Na adkryćci kinafestu «Mahnifikat» pakažuć stužku Kazimira Śvionteka
Sioletni katalicki festyval chryścijanskich filmaŭ i teleprahram vyłučajecca intryhoŭnymi stužkami j niezvyčajnymi premjerami.
Z 20 pa 24 červienia ŭ Hłybokim, Udziele, Mosary j Iviesi projdzie III Mižnarodny katalicki festyval chryścijanskich filmaŭ i teleprahram «Magnificat'2007».
Zasnavalnikami festu źjaŭlajucca Viciebskaja rymska-katalickaja dyjacezija, katalickaja asacyjacyja dla kamunikacyj «Signis‑Biełaruś», redakcyja časopisa «Dyjaloh» i studyja «Stopkadr».
Jak padkreśliŭ staršynia festu Jury Haruloŭ, sioleta prahrama nadzvyčaj mocnaja. Kali na papiarednija festyvali bralisia ŭsie stužki, dasłanyja na konkurs, to sioleta z 54 stužak i teleprahram było adabrana tolki 43. Pradstaŭlena 14 krain: Biełaruś, Baŭharyja, Italija, Kanada, Litva, Meksyka, Polšča, Rasieja, Słavakija, Ukraina, Francyja, Charvatyja, Švajcaryja, Ekvador.
Tradycyjna vielmi mocnuju i pradstaŭničuju častku konkursnych stužak składajuć filmy, pryśviečanyja biezabaronnym i słabym ludziam: invalidam, chvorym, dzieciam: biełaruskija stužki «Božyja ludzi» i «Nie ja adna», rasiejski film «Kryštalovy chłopčyk», słavackaja karcina «Anioły».
Hruntoŭnaje dakumentalnaje raśśledavańnie cudu padadziena ŭ italjanskaj stužcy «U Syrakuzach, dzie Maryja płakała». Pra cudy havorycca i ŭ biełaruskich telepieradačach «Cudy i znaki» i «Iryna Dzianisava» Haliny Adamovič.
Žyćcio čałavieka samo śviedčyć pra Chrysta, jak u italjanskaj stužcy «Mužnaść cišyni. Ajciec Płačyda Karteza», charvackim filmie «Šlachami pamiaci», rasiejskaj karcinie «Pamiž niebam i ziamloj» ci biełaruskaj stužcy «Paema viery» pra inaka Mikałaja (Aleha Biembiela).
Intelektualnaj sensacyjaj źjaŭlajecca kanadskaja karcina «Šlach Makluena. U pošukach iściny». U joj raspaviadajecca pra katalicki padmurak idej słynnaha medyjnaha filozafa, jaki adkryŭ, što «medyi jość paviedamleńniem».
Vostryja sacyjalnyja prablemy zakranajucca ŭ bałharskim filmie pra cyhanoŭ «Narodžanyja z prachu». Švajcarskaja karcina raspaviadaje pra «Śviataroŭ na piensii», a pra tvorčaść vychavanca jezuitaŭ Jana Barščeŭskaha havorycca ŭ biełaruskim filmie «Letucieńnik». Telepieradača «Prytułak dušy» raskazvaje pra śviatyni Budsłava j Šemietava.
A stužka «Ruskaja siastryčka z abactva Sylvanes» uvohule moža ličycca symbalem festyvalu. Jana zroblenaja biełaruskim režyseram u Francyi i raspaviadaje, jak daminikanskija manachi pabudavali… ruskuju draŭlanuju carkvu.
Polski film «Horad na race Čornaha Cmoka» raspaviadaje pra katalickuju misiju ŭ rasiejskim Błahavieščansku. Jašče adna polskaja karcina «Apošni śviedka» raspaviadaje pra čałavieka, jaki vyžyŭ paśla Katynskaj trahiedyi. Adrazu niekalki polskich stužak pryśviečany Papam Rymskim, Benedyktu XVI i Janu Paŭłu II: «Skryžavańni. Pakaleńnie Jana Paŭła II», «Raźličvaju na vas». Što da karciny «Viasiołka. Benedykt XVI u Polščy», to jana, badaj, nia maje analahaŭ pa kolkaści aperataraŭ: imi stanavilisia sami ŭdzielniki sustrečy z pantyfikam.
Rasiejski film «Heta ja, Apakalipsis» zakranaje temu Apakalipsisu j niezvyčajny svaim mantažom.
Siurpryzam adkryćcia kinafestu staniecca pazakonkursny pakaz stužki Kazimira Śvionteka «Čar pryrody», jakuju jon źniaŭ za časami, kali byŭ ksiandzom.
Uvachod na ŭsie pakazy svabodny.
Kamientary