Śviatynia viarnułasia ŭ chram
21 lutaha pry ŭdziele viciebskaha biskupa Ŭładysłava Blina adbyłasia niezvyčajnaja padzieja ŭ žyćci Hłybokaha – aśviačeńnie cudadziejnaha abraza Maci Božaj Padchornaj Hłybockaj, jaki viarnuŭsia paśla restaŭracyi ŭ Hłybocki Trajecki kaścioł.
Na aśviačeńni, akramia viernikaŭ, prysutničali ksiandzy ŭsich parafij Hłybockaha dekanatu: ks.Kšyštaf Vitvicki, dekan Hłybocki; ksiondz-prałat Jozas Bulka, probašč Mosarskaha kaściołu Śviatoj Hanny; najstarejšy ksiondz Hłyboččyny i Viciebskaj dyjacezii Lucyjan Paŭlik z Zadarožža. Biskup Uładysłaŭ pračytaŭ kazańnie z temami lubovi da bližniaha i siamji. Jon adznačyŭ, što sam naradziŭsia na Hłyboččynie, pachodzić z Zadarožža. Paśla apošniaj vajny byŭ vyjechaŭ u Polšču, tamu jamu lahčej razmaŭlać pa-polsku, adnak jon skazaŭ: “Chto razumniejšy – moža malicca i pa-francusku, i pa-polsku, ale ja na kaleniach vas prašu, kab vy malilisia na biełaruskaj movie, bo jana dla vas rodnaja”. Sa słovaŭ biskupa, u Viciebsku vierniki vielmi pryjazna staviacca da rodnaje movy, bo jana dla ich zrazumiełaja.
Inicyjataram restaŭracyi abraza byŭ kolišni hłybocki, a ciapier łyntupski ksiondz Piatro Ŭrubiel. Restaŭracyja, pavodle roznych źviestak, kaštavała pad piać tysiačaŭ dalaraŭ.
Hety abraz niekali byŭ ułasnaściu Hłybockaha klaštaru ajcoŭ-karmelitaŭ bosych. Znachodziŭsia ŭ kaściole karmelitaŭ pad chorami, adsiul i nazoŭ – Maci Božaja Padchornaja. Pry kasacyi klaštara karmelitaŭ carskimi ŭładami za aktyŭny ŭdzieł mnichaŭ u paŭstańni 1863 h. i pieradačy jaho budynkaŭ “pravasłaŭnaj błahačynii” častka tvoraŭ mastactva dastałasia Hłybockamu Trajeckamu kaściołu. Siarod ich – abraz Maci Božaj Padchornaj, kresła z raźbianymi ilvianymi hałoŭkami, skulptura Isusa Chrysta, jaki siadzieŭ na kałodzie ŭ ciarnovym viancy. Skulptura raniej znachodziłasia ŭ zakonnym chory i dziŭna pacieła 10 žniŭnia 1763 h. Karmelickaja chronika paviedamlała, što a 17-aj i a 22-oj hadzinie ŭvieś tvar Isusa pakryvaŭsia kroplami potu, i ajciec-mahistar Apalinary ściraŭ jaho ŭ prysutnaści mnichaŭ.
Niahledziačy na ŭsie lichalećci j vichury, Hłyboččynie ŭdałosia zachavać značnuju častku svajoj kulturna-histaryčnaj spadčyny, a kolišnija hłybockija ksiandzy — ciapier ksiondz-mahistar Uładysłaŭ Zavalniuk i ksiondz-biskup Kiryła Klimovič — u našaj stalicy pracujuć na nivie adradžeńnia biełaruščyny ŭ kaściole.
Uładzimier Skrabatun, Hłybokaje
