca naš kanhres u Miensku, heta ŭ peŭnym sensie taksama recha taho našaha supolnaha zmahańnia».

Pieršy dzień pracy Kanhresu zaviaršyŭsia a 19-j. Pry kancy Stanisłaŭ Šuškievič prapanavaŭ pastavić na hałasavańnie alternatyvu. Pieršy biuleteń – za abrańnie sustaršyniami palityčnaj rady abjadnych demakratyčnych sił (ADS) musiać być Viačorka, Kalakin, Laŭkovič i Labiedźka. Druhi biuleteń – staršyniom palitrady ADS musić być Milinkievič.

Druhi dzień pracy Kanhresu pačniecca zaŭtra a 9-j z pres-kanferencyi lideraŭ frakcyj.

• 0
• 0
• 0
• 0
• 0
• 0
• 0
• 0