Z usioj krainy
Najbolšaja carkva Biełarusi
U 2003 h. u Mahilovie budzie pabudavany pravasłaŭny Spasa-Praabraženski sabor, raźličany na 3500 čałaviek. Budaŭnictva chramu viadziecca pad asabistym kantrolem staršyni abłvykankamu Barysa Batury. Hrošy na budaŭničyja raboty iduć ź dźviuch krynicaŭ: asabistyja achviaravańni viernikaŭ i “dobraachvotna-prymusovyja” ŭkładańni pradpryjemstvaŭ. Na siońnia pamier dapamohi pradpryjemstvaŭ skłaŭ 130 młn. rubloŭ.
Symon Hłazštejn, Mahiloŭ
Płatnaje lačeńnie alkahlizmu
Ź lutaha ŭ asipovickaj paliklinicy pačaŭ pracavać kabinet płatnaha lačeńnia alkahalizmu. Pa słovach medpersanału, klijentaŭ chapaje, bo pasłuhi kaštujuć niadoraha: naprykład, kadavańnie abydziecca ŭsiaho ŭ 20 tys. rubloŭ.
Zarobki naturaj
U Bychaŭskim rajonie zapazyčanaść pa zarobkach vypłačvajuć nie hrašyma, a praduktami. Tak, rabočyja naftabazy atrymali zarobak cukram, kamunalniki — jajkami.
M.R.
Na dziaviaty pavierch – pieški
Z 21 lutaha žychary śvietłahorskich šmatpaviarchovikaŭ vymušanyja padymacca ŭ svaje kvatery na šostyja-dziaviatyja pavierchi pieški. U horadzie adłučanyja 288 liftaŭ. Miascovaja filija arhanizacyi “Homiellift” spyniła absłuhoŭvańnie śvietłahorskich liftaŭ, bo harvykankam 11 miesiacaŭ nie apłačvaje jejnych pasłuh i vinien užo 180 młn. rubloŭ. A karystacca liftami, jakija nie prachodziać rehularnaha techahladu, zabaraniajuć praviły biaśpieki. Kamunalnyja słužby horadu pieraličvajuć “Homielliftu” tyja hrošy, jakija płaciać žychary šmatpaviarchovikaŭ za karystańnie liftami. Ale hetaja suma składaje tolki 18% ad zatrataŭ. Astatniaje musić datavacca ź biudžetu horadu, a tam hrošaj niama.
Vadzim Bołbas, Śvietłahorsk
82-milimetrovaja bulba
Žychary vioski Tareckaŭščyna (Ašmianščyna) na kałhasnym poli znajšli 82-milimetrovuju minamiotnuju minu časoŭ druhoj suśvietnaj vajny. Sioleta heta pieršaja takaja znachodka. Abiasškodzili minu sapiory.
Zamaroziła harełka
Biaz palcaŭ na abiedźviuch nahach zastaŭsia 50-hadovy žychar Astravieččyny. Miascovyja lekary ich amputavali, kab vyratavać žyćcio pacyjentu. Nohi jon admaroziŭ va ŭłasnym domie. Źviazaŭšysia z sarakahradusnaj, viaskoviec niekalki dzion nie vychodziŭ z chaty j nie paliŭ u piečy. Kali skončyłsia harełka, adčuŭ niadobraje i źviarnuŭsia da lekaraŭ.
Marjan Vianhroŭski, Astraviec
Šyła na Myła
Letaś 185 žycharoŭ Bieraścia aficyjna źmianili svaje proźviščy, imiony j imiony pa baćku na inšyja, jašče šaści admovili ŭ hetym. Nia chočuć ludzi być Chudymi, Skudnymi, Baranami, Rumzami i h.d. Zajmieć proźviščy viadomych u śviecie ludziej nie pažadaŭ nichto.
Try pa try
Dniami da 60-ci siabroŭ pašyryłasia bieraściejskaje hramadzkaje abjadnańnie “Bliźniaty — adna siamja”. U horadzie na siońnia siemjaŭ dźvieście ź bliźniatami. Zbolšaha heta dvajniaty. Trojni ŭ Bieraści majuć tolki try siamji.
Ł. Chviedarovič, Bieraście
U vioscy daražej
Amal 1000 smurhoncaŭ padali zajavy ŭ adździeł suviazi, kab im pastavili telefony ŭ 2002 h. Pakul tolki 70 ź ich naźbirali na heta hrošaj. Heta što tyčycca haradzkich abanentaŭ. U vioscy — daražej: stvareńnie adnaho numaru kaštuje 660 tysiačaŭ, adzin kilametar kabielu — 200. Letaś u vioscy ŭstanavili tolki 95 novych telefonaŭ, dyj toje pa starych cenach.
Svarki i zvadki
Najčaściej smurhoncy źviartajucca ŭ milicyju z-za siamiejnych skandałaŭ i bojek. Dva-try razy na tydzień učastkovych vyklikajuć na chatnija “razborki”. Letaś 318 razoŭ u “02” źviartalisia žančyny. Tracina skardziłasia na eks-mužoŭ. Ab tym, što naračonyja bjucca, “słabaja pałova” apaviaščała milicyjantaŭ 79 razoŭ. Niezadavolenaść sužycielami vykazvałasia ŭ 39 zajavach. 35 razoŭ matki skardzilisia na synoŭ, 7 — na dačok, 10 — na adnych i druhich. I tolki 5 razoŭ drenna siabie pavodzili baćki.
Taciana Skarynkina, Smurhoni
Chabar za miesca na mohiłkach
Na Maskoŭskich mohiłkach Miensku chavajuć pa specyjalnym dazvole, adnak mahčymaje i “kamercyjnaje” pachavańnie. Adzinočny ŭčastak aficyjna kaštuje 318 tys. rubloŭ, patrojny — 450 tys. Ale popyt na miescy byŭ nastolki vialiki, što źjaviłasia padpolnaja kasa. Zahadčyka mohiłak aryštavali ŭ momant atrymańnia ad adnaho hramadzianina 300 dalaraŭ. Praz kolki dzion kaleha aryštavanaha dobraachvotna źjaviŭsia ŭ milicyju i raspavioŭ pra 65 faktaŭ atrymańnia hrošaj. “Mechanizm” byŭ prosty: svajakoŭ niabožčyka pryvodzili ŭ daloki kut mohiłak, dzie stajała vada. I jany płacili, kab atrymać lepšaje miesca. Pachavańnie pablizu centralnaj alei kaštavała ad 150 da 300 dalaraŭ. Poźniaje raskajańnie dałakopu nie dapamahło: jaho taksama pasadzili ŭ śledčy izalatar.
Zasudzili RNIEšnikaŭ
Mienski haradzki sud razhledziŭ spravu siabraŭ RNIE Kanstancina Daškieviča j Ihara Solera. Letaś 2 studzienia jany padčas śviatočnaha zastolla ŭsčali bojku z adnapartyjcam Maksimam Brejnieram, žorstka źbili jaho, kolki razoŭ udaryli nažom, a potym trojčy strelili z revalviera. Soler atrymaŭ 15 hadoŭ turmy, Daškievič — 17, bo revalvier byŭ jahony. Na dumku maci zabitaha, pryčynaju śmierci stała žadańnie Maksima pakinuć šerahi arhanizacyi.
B.T.
Troch budzie dastatkova
“U Biełarusi majuć być try telekanały — pieršy, druhi i STV, jaki pavinien pieratvarycca ŭ kanał stalicy i staličnaj vobłaści”. Pra heta zajaviŭ Łukašenka 26 lutaha padčas uzhadnieńnia kandydatury Ryhora Kisiala na pasadu staršyni praŭleńnia ZAT “Druhi nacyjanalny kanał”.
Navicki ŭ adpačynku
Premjer-ministar Biełarusi Hienadź Navicki 27 lutaha pajšoŭ u adpačynak, jaki praciahniecca da 11 sakavika. Adpačyvać premjer planuje na Naračy razam ź siamjoj. Davać rady spravam u hety čas budzie Andrej Kabiakoŭ. Cikava, što Jarmošyn svoj pieršy paśla adstaŭki adpačynak pravioŭ na Kipry.
MAP rekamendavała adnavić
Mižnarodnaja arhanizacyja pracy padtrymała Albierta Jaŭmienava, byłoha načalnika kampresarnaj stancyi jalizaŭskaha zavodu “Kastryčnik” (Asipoviččyna), jaki byŭ zvolnieny 3 hady tamu za admovu ad udziełu ŭ subotniku. MAP, kudy jon źviarnuŭsia sa skarhaj, rekamendavała adnavić Jaŭmienava na pracy z kampensacyjaj stračanaha zarobku.
Łyskaviec u Kalifornii
FBR znajšło biełaruskaha skakuna z tramplinu Andreja Łyskaŭca, jaki admoviŭsia viartacca z Sołt-Łejk-Syty razam ź inšymi alimpijcami. Ahienty daviedalisia, što hety niaŭdačnik Alimpijady žyvy, zdarovy i znachodzicca ŭ Kalifornii. U Andreja da kanca sakavika dziejničaje viza, i jahonaje znachodžańnie na terytoryi ZŠA nie supiarečyć zakonam krainy.
B.T.
Korbana šukajuć
Jak raspaviali siabry źnikłaha Jurasia Korbana, anijakich vynikaŭ jahonyja pošuki pakul nie dali. Pakvaterny abchod dziasiatku mienskich šmatpaviarchovikaŭ i pryvatnaha sektaru blizu Čyžoŭskaha vadaschovišča, adkul byli zafiksavanyja Jurasiovy telefanavańni da maci, nie dapamoh.
Kryminalnaja sprava pa fakcie źniknieńnia Jurasia Korbana ŭžo pieradadzienaja ź Viciebsku mienskim śledčym. Maci Jurasia Korbana taksama pryjechała ŭ Miensk, kab pieradać adkrytyja listy hieneralnamu prakuroru Biełarusi Viktaru Šejmanu i ministru ŭnutranych spravaŭ Uładzimieru Navumavu.
Losam ačolnika “Konturu” cikaviacca i ŭ Kamitecie finansavych raśśledavańniaŭ pa Viciebsku, kudy Juraś Korban 22 studzienia musiŭ źjavicca na dopyt u spravie niepravamocnaha vykarystańnia hrantavych srodkaŭ. U kamitet apošnimi dniami pačali vyklikać Jurasiovych kalehaŭ. Pytajucca ŭ ich, ci viedajuć jany što pra Korbana.
Tym časam źjavilisia źviestki, što baćki Korbana pradajuć jahonuju kvateru, što kala vakzału.
Ihnat Čakacki
udakładnieńnie
Da artykułu “Dziaržaŭnaja złačynca”, nadrukavanaha ŭ “NN” ad 22 lutaha, nieabchodna zrabić kolki ŭdakładnieńniaŭ. Pa-pieršaje, “padarunki” prezydentu, pieradadzienyja ŭ harvykankam, padrychtavała nie Natalla Brel, ich prynieśli žychary Rečycy (napiaredadni Małady Front zaachvočvaŭ ich da hetaha praz ulotki). Pa-druhoje, pieradavała ich nie sama Natalla, a cełaja delehacyja, u skład jakoj uvachodzili pradstaŭniki AHP, Maładoha Frontu, “Zubra”.
naviny haspadarskija
PADATKOVYJA ORHANY Biełarusi majuć namier zmahacca z faktami vypłaty zarpłaty “ŭ kanvertach”. U bolšaj stupieni hetaja baraćba zakranie pryvatnyja pradpryjemstvy, pakolki dziaržaŭnyja takoha, jak praviła, nie praktykujuć. U pryvatnaści, uvaha budzie źviartacca na fakty, kali asobnyja pradpryjemstvy byccam by nie vypłačvajuć zarobku svaim supracoŭnikam.
Pytańnie pra ŭviadzieńnie ŭ Biełarusi adzinaj staŭki padachodnaha padatku znachodzicca ŭ stadyi abmierkavańnia. Hetaja staŭka, u vypadku pryniaćcia, nia budzie adpaviadać rasiejskaj.
PENSII MOHUĆ ZATRYMAĆ u sakaviku. Kab spłacić ich, pakul brakuje hrošaj, bo šmat jakija pradpryjemstvy nia robiać składak u pensijny fond.
ILHOTNYJA KREDYTY na adukacyju ŭ chutkim časie zaprapanujuć studentam biełaruskija banki. Najbolšy kredyt nia budzie pieravyšać 70% ad koštu navučańnia, raźličvacca za pazyku možna budzie 10 hadoŭ.
SIAREDNI ZAROBAK u studzieni skłaŭ 99,3 dalara, ci na 4,5 dalara mieniej, čym u śniežni.
ILHOTY NA PRAJEZD u hramadzkim transparcie skasujuć užo sioleta. Ciapier imi karystajucca bolš za 50 katehoryjaŭ hramadzianaŭ.
2,5 MŁN. AŬTAMABILAŬ zarehistravanyja na siońnia ŭ krainie. U DAI miarkujuć, što ŭ chutkim časie ahulny aŭtapark pavialičycca na 10—15%.
SŁUCKI BROVAR patrapiŭ u sferu intaresaŭ rasiejskaj kampanii “Ačakava”. Rasiejcy ŭžo paabiacali słuččakam novaje abstalavańnie koštam 30 młn. dalaraŭ.
U pasiołku Baravucha kala Navapołacku chočuć stvaryć volnuju ekanamičnuju zonu. Heta maje źmienšyć biespracoŭje ŭ Baravusie, dzie žyvuć zbolšaha byłyja vajskoŭcy.
SKARAČEŃNI projduć na viciebskich pradpryjemstvach. Rabočych televizijnaha zavodu “Viciaź” pamienieje na 420 čałaviek, abutkovaj fabryki “Čyrvony Kastryčnik” – na 125, miasakambinatu – na 185 i h.d. Ahułam skarociać 3200 čałaviek.
TAŃNIEJE CHLEB na ŭschodzie Mahiloŭščyny. Ułady zahadali źnizić ceny ŭ Kryčavie, Klimavičach, Kaściukovičach, kab stvaryć kankurencyju rasiejskaj pradukcyi. Adnačasova na 1% pavialičyŭsia košt muki vyšejšaha hatunku, jakuju pradajuć u inšych rajonach vobłaści.
ZAMOŽNYJA BIEŁARUSY buduć apłačvać 65% sabiekoštu puciovak u sanatoryi, a nie 30%, jak ciapier. Padvyšku tłumačać tym, što niama hrošaj, kab utrymlivać letniki dla dziaciej. Try čvertki z 4 tys. ciapierašnich letnikaŭ patrabujuć terminovaha kapramontu.
MINISTERSTVA JUSTYCYI pastanaviła, što spahnańnie ź imparcioraŭ piva zakładavaha koštu plašak supiarečyć biełaruskamu antymanapolnamu zakanadaŭstvu. Hetaje rašeńnie vyhadnaje najpierš rasiejskim brovaram.
PRYVATYZACYJA “NAFTANU” raspačynajecca 20 sakavika. Pieršymi akcyi pradpryjemstva kupiać jahonyja pracaŭniki. Kožny ź ich moža kupić kaštoŭnych papieraŭ na sumu nia bolej za miljon rubloŭ.
“BIEŁARUŚKALIJ” u studzieni vyrabiŭ pradukcyi na 20% mieniej, čym u śniežni minułaha hodu. Ciapier za miažoj popyt na ŭhnajeńni mały, tamu i ichny ekspart źmienšyŭsia na 17 młn. dalaraŭ.
LITVA z 1 sakavika ŭvodzić abaviazkovaje strachavańnie hramadzianskaj adkaznaści dla ŭładalnikaŭ transpartnych srodkaŭ.
KAMPANIJA “BAŁTYKA” padała ŭ Maskoŭski mižnarodny arbitražny sud pazoŭ ab viartańni joj 10,5 młn. dalaraŭ kredytu, vydadzienaha našamu brovaru “Krynica” na paŭhodu.
Siaržuk Ivanoŭski
kamentar redakcyi
Surjoznaja sprava
10 sakavika ŭradavaja kamisija skančaje pryjom prapanovaŭ varyjantaŭ himnu Biełarusi. I na 10-ha ž zaplanavany alternatyŭny ŭračysty schod hramadzkaści pa pryniaćci himnu. Pradstaŭniki tvorčaj intelihiencyi, navukoŭcy, hramadzkija dziejačy majuć namier vyznačyć toj tvor, jaki stanie, jak miarkujecca, “Dziaržaŭnym himnam Biełarusi paśla źmieny ŭłady”. Škada było b, kali b demakratyčnaja intelihiencyja pastaviłasia da takoje surjoznaje spravy lehkavažna i pachapliva.
Biełaruskija himny viadomyja kožnamu adukavanamu čałavieku: heta himn BNR “My vyjdziem ščylnymi radami”, himn biełarusaŭ śvietu “Mahutny Boža” i himn nacyjanalnaha adradžeńnia “Nie zahasnuć zorki ŭ niebie”. Hetym himnam dziasiatki hadoŭ, jany aśviečanyja kryvioju i malitvami.
Kali ŭradavaja kamisija pojdzie nasupierak čakańniam hramadzkaści i prymie za dziaržaŭny himn pieśniu, za jakoj niama tradycyi, tady histaryčny himn sapraŭdy moh by być jašče raz zaćvierdžany — ale nie na schodzie intelihiencyi, a, naprykład, na Ŭsiebiełaruskim schodzie.
“Hołas dušy” hučyć
“Padpisvaju prośbu ab adnaŭleńni na “biełaruskim” radyjo prahramy “Hołas dušy”, tolki pavažajučy redakcyju hazety, jakaja abrała mienavita takuju formu zvarotu da radyjoŭradnikaŭ. Nasamreč ja patrabuju ad ich najchutčejšaha adnaŭleńnia hetaj adzinaj prahramy, jakuju šče možna słuchać”, — piša nam Vital Košaleŭ ź Miensku. Pad jahonaj prośbaj-patrabavańniem padpisalisia šče 3 čałavieki. Podpisy za adnaŭleńnie prahramy nam dasłali Rehina i Jury Kozak, Taciana j Arciom Aniejčyk i jašče 92 čałavieki ź Miensku i Mienskaj vobłaści. Jan i Vala Patapienki, Rusłan Harodka i jašče 9 mazyranaŭ, Mikałaj i Kamiła Malinoŭskija z Kalinkavičaŭ, Mikoła Žuk, Hienadź Saroka, Viktar Arciemjeŭ i jašče 29 čałaviek z Pružanaŭ vykazvajucca za adnaŭleńnie prahramy. Kazimier Klipa, Zinaida Chichič i jašče 3 čałavieki z Naračy, Michaił, Natalla, Rusłana i Nadzieja Fursy ź Viciebsku, Siarhiej Mačekin, Viktoryja Papova i jašče 5 čałaviek z Mahilova dasłali nam svaje podpisy za adnaŭleńnie prahramy “Hołas dušy”.
Usiaho za miesiac zboru na adras redakcyi pryjšło 2008 podpisaŭ. Dziakujučy hetamu, jak i dziakujučy tym ludziam, što źbirali podpisy ŭ kaściołach, katalickaja prahrama adnaviłasia i hučyć štoniadzielu. Taksama hetym zboram podpisaŭ udałosia pakazać uładam, što hramadztva i paśla vybaraŭ nie razhublenaje, a hatovaje abaraniać svaje pravy i intaresy. Adnaŭleńnie katalickaje prahramy pakazvaje, što ŭłady heta zrazumieli. A toje, chto mienavita maje vieści katalickuju prahramu na radyjo, heta ciapier užo sprava samoha Kaściołu. 5 sakavika hetaje pytańnie budzie vyrašanaje ŭ Pinsku na ŭnutranakaścielnym pasiedžańni. Dziakuj usim, chto ŭziaŭ udzieł u akcyi salidarnaści.
Redakcyja
U Biełaruś pryjedzie Chatami
Pry kancy červienia abo na pačatku lipienia ŭ Biełaruś z aficyjnym vizytam pryjedzie iranski prezydent Chatami. Jon musiŭ pryjechać jašče minułym letam, ale z-za našych vybaraŭ adkłaŭ vizyt. Łukašenka ŭ Tehieranie ŭžo pabyvaŭ. Chatami ciapier pavinien naviedać Miensk chacia b dziela vietlivaści.
S.R.
U Miensku źjavicca “Metro”
Niamieckaja firma “Metro AG” zajaviła ŭ Dziuseldorfie, što planuje pašyryć svaju sietku supermarkietaŭ systiemy Cash&Carry. U absiah investycyjnych zacikaŭleńniaŭ firmy trapili Biełaruś, Ukraina, krainy byłoj Juhasłavii.
yusnews.info
Rabiecie biznes u Kanadzie
Camaja tannaja kraina dla viadzieńnia biznesu — Kanada, a samyja darahija ŭ hetym sensie dziaržavy — Niamieččyna i Japonija. Da takich vysnovaŭ pryjšła kansałtynhavaja kampanija KPMG, što daśledavała ŭmovy dla biznesu ŭ pramysłova raźvitych krainach.
Českaja kampensacyja achviaram HUŁAHu
Česki ŭrad źbirajecca vypłacić kampensacyi hramadzianam, jakich kamunistyčnyja ŭłady Čechasłavaččyny zasudzili ŭ 1948—54 h. da prymusovych rabot u šachtach i kamieniałomniach. Da siońniašniaha dnia dažyli kala siami z pałovaj tysiačaŭ achviaraŭ represijaŭ. Vypłaty atrymajuć i tyja čechasłavackija hramadzianie, jakija trapili ŭ saviecki HUