Tałakoju i baćku pabjem
Niahledziačy na toje, što chtości ŭžo pachavaŭ hieneracyju «40-hadovych nacyjanalistaŭ» pamiž staronak svaich litaraturaznaŭčych hierbaryjaŭ, idei kolišniaje «Tałaki», što hruntujucca na adzina mahčymym i pravilnym va ŭmovach siońniašniaje dziaržaŭnaje antysanitaryi pryncypie «ruka ruku myje», žyvuć i pieramahajuć. Apošnim paćvierdžańniem hetamu staŭsia prajekt stvareńnia filmu pad pracoŭnaj nazvaj «Žyćcio i pryhody niemaładoha nacyjanalista», raspačaty dźviuma «pryvatnymi asobami»: Viktaram Ivaškievičam dy Irynaj Vołach (što praŭda, «u pracesie» vydaviec prafsajuznaje hazety «Rabočy» i supracoŭnica teleradyjokampanii skarystali-tki svajo słužbovaje stanovišča dziela asabistych metaŭ). Z 10 dasłanych na konkurs scenaraŭ farmatna-adpaviednymi byli pryznanyja vosiem. Pavodle słovaŭ Iryny Vołach, usie tvory pakidajuć pa sabie ahulnaje ŭražańnie panyłaści i pesymizmu — navat adzinaja kamedyja, dasłanaja bieraściejskim aŭtaram, naskroź prasiaknutaja čornym humaram i skančajecca źniavoleńniem hałoŭnych hierojaŭ u KPZ. Pieršuju premiju žury (u skład jakoha, akramia ŭžo zhadanych, uvajšli jašče dźvie pryvatnyja asoby — Valancin Akudovič i Uładzimier Arłoŭ) adzinahałosna vyrašyła nikomu nie prysudžać. Zatoje druhoj — «zaachvočvalnaj» (pa 300 dalaraŭ) — adznačyli adrazu dźvie pracy: «Vyrak» Juryja Stankieviča (jaho chutka možna budzie pračytać u «Krynicy» — pra vandroŭnaha rycara, jaki padarožničaje na MAZie ŭ pošukach ziamli, dzie možna było b zasnavać kaloniju dla miljonu śviadomych biełarusaŭ) dy «Łancuh» Andreja Fiedarenki, jaki, jak skazaŭ aŭtar, nie nadrukuje anivodnaje dziaržaŭnaje vydańnie — z pryčyny nadzvyčajnaje ščyraści i niecenzurnaści (pra toje, jak dalary psujuć nacyjanalistaŭ). Viktar Ivaškievič uručyŭ pieramožcam admysłovyja dyplomy ad hazety «Rabočy» i ŭźniaŭ za ich tost. A paśla ŭźniaŭ tost za tałaku (z małoj litary i biez dvukośsia) — jak adzinuju realnuju siłu. A paśla — za pośpiech. Što ni kažy, a pałova spravy zroblena. Zastałasia drobiaź — źniać film. I choć, jak adznačyŭ niemałady biełaruski nacyjanalist Karłas Šerman, daražejšyja za kino tolki paloty ŭ kosmas, usio pavinna atrymacca. Tałakoj jano i baćku bić praściej.
A.S.
Ciapier čytajuć
«Jak tolki čujuć pra Rasiju — dyk usio… U čym prablema?» U Minsku nie chočuć zdavać kvateru čałavieku z rasijskim pašpartam7
Kamientary