Z usioj krainy

 Z usioj krainy

“Advažnaje serca” ŭva ŭsioj Biełarusi

U vychodnyja 18—19 listapada pa 20 rehijanalnych biełaruskich kanałach, aproč mienskaha, pakažuć film «Advažnaje serca» na biełaruskaj movie. Heta danina pavahi zmaharam Słuckaha zbrojnaha čynu. Damoviŭsia pra pakaz Biełaruski videaklub.

Film pra Zavadzkaha

8 listapada ŭ sieradu ŭ 22.10 na kanale ORT pakažuć film Paŭła Šaramieta “Dzikaje palavańnie”. Šaramiet sprabuje razabracca ŭ tajamnicy źniknieńnia aperatara Źmitra Zavadzkaha.

Haryć kastryčnickaje siena

Viečaram 31 kastryčnika ŭ kałhasie «Kastryčnicki» Rudabielskaha (Akciabarskaha) rajonu zhareła 140 t siena – amal pałova z taho, što nazapasili na zimu. Rabotnik taho kałhasu kinuŭ niedakurak u sienaschovišča. Ahułam u tych krajoch užo pajšło popiełam paŭtysiačy tonaŭ siena.

Mini-mis z Paleśsia

9-hadovaja biełarusačka Saša Škurdoba vyjhrała konkurs “Mini-mis śvietu”, što prajšoŭ u Kijevie. Žyvie jana ŭ vioscy Rasna la Vysokaha. Dziaŭčynka pryviezła dachaty karonu sa srebra dy hornaha kryštalu.

Novy most u Drysie

U Drysie pabudavali pantonny most daŭžynioju kala 200 m praz Zachodniuju Dźvinu. Žychary čakali na hetuju padzieju 40 hod, a na pracu pajšło ŭsiaho niekalki dzion. Budavali jaho vajskoŭcy-čyhunačniki, a śviacili ksiondz i pop.

AHP – 5 hadoŭ

Učora Abjadnanaja Hramadzianskaja Partyja śviatkavała svajo piacihodździe. Pavinšavać jaje pryjechaŭ rasiejski satyryk V.Šendzierovič, jaki, jak akazałasia, rodam z Čavusaŭ, ale pierad uračystym kancertam krucili ŭsio ž svojskuju “Partyzanskuju” hurtu NRM.

Palaki naviedali Kurapaty

1 listapada ambasadar Polščy ŭ Biełarusi Maryjuš Maškievič razam ź inšymi supracoŭnikami ambasady dy ich siemjami pryjechaŭ u Kurapaty. Jany pastavili vaskoŭki la kryžoŭ.

Ułady kryŭdziać kamunistaŭ

Kamunistam upieršyniu zabaranili prajścisia šeściem pa centry Miensku 7 listapada. KPB kryŭduje, što «antydziaržaŭnaj apazycyi» Minharvykankam «dazvalaje chadzić navat u budni, a prychilnikam palityki prezydenta zabaraniajuć navat u śviaty».

Vybary — fars

Miečysłaŭ Hryb zajaviŭ, što padčas kastryčnickich vybaraŭ adbyłosia kala 80 vidaŭ parušeńniaŭ zakanadaŭstva. Naziralniki zafiksavali bolš za 5 tys. parušeńniaŭ. Biełaruski Hielsynski Kamitet uvohule ličyć, što maštaby parušeńniaŭ nie dazvalajuć nazvać vybarami toje, što adbyvałasia 15 i 29 kastryčnika. Bolš za 70 asobaŭ, što adkazvali za ich praviadzieńnie, učynili kryminalnyja złačynstvy, uvažaje BHK.

Nalot na hazetu “Šah”

U noč z 4 na 5 listapada ŭ Baranavičach abrabavali redakcyju niezaležnaj hazety “Šah”. A 4-j nočy na dvare stali kryčać “Ratujcie”, vartaŭnik adamknuŭ, kab dapamahčy čałavieku, a tut na jaho napali, załamili ruki, źviazali, uvarvalisia ŭ ofis. Źnieśli častku ofisnaj techniki. Dva miesiacy tamu “Šah” zrabiŭsia pieršaj štodzionnaj rehijanalnaj hazetaj u krainie. Supracoŭniki hazety ličać, što heta było nia prostaje abrabavańnie – nalotčyki nia nadta śpiašalisia, zabirali nia samyja darahija pryłady, a mienavita tyja, što zabiaśpiečvajuć pracu hazety. Pa śviedčańni vartaŭnika, na adnym z złodziejaŭ byli vajskovyja štany dy boty.

Sproba ŭciokaŭ

1 listapada ŭ Bieraści vartaŭniki dvuma strełami zabili zasudžanaha, kali toj, niečakana vyzvaliŭšysia z kajdanoŭ, pasprabavaŭ uciačy. Heta byŭ hramadzianin Rasiei, jakoha ŭžo pasadzili za rabavańnie dy padazravali ŭ vyrabie falšyvych hrošaj.

Złačynstvaŭ pamienieła

Z pačatku hetaha hodu ŭ Biełarusi ździejsnili amal 97 tys. złačynstvaŭ — na 0,4% mienš, čym za toj samy čas u 1999 h. Ale raskryli tolki 70,8% złačynstvaŭ proci letašnich 71,6%.

Hryp nabližajecca

Na Bieraściejščynie ŭžo zarehistravali pieršych chvorych na hryp, choć epidemiju čakajuć tolki ŭ kancy śniežnia – pačatku studzienia. Letaś epidemija taksama pačałasia na Bieraściejščynie. Sioleta ŭ Biełaruś pryjduć tyja samyja virusy — A1, A3 i B, suprać jakich majuć imunitet tyja, chto chvareŭ u minułym hodzie.

Pjem mieniej harełki i bolej čarniła

Sioleta biełarusy nabyli na 21% mienš harełki, čym letaś. Ale pjem usio roŭna šmat – za 9 apošnich miesiacaŭ pradali 150 miljonaŭ 280 tysiač paŭlitrovych butelek — pa 15 butelek mocnych napojaŭ na kožnaha žychara. Aproč taho, na 24% bolej pradali vinahradnych, pładova-jahadnych i šampanskich vinaŭ, na 6% — piva. Udzielnaja vaha alkaholnych napojaŭ u ahulnym abjomie razdrobnaha handlu ŭ studzieni-vieraśni skłała 15,5% (za hety ž peryjad letaś — 12,9).

Padrychtavaŭ Aleś Kudrycki pavodle infarmacyi ahienctva BiełaPAN

Vyhaniajuć z pasadaŭ za siena

Napiaredadni ŭ Pinsku vykankam źbiraŭ kiraŭnikoŭ haradzkich pradpryjemstvaŭ, kab abmierkavać vyniki raźvićcia haspadarki horadu za 9 miesiacaŭ. Siarod inšaha hałoŭny vertykalščyk paabiacaŭ zvolnić troch dyrektaraŭ (račnoha portu, čyhunačnaj stancyi dy miascovaj filii “Biełarusbanku”) nie za ekanamičnyja pakazčyki, a za toje, što ichnyja kalektyvy nia vykanali planu pa narychtoŭcy karmoŭ dla “zamacavanych” za imi kałhasaŭ.

Alaksiej Dzikavicki, Pinsk

British Council začyniajecca

Dyrektarka miascovaha adździaleńnia British Council spn. Natalla Dziomčanka zajaviła, što zakryćcio sapraŭdy maje adbycca (vierahodnaść – 99%) da kanca hetaha finansavaha hodu (dla Brytanii – kaniec sakavika). Struktury Brytanskaje Rady skaračajucca nia tolki ŭ Biełarusi, a i jašče ŭ 30 krainach. Voś ža, Biełaruś trapiła ŭ lik “mienš važnych” krain. Usie resursy fondu zastanucca na miescy i buduć pieradadzienyja, najvierahodniej, u padarunak Linhvistyčnamu Ŭniversytetu.

BPS suprać Vika

3 listapada niesankcyjanavany pikiet z pratestam suprać zajavy H.-H.Vika nakont metazhodnaści dałučeńnia Biełarusi da Rasiei, zroblenaj im u Biełastoku, praviała Biełaruskaja Partyja Svabody. A 12-j padyšła nievialikaja kalona BPSaŭcaŭ na čale sa sp.Vysockim, razharnuli nacyjanalny ściah i transparanty z nadpisami “Mołataŭ-Rybentrop = Vik-Ivanoŭ”, “Haz(svastyka)prom-Rur(savieckaja zoračka)haz”.

