Naviny
Śmierć u drovach
Jak napadała śniehu, u stolinskich lasach znoŭ stali pavalna vyrubać les, u tym liku zabrudžany radyjacyjaj. Leśniki kažuć, što tolki ŭ vioski Rubiel da Chatomiel štodzień ź lesu prychodzić pa 25—30 furmanak i razvałaŭ, piša BiełaPAN. Adnaho žychara Chatomla za apošnija 3 hady złavili z dryvami 12 razoŭ, a jamu choć by dzički: kara bolš-mienš jak minimałka, dyk usio adno apłocicca jeździć. Hazu na Stolinščynu amal niama, vuhlu brakuje, dyk topiać chaty j ciaplicy dryvami. Horš, šče j pradajuć ich. Chto nia viedaje, kuplaje i topić sabie śmierciu.
Daktary-beenefaŭcy adsudzili premiju
Sud abaviazaŭ vypłacić lachavickim daktaram Alenie i Iharu Łobanam niezakonna źniatyja ź ich premii. Ich uciskali za toje, što Ihar byŭ ačolvaŭ u rajonie BNF — 12 razoŭ pakidali biaz premijaŭ (jon terapeŭt, jana stamatolah). U sudzie Łobanam dapamahała pravaabarončaja “Viasna-96”, piša BiełaPAN. Łobany akryjali ad pieramohi i chočuć ciapier zasnavać u Lachavičach supołku Svabodnaha prafsajuzu.
Zamiž persidzkaha ŭzoru...
9 śniežnia ŭ Domie litaratara śviatkavali 108-ja ŭhodki Maksima Bahdanoviča. Pry kancy viečaryny nie abyšłosia biez palityki. Praviali impravizavanaje hałasavańnie “za” i “suprać” sajuzu z Rasiejaj. Čałaviek 10 było “za” i čałaviek 150 — “suprać”. Dyk pryniali zvarot-list pratestu suprać damovy, a paśla, stojačy, usioj zalaju vykanali “Pahoniu”.
A.Š.
Ekspansija krajoŭcaŭ
U Bieraści mocna aktyvizavalisia tutejšyja “krajoŭcy”. Na aŭtobusnych prypynkach źjavilisia ichnyja ŭlotki: “Tabie abrydła hetaje śviniačaje žyćcio? Ty nia ličyš siabie bydłam i “atrebjem” — prychodź u “Kraj”, i my navučym ciabie, jak baranić Hodnaść! “Kraj” hurtuje vakoł siabie ludziej, dla jakich słovy: boh, vola, nacyja, dziaržava — nie pusty huk”.
Ź Bieraścia — Siaržuk Prudnikaŭ
Niama Frańjo Tudžmana
Pamior prezydent Charvatyi. Antyfašyscki partyzan, juhasłaŭski hienerał, paśla dysydent, pieršy lider niezaležnaj Charvatyi pad čas juhasłaŭskaj ahresii, pieramožca serbskich krainaŭ u małankavaj vajnie, jakaja za 3 dni viarnuła Charvatyi ŭsio stračanaje. Ciapier hety čałaviek, jakoha časta vinavacili ŭ paturańni byłym ustašam, ucisku svabody dumki, ckavańni liberalnaje intelihiencyi, raździmańni antyserbskaj nianaviści i navat zmovach ź Miłošavičam, naležyć historyi.
