Naviny

 Naviny

Pryvatny pomnik

U Starych Darohach na fasadnaj ścianie tutejšaha pryvatnaha muzeju adkryli pomnik biełaruskaj movie: metalovyja na ŭsiu vyšyniu i šyryniu ściany hierb «Pahonia» dy cytata z klasyka: «Nie pakidajcie ž movy našaj biełaruskaj...». Ich vyrazaŭ sa stali staradaroski ŭmielec Siarhiej Jemialjanaŭ. Da kanca listapada na tle Bahuševičavaj cytaty raźmieściacca taksama pomniki Skarynu, Bahuševiču, Bahdanoviču dy Hienijuš. Memaryjał adkryjuć padčas śviatkavańnia 71-ch uhodkaŭ Słuckaha zbrojnaha čynu.

B.T.

Sytuacyja vychodzić z-pad kantrolu

Zubry, pamidory j Łukašenka na rovary

Učora ŭ Miensku na płoščy Niezaležnaści adbyŭsia vajskovy parad. Łukašenkava zaprašeńnie panazirać za im z uradavaj trybuny pryniali Hančaryk, Kalakin i Hajdukievič. Inšyja apanenty Łukašenki nazvali zaprašeńnie tannym reklamnym chodam.

Svaju pramovu pierad pačatkam vajskovaha paradu na płoščy Niezaležnaści ŭ Miensku Alaksandar Łukašenka čytaŭ nie adryvajučysia ad papierki, — ćviordym i žorstkim hołasam. Amal adrazu jon zhadaŭ pra napady vorahaŭ, jakija stahodździami razburali Biełaruś. Pry hetym pieralik bakoŭ, adkul prychodzili zachopniki, Łukašenka pačaŭ z uschodu, a ŭžo potym zhadaŭ pra zachad, poŭnač i poŭdzień.

Padčas narodnych hulańniaŭ milicyjanty zatrymali na praspekcie Skaryny 8 siabroŭ arhanizacyi “Zubr”, jakija razdavali hazetu “Naša Svaboda” i nalepki “Čas vybirać!” Praz try hadziny ich vypuścili.

Litaralna pierad samym pačatkam estafety z płoščy Pieramohi, u jakoj planavaŭ udzielničać Łukašenka, kalona z sotni siabroŭ “Zubra” ŭ žoŭtych sakołkach “Čas vybirać” prajšła praspektam Skaryny da Kastryčnickaj płoščy ź lozunhami “Dałoŭ durnia!”, “Čas vybirać!” i “Žyvie Biełaruś!” pad vopleski ludziej, jakija stajali ŭzdoŭž praspektu. Praź niekalki chvilinaŭ paśla hetaha šeścia Łukašenka na rovary pajechaŭ z Kastryčnickaj płoščy na płošču Pieramohi, kab raźmiacca pierad prabieham. Padčas hetaj raźminki ŭ jaho kinuli pamidoram. Zrabiŭ heta niejki Siarhiej Łapcieŭ. Jaho zatrymali ludzi sa słužby biaśpieki, zavieźli ŭ haradździeł milicyi i źvinavačvajuć u drobnym chulihanstvie.

Cikava, što rasiejskaja gazeta.ru paviedamiła, niby ŭ Łukašenku zasadzili nie pamidoram, a “ciažkim pradmietam”, što adrazu robić z prezydenta ledź nie achviaru teraktu.

Padčas estafety Łukašenku znoŭ čakali niepryjemnaści — maładafrontaŭcy pry im špurnuli na praspekt paru pačkaŭ bieł-čyrvona-biełych ulotak “Zrabi prezydenta!” Ich kinulisia zatrymlivać, ale ŭsich aryštavać nie paśpieli. U pastarunki źvieźli tolki Paŭła Sieviarynca, Paŭła Patapava i Źmitra Kaśpiaroviča.

Mikoła

Sachančuk znajšoŭsia

Pinski student Maksim Sachančuk, jaki byŭ na tydzień źnik, znajšoŭsia. Kolki dzion tamu jon patelefanavaŭ u Miensk, duža dziakavaŭ usim za padtrymku, za toje, što infarmacyja pra jahonaje źniknieńnie pajšła tak šyroka, bo biaz hetaha jon naŭrad ci źjaviŭsia b. Sachančuk pa telefonie nie skazaŭ, što ź im adbyłosia, adno paabiacaŭ usio raspavieści, pryjechaŭšy ŭ Miensk. Zaraz Maksim doma, baćki nikudy jaho nie vypuskajuć i nie dazvalajuć nikomu bačycca ź im.

Boh niaroŭna dziele

Na apošniuju imšu Papy rymskaha ŭ Lvovie sabraŭsia miljon narodu, a na apošnija homielskija słužby Patryjarcha maskoŭskaha – chiba paru tysiačaŭ.

Kadebistam ad pravasłaŭnych

Padčas vizytu patryjarcha Maskoŭskaha Aleksija II šerah supracoŭnikaŭ KDB Biełarusi, u tym liku jahony staršynia Leanid Jeryn, atrymali ŭznaharody Rasiejskaj pravasłaŭnaj carkvy. Jerynu dali orden Roŭnaapostalnaha kniazia Ŭładzimiera III stupieni — za toje, što jon “ź vialikaj pavahaj i akuratnaściu realizoŭvaŭ volu biełaruskaha ŭradu va ŭzmacnieńni duchoŭnych asnovaŭ hramadztva”.

U palaŭničaha-ŭnijata aplambavali strelbu

Pierad pryjezdam Aleksija II da parafijanina pinskaj unijackaj parafii Paŭła Alachnoviča, zaŭziataha palaŭničaha, pryjšli milicyjanty j aplambavali sejf z palaŭničym ryštunkam. Zapeŭnivańni sp.Alachnoviča, što jon razam z usimi pinskimi ŭnijatami pajedzie ŭ Kijeŭ na sustreču z Papam, milicyjantaŭ nie pierakanali.

Napali na Łukašenku

Achviaraj čarhovaje akcyi Maładoha Frontu “Horad naš!” staŭsia Łukašenka. 2 lipienia ŭ 20.45, kali Ryhoravič paśla aficyjnaha mierapryjemstva vychodziŭ z Pałacu Respubliki, pačulisia vokličy “Žyvie Biełaruś!” i na Łukašenku pasypalisia fantany bieł-čyrvona-biełych ulotak. Moładź, jakaja, chavajučysia ad daždžu, stoŭpiłasia na prystupkach Pałacu, vitała vidovišča halokańniem i vopleskami. Ryhoravič pad prykryćciom achovy chucieńka schavaŭsia ŭ mašynu.

S.M.

Maskva prysłała padkrapleńnie

Dniami ŭrad atrymaje pieršuju častku abiacanaha mižbankaŭskaha kredytu z Rasiei j pačnie vypłačvać zapazyčanaści pa zarobkach biudžetnikam. Hetych srodkaŭ chopić taksama, kab utrymać kurs biełaruskaha rubla. Adnak madernizacyja pakul jašče kankurentazdolnych pradpryjemstvaŭ (“Biełaruśkalij”, mahiloŭskaje “Chimvałakno” i h.d.) iznoŭ adkładajecca da śviatoha nikoli. Zatoje siaredni zarobak u krainie, pavodle aficyjnych źviestak, dasiahnuŭ u červieni 87 dalaraŭ.

Pavodle dadzienych ministerstva statystyki j analizu na 1 traŭnia 2001 h. ahulnaja zapazyčanaść biełaruskich pradpryjemstvaŭ za enerharesursy skłała 2122,2 młrd. rubloŭ (1,59 młrd. dalaraŭ ZŠA). Na 1 studzienia jana składała 1772,3 młrd. rubloŭ (1,5 młrd. dalaraŭ ZŠA).

Niezapatrabavanaść ajčynnaha piva naŭprost źviazanaja z systemaj dziaržzakazu, što dziejničaje ŭ Biełarusi: piŭnych vytvorcaŭ abaviazvajuć zakupać uzroščany na Biełarusi pivavarny jačmień, jaki pa jakaści značna sastupaje zamiežnamu. Akramia taho, 80% abstalavańnia brovaraŭ sastareła, adsutničajuć abarotnyja srodki i prytok kapitału. Za piać miesiacaŭ 2001 h. u Biełarusi vyrablena 5 miljonaŭ 283 tysiačy dekalitraŭ piva, što na 19% mieniej, čym za analahičny peryjad minułaha hodu.

Padčas vizytu kalininhradzkaj delehacyi ŭ Biełaruś abmiarkoŭvalisia transpartnyja prablemy: jak kalinihradcam, pierš čym Litva ŭviadzie vizavy režym, zabiaśpiečyć spryjalnyja ŭmovy tranzytu praź Biełaruś. Abychodny šlach pa terytoryi Polščy moh by skaracić šlach z Kalininhradzkaj vobłaści ŭ Biełaruś, a paśla ŭ Maskvu. Ale palaki nehatyŭna staviacca da pabudovy ŭsiakich transpartnych kalidoraŭ. Pieramovy z Polščaj buduć vieści ŭrady Rasiei j Biełarusi. A pakul baki damovilisia ŭ chutkim časie adkryć avijaliniju Kalininhrad-Miensk.

1 lipienia ŭ krainie skončyłasia čarhovaja pierarehistracyja jurydyčnych asobaŭ. Patrabavańnie zdymać dla pracy specyjalnyja ofisy akazałasia niepieraadolnaj pieraškodaj dla pierarehistracyi amal pałovy pradpryjemstvaŭ małoha biznesu. Jany apynulisia pa-za zakonam i musiać być źlikvidavanyja. Sajuzy pradprymalnikaŭ prosiać urad praciahnuć pierarehistracyju subjektaŭ haspadarańnia krainy prynamsi na dva hady. Što z hetaha atrymajecca, stanie viadoma, kali Jarmošyn vierniecca z adpačynku.

Siaržuk Ivanoŭski

Domaš pieršy

Siamion Domaš pavodle źviestak na 1 lipienia sabraŭ 87 tysiačaŭ podpisaŭ u padtrymku svajho vyłučeńnia. Najbolš za jaho padpisałasia ŭ Miensku – 22 tysiačy čałaviek, na Haradzienščynie – 15,5 tys. dy Bieraściejščynie – 12,8 tys. U Mienskaj vobł. – 12,2 tys., u Viciebskaj – 10,3 tys., u Homielskaj – 8,7 tys., Mahiloŭskaj – 6 tys.

Pavodle źviestak redakcyi, dziakujučy aktyŭnamu zboru ŭ Miensku i na Haradzienščynie Domaš na paru tysiačaŭ hałasoŭ apiaredžvaje ŭ ahulnym zaliku Ŭ.Hančaryka, choć kamanda apošniaha, jakaja składajecca ŭ asnoŭnym z studentaŭ, prafsajuznych aktyvistaŭ i sacyjał-demakrataŭ, pracuje vielmi zładžana. Miarkujučy pa tempie, hetyja dva kandydaty mohuć raźličvać na bolš jak 200 tys. podpisaŭ pa vynikach miesiaca zboru. Kab na ŭschodzie krainy zbor išoŭ jak na zachadzie, dzie inšy raz za Paźniaka j Domaša padpisvajucca cełymi vioskami, było b i bolej. Ale ž uschod marudzić: domašaŭski pikiet u Mazyry štodzień nabiraje chiba try-piać podpisaŭ.

Ciažkavata idzie zbor u troch inšych demakratyčnych kandydataŭ — pavodle našych źviestak z roznych rehijonaŭ, u ich nabirajecca podpisaŭ u siarednim u 2—3 razy mieniej, čym u Hančaryka z Domašam, h.zn., što jany ryzykujuć nie nabrać nieabchodnyja 100 tys. Jano było b i niakiepska: lahčej vyrašyłasia b pytańnie pra vyłučeńnie adzinaha kandydata.

Palitrada AHP učora vyrašyła zapatrabavać ad kandydataŭ “piaciorki” vyznačyć “adzinaha” da 15 lipienia. U advarotnym vypadku jana pahražaje adklikać usich svaich siabroŭ ź inicyjatyŭnych hrupaŭ kandydataŭ. Treba dumać, cisk z boku niezaležnaha biełaruskaha hramadztva na demakratyčnych kandydataŭ budzie ŭzmacniacca. Vasil Lavonaŭ, jaki kaardynuje praces vyłučeńnia “adzinaha”, abiacaje, što da 15 lipienia adpaviednaje rašeńnie prymuć, ale buduć trymać u tajamnicy.

S.Hajdukievič hučna abvieściŭ, što 100 tys. podpisaŭ užo sabraŭ, ale supierniki pa honcy nie dajuć jamu viery.

Z.Paźniak i Ł.Sinicyn pra kolkaść sabranych podpisaŭ nie paviedamlajuć.

Siarod zborščykaŭ M.Maryniča byli zaŭvažanyja kursanty Akademii milicyi. Ci to sapraŭdy namenklatura rychtuje antyłukašenkaŭski bunt, ci to Maryniču dapamahajuć z Administracyi prezydenta.

Ułady nie navažacca admović u rehistracyi kandydatu, jaki pradstavić niekalki socień tysiač podpisaŭ. Dyk padpisvajsia!

Mikoła

Paciarpiełyja za Biełaruś

1 lipienia ŭ Miensku byli zatrymanyja maładafrontaŭcy i siabry “Moładzi AHP” Alaksiej Tałstoŭ, Illa Biahun, Michał Šaramiet, Źmicier Dzialendzik, Pavał Sieviaryniec, Michaś Carkoŭ, Volha Čarnych, Nasta Karpovič, Maryja Łoś, Vital Košaleŭ, Volha Čarnievič, Stasia Basava, Maryna Kanapielka, Dźmitry Śvirydaŭ, Aleś Kudraviec, Rusłan Charkievič, Źmicier Kaśpiarovič, Aleś Karnijenka, Pavał Hormaš, Aleś Tarasaŭ i Aleś Žukoŭski. Maładafrontaviec Maksim Viniarski byŭ źbity čatyrma nieviadomymi. Noč pierad “dniom respubliki” ŭ Pieršamajskim adździaleńni milicyi za raskidvańnie ŭlotak pratrymali siabroŭku Maładoha Frontu Irynu Viatkinu.U Viciebsku za razdaču ŭlotak zatrymlivali Natallu Pajmułavu, Alaksieja Kaminskaha, Siarhieja Bielazieku i Alaksieja Alšanku. U Barysavie ŭžo druhi raz za apošni čas palityčnyja chulihany źbili aktyvistku ruchu «Zubr» Tacianu Jasiuk.