Paśla karotkaj pramovy pratestu S.Vysocki prademanstravaŭ prysutnym partret hetaha čałavieka na vokładcy apošniaha numaru “Kurjeru” i razarvaŭ jaho, paśla čaho kinuŭ šmatki dołu dyj pataptaŭsia pa ich. Časopis toj Vysocki pastaviŭ u svajoj pramovie na adnu palicu ź Vikam, skazaŭšy: “Voś hety čałaviek, a voś taja presa, što ab im piša”. Milicyjanty borździeńka paadbirali u pikietoŭščykaŭ plakaty (ściah tyja nie addali). Nichto z dyplamataŭ da pikietu nia vyjšaŭ.

Jazapat Zmysła

Sieva Jančeŭski hatovy

Cyrymonija zdačy — 12 listapada, u 18.00 na Akademii Navuk padčas akcyi “Pieramienaŭ!”

Tydzień tamu lidery niezaležnych supołak moładzi (Małady Front, Maładaja Hramada, Moładź AHP, Maładaja Salidarnaść, Asacyjacyja Maładych Palitykaŭ, Chryścijanska-Sacyjalny Sajuz Moładzi, Asacyjacyja Maładych Pradprymalnikaŭ) zaklikali siabroŭ BPSM vychodzić z šerahaŭ hetaje struktury i zaprasili achvotnych na akcyju «Pieramienaŭ!», jakaja adbudziecca 12 listapada va ŭsioj Biełarusi.

U adnym Miensku užo bolš za 30 siabroŭ BPSM vykazali žadańnie zdacca na łasku abjadnanaha nacyjanalnaha ruchu moładzi. Kaalicyja razhladaje hetyja pamknieńni jak pačatak paŭsiudnaha razłažeńnia i razbureńnia dziaržaŭnaha 200-tysiačnaha monstra BPSM. Akt uračystaha spaleńnia bepeesemaŭskich paśviedčańniaŭ i ŭručeńnia pryzoŭ budzie adbyvacca na pačatku vuličnaj Akcyi «Pieramienaŭ!» 12 listapada, u 18.00 la Akademii Navuk. Kiraŭnikam rajkamaŭ, harkamaŭ, studenckich i inšych kamitetaŭ BPSM Kaalicyja Moładzi harantuje ŭ jakaści pryzoŭ videakasety ź biełaruskamoŭnaj versijaj blokbastera «Advažnaje serca».

U piatnicu 3 listapada Kaalicyja Moładzi «Pieramienaŭ!» atrymała aficyjny adkaz na naš zvarot staršyni CK BPSM Usievałada Jančeŭskaha. Ź lista vynikaje, što Sieva HATOVY zdacca i prosić tolki ŭdakładnić parametry turystyčnaj pałatki, jakuju my prapanavali jamu naŭzamien paśviedčańnia pustoj «pałatki pradstaŭnikoŭ», rajon drejfu ŭ Ledavitym Akijanie i sposab transpartavańnia na Poŭnač. Naprykancy U.Jančeŭski ŭdakładniaje: «Myślenno vmiestie. P.S. Ja surjozna».

My taksama na poŭnym surjozie uspryniali hetuju aficyjnuju zajavu. Takim čynam, možna śćviardžać, što pieršy deputat tak zvanaj pałatki razumieje ŭsiu nikčemnaść pseŭdaparlamenckaha orhanu i HATOVY adpravicca ŭ dobraachvotnuju vysyłku.

Udakładniajem dla Ŭsievałada: pałatka dvumiascovaja, pakolki ŭ svoj čas ty jak małady palityk drejfavaŭ ad Šuškieviča da Łukašenki. Samu pałatku i kvitok da Tajmyru na 12.XI.2000 my asabista ŭručym staršyni BPSM U.Jančeŭskamu 12 listapada.

Taćciana Alesina, Cimoch Drančuk, Kirył Ihnacik, Aleś Karnijenka, Natalla Makovik, Uładzimier Radzivončyk,
Pavał Sieviaryniec

U spravie Zavadzkaha vyjšli na Adamoviča

Paet i žurnalist Słavamir Adamovič 3 kastryčnika viarnuŭsia z ZŠA ŭ Biełaruś. A ŭžo tydni praz dva im zacikavilisia śledčyja Respublikanskaj prakuratury. Farmalnaj padstavaj dla vykliku Adamoviča ŭ prakuraturu staŭ fakt napadu na jaho dvoch RNIEšnikaŭ u krasaviku 1999 hodu.

Našy krynicy paviedamlajuć, što epizod z napadam śledztva navažyłasia dałučyć da kryminalnaj spravy pa faktach zabojstva ŭ Biełarusi viasnoj hetaha hodu azerbajdžanskaj siamji, źniknieńnia sioleta ŭ lipieni supracoŭnika HRT biełarusa Źmitra Zavadzkaha i zabojstva ŭ žniŭni kiraŭnika RNIE ŭ Biełarusi Hleba Samojłava. Adzin z rabotnikaŭ prakuratury RB zajaŭlaje, što napad na paeta i žurnalista S.Adamoviča “zakazaŭ” niechta Valery Ihnatovič, były supracoŭnik specpadraździaleńnia “Ałmaz”, potym – člen RNIE, jaki ŭžo znachodzicca pad aryštam u suviazi z vyšejpadadzienymi faktami złačynstvaŭ. Cikava, adnak, što vykanaŭca “zakazu” niechta Kobzar, taksama RNIEšnik, znachodzicca na voli. Za zroblenuju “rabotu” jon mieŭsia atrymać ad Ihnatoviča 50 niamieckich marak.

Što da losu Zavadzkaha, to ŭ čas dopytu Adamoviča z boku śledztva prahučała sumnaje mierkavańnie: šancy na toje, što teleaperatar HRT žyvy, blizkija da nula.

Mirasłaŭ Čantarycki

Maładafrontaŭcy psujuć kamunistam śviata

Śviata kamunistam papsavali maładafrontaŭcy. 7 listapada na kamunistyčnym mitynhu na pł.Niezaležnaści la pomnika Leninu jany pačali zaśvistvać pramoŭcaŭ dy skandavać patryjatyčnyja lozunhi. U hety samy čas kala pomnika źjavilisia dziesiać čałaviek z bujnymi litarami na hrudzioch: “Pieramienaŭ! 12 listapada, 18.00, Akademija Navuk”. Jany kolki razoŭ vyhuknuli “Pieramienaŭ!” dy “Biełaruś biez kamunizmu!” Trafejami maładafrontaŭcaŭ stalisia taksama j niekalki čyrvonych ściahoŭ. Razhublenyja milicyjanty tak i nia zdoleli nikoha zatrymać.

A.K.

Zatrymanyja

1 listapada ŭ Horadni padčas śviatkavańnia «Dziadoŭ» milicyja zatrymała 23 čałavieki, siarod jakich: Śviatłana Niech, Alaksandar Michalčyk, Mikoła Voran, Piatro Anisimovič, Aksana Milun, Vadzim Sarančukoŭ, Jula Daraškievič, Volha Ivanova, Iryna Daniłoŭskaja, Źmicier Ivanoŭski, Źmicier Chilmanovič, Hienadź Kurhun, Viktar Kirejeŭ, Viesłaŭ Birula, Raman Ramaška, Iryna Salej, Kastuś Žyń, Alaksandr Michalčyk, Siarhiej Malčyk, Ihar Babkin, Dzianis Ivašyn, Uładzimier Čartapałaŭ, Viktar Kirejeŭ. Usich adpuścili, buduć sudzić.

Za minuły tydzień za rasklejvańnie antyŭradavych nalepak zatrymanyja 11 aktyvistaŭ kaalicyi «Pieramienaŭ», siarod jakich Raman Kazakievič, braty Vadzim i Maksim Javidy, Cimoch Drančuk, Aleh Korban, Michaś Carkoŭ, Ihar Siuld, Aleś Atroščanka, Lavon Juchnievič.

31 kastryčnika sud Babrujsku vynies papiaredžańnie Jaŭhienu Čapuryškinu za arhanizacyju niesankcyjanavanaha schodu.

Pamior Vasil Rusak

Zusim niadaŭna pajšła z žyćcia vybitnaja asoba biełaruskaj dyjaspary ŭ Amerycy Halina Rusak. Raničkaj 29 kastryčnika adyšoŭ u inšy śviet i Vasil Rusak, jaje muž. Nie pieražyŭ śmierci žonki… Pachavańnie adbyłosia ŭ toj aŭtorak. Śvietłaja pamiać.