Z usioj krainy
BT-2 adčynicca 1 traŭnia
Michaił Padhajny na pres-kanferencyi 30 studzienia zajaviŭ, što druhi nacyjanalny kanał pačnie viaščać z 1 traŭnia. Dziaržavie budzie naležać 51% akcyj. Viaducca pieramovy pra pakupku niekatorych prahramaŭ ORT.
“Pieršy muzyčny” suprać “Chartyi-97”
Kiraŭnictva kanału budzie sudzicca z “Chartyjaj-97”, jakaja źmiaściła na svaim sajcie infarmacyju, što zamiest TV-6 ludzi vymušanyja hladzieć kradzienyja zamiežnyja j rasiejskija klipy. Nibyta z-za hetaha straty “Pieršaha muzyčnaha” skłali 3 tys. dalaraŭ. Vyrašyć sprečku pa-za sudom nierealna.
Šachciorski strajk zabaronieny
Mienski abłasny sud zabaraniŭ salihorskim šachcioram ładzić 1 lutaha papieradžalny piacichvilinny strajk dy zadavoliŭ pazoŭ administracyi “Biełaruśkaliju” da ichnych prafkamaŭ. Pry kancy pasiadžeńnia staršynia Salihorskaha haradzkoha strajkamu Viktar Babajed paviedamiŭ, što rašeńnie pra papieradžalnuju zabastoŭku prymaŭ strajkam, a nia mitynh rabočych.
Zakon “Ab alternatyŭnaj słužbie” rychtujecca
U Administracyi prezydenta byŭ abmierkavany prajekt zakonu “Ab alternatyŭnaj słužbie”. Jon daje mahčymaść alternatyŭnaj słužby nia tolki viernikam peŭnych kanfesijaŭ, ale j maładzionam ź niapoŭnych siemjaŭ. Junaki buduć zaniatyja hramadzka-karysnaj pracaj na čas, udvaja bolšy za termin vajskovaj słužby. Ministerstva abarony prajekt padtrymała. Adnak zakanadaŭcy ciahnuć z pryniaćciem zakonu užo bolš jak 8 hadoŭ.
Niaŭzhodnienyja ŭłady
Staršynia savietu respubliki Alaksandar Vajtovič pryznaŭ, što dziejańni zakanadaŭčaj i vykanaŭčaj ułady Biełarusi ŭ zamiežnaj palitycy byvajuć niaŭzhodnienyja. Prykładam, jak u sytuacyi, kali byŭ pastaŭleny pad pytańnie pryjezd u Miensk rabočaj hrupy PA ABSE na čale z Utaj Capf, a taksama admoŭlena ŭ vizie byłomu kiraŭniku KNH ABSE pasłu Hansu-Hieorhu Viku. Vajtovič adznačyŭ, što vykanaŭčaja ŭłada nie infarmuje parlamentaroŭ ab matyvach svaich dziejańniaŭ.
Novyja pryznačeńni
Jak paviedamlaje pres-słužba Łukašenki, jon daŭ zhodu na pryznačeńnie Anatola Rusieckaha pieršym namieśnikam, a Ivana Załatareviča i Lubovi Siŭčyk namieśnikami ministra pramysłovaści, Eduarda Taŭpianca pieršym namieśnikam, a Piatra Žabka i Alaksandra Sivaka namieśnikami ministra enerhietyki, Uładzimiera Čyhira pieršym namieśnikam, a Valanciny Konanavaj, Uładzimiera Nikałajenki i Michaiła Śviancickaha namieśnikami ministra handlu, Hienadzia Alaksiejenki pieršym namieśnikam, a Alaksandra Hryharava i Michała Juspy namieśnikami ministra sportu i turyzmu. Aproč taho, prezydent daŭ zhodu na pryznačeńnie Ŭładzimiera Adamuški staršyniom Nacyjanalnaha centru pa archivach i spravavodztvie, Hieorhija Daškieviča, Vitala Klablejeva i Raisy Cichanskaj namieśnikami staršyni Homielskaha abłvykankamu. U suviazi z vychadam u adstaŭku Ryhor Kraŭčanka vyzvaleny ad pasady namieśnika ministra handlu. Mikałaj Juškievič byŭ pryznačany namieśnikam staršyni Kamitetu lasnoj haspadarki pry Saŭminie. Pasłom u Vatykanie staŭ Uładzimier Karaloŭ, pasoł Biełarusi ŭ Švajcaryi. Budzie pracavać pa sumiaščalnictvie.
skandał
Masavyja skaračeńni
ŭ Instytucie litaratury
Refarmavańnie Akademii navuk, abvieščanaje novym kiraŭnictvam, pakul vyjaŭlajecca ŭ masavych skaračeńniach. Tak, u Instytucie litaraturznaŭstva zvolnienyja 8 čałaviek — usie, chto pracavaŭ tut na paŭstaŭki ci na čverć. Siarod ich vydatnyja dziejnyja litaraturaznaŭcy Iryna Bahdanovič, Piatro Vasiučenka, Jazep Januškievič dy inš. Bližejšym časam skaračeńni čakajuć i niekatorych “stavačnikaŭ”.
Praca Instytutu litaraturaznaŭstva na pieršy kvartał 2002 h. prafinansavanaja tolki napałovu.
Supracoŭniki Instytutu zhadvajuć, što takaja samaja pa maštabach chvala skaračeńniaŭ musiła prajści na pačatku 90-ch, ale tady sytuacyju vyratavała stvareńnie Skarynaŭskaha centru, kudy pierajšli pracavać mnohija navukoŭcy z Akademii. Darečy, zaraz isnavańnie Skarynaŭskaha centru pad pahrozaj: Ministerstvu adukacyi, u systemu jakoha jon uvachodzić, dadziena ŭkazańnie skaracić kolkaść padviedamasnych strukturaŭ. Vyratavać Skarynaŭski centar moža tolki pieravod pad dach Akademii navuk. Ale i ŭ Akademii, jak bačym, hrošaj nia husta.
Ihnat Čakacki
kłopat tydnia
U Horadni chvareje słon
U Haradzienskim zaaparku pamiraje adziny ŭ Biełarusi słon Surak. Surjoznaj chvaroby ŭ žyvioliny nia vyjavili. Kiepska jamu stała ad razłomaŭ miž palcami na nahach. Słon pamiraje ad staraści. Za karotki peryjad žyviolina straciła bolš za 400 kh i važyć ciapier mienš za 5 ton. Kali Surak byŭ zdarovy, za sutki jon źjadaŭ 80 kh siena, 25 kh bulby, 15 kh kapusty, 12 kh votrubja, stolki ž chleba, 2,5 kh jabłyk i kilo cukru. Ciapier słanu štodzień dajuć antybijotyki, zasmačanyja 2 kh cukru. Cukar prynosiać ludzi, bo zaaparku chranična brakuje hrošaj. Arabskija słany žyvuć u niavoli kala 50 hod, a Suraku spoŭniłasia ŭžo 45. Jaho pryvieźli ŭ Haradzienski zaapark u 1965 h. ź Lajpcyhu.
naviny haspadarskija
Siaredni biełaruski zarobak u śniežni skłaŭ 100,7 dalara. Najbolšyja siarednija zarobki byli ŭ bankaŭskich słužboŭcaŭ (185 dalaraŭ), strachavych ahientaŭ (159), navukoŭcaŭ (141), lotčykaŭ (136) i budaŭnikoŭ (116). Najmienšyja — u kałhaśnikaŭ (48), sacyjalnych rabotnikaŭ (65), kulturnikaŭ (82), mastakoŭ (93) i nastaŭnikaŭ (94). Kab zadavolić svaje minimalnyja naturalnyja patreby, u śniežni čałaviek musiŭ mieć dachodu nia mienš za 62,5, a siamja z 4 čałaviek — nia mieniej za 250 dalaraŭ.
70% nastaŭnikaŭ nie atrymali zarobkaŭ za śniežań. Hrošy spłacili tolki ŭ vialikich haradach. Amal va ŭsich rajonach, dzie niama pramysłovaści, ułady kažuć, što ŭ miascovych biudžetach pusta.
Pensijnaja reforma moža “startavać” užo ŭ lutym, kali ŭrad padtrymaje prapanovu Ministerstva pracy i sacyjalnaj abarony ab padvyšeńni pensijnaha vieku. Padvyšać jaho majuć na 3—6 miesiacaŭ štohod.
Medyčnyja pasłuhi zbolšaha zrobiacca płatnymi. Sami medyki kažuć, što naviedańnie dziaržaŭnaj palikliniki budzie kaštavać nia duža doraha — u siarednim 1—3 tys. rubloŭ. Pa-raniejšamu biaspłatna musiać lačyć hramadzianaŭ z małymi dachodami, dziaciej i ciažarnych žančyn.
Daražeje hramadzki transpart u Miensku — adrazu na 50%. Z 1 lutaha adnarazovy talončyk budzie kaštavać 120, prajazny na adzin vid transpartu — 5400, na dva — 7200, na try — 8400, na čatyry — 9600 rubloŭ. Ilhotniki pa-raniejšamu musiać płacić pałovu ad hetych koštaŭ. Tym časam mienskija tralejbuśniki zapatrabavali, kab u stalicy drukavalisia roznyja talončyki dla aŭtobusaŭ i tralejbusaŭ — maŭlaŭ, tady budzie zrazumieła, kamu i kolki idzie datacyjaŭ ź biudžetu horadu.
Za rasiejski haz Biełaruś budzie raźličvacca pa cenach Smalenskaj vobłaści j płacić nie 30, a 19 dalaraŭ za tysiaču kubametraŭ. Heta ŭ čarhovy raz paabiacała nam Rasieja. Uzamien “Hazpram” atrymaje źnižki za tranzyt hazu praz našuju terytoryju na Zachad.
50 młn. dalaraŭ było vydatkavana z rezervaŭ Nacbanku na stabilizacyju biełaruskaj valuty ŭ pieršaj pałovie studzienia. Ciaham tydnia dalar ZŠA patańnieŭ na 1,5% — ciapier na “čornym” rynku jon kaštuje 1675 rubloŭ.
3470 pradpryjemstvaŭ było pryvatyzavana za apošniuju dziesiacihodku ŭ Biełarusi. Ale bujnych siarod ich było niašmat — ciapier u siarednim na niedziaržaŭnym pradpryjemstvie pracuje 210 čałaviek.
Abutkovaja firma “Salamander” choča mieć svaje aktyvy ŭ viciebskaj fabrycy “Čyrvony kastryčnik”, a firma pa vyrabie bulbaŭboračnych kambajnaŭ “Hryme” — u zavodzie “Lidsielmaš”. Na kantrolny pakiet akcyjaŭ niemcy nie pretendujuć, ale davać zhodu biełarusy pakul nie śpiašajucca.
Kolkaść stratnych pradpryjemstvaŭ u Biełarusi letaś vyrasła z 23,4 da 35,5%. Na Mahiloŭščynie ich 47,4%, na Viciebščynie 46,2%, na Homielščynie 41,3%, na Mienščynie 38,1%, na Haradzienščynie 32,7%, na Bieraściejščynie 31% i 15,3% — u Miensku.
Samazvał na 90 tonaŬ hruzu pačnie vyrablać žodzinski BiełAZ. Najpierš mašynu buduć vykarystoŭvać ŭ karjerach.
Handlary na rynkach pavinny mieć kasavyja aparaty. U Miensku na nabyćcio im dajecca čas da 1 lipienia, u abłasnych centrach — da 1 kastryčnika, u rajonnych — da 1 studzienia 2003 h.
Prava adłučać elektryčnaść za zapazyčanaści ŭ škołach i bolnicach budzie damahacca ad uradu kancern “Biełenerha”. Tolki z pačatku studzienia ahulnaja zapazyčanaść pierad enerhietykami vyrasła na 23% i składaje zaraz 484 młn. dalaraŭ.
Siaržuk Ivanoŭski
Kamientary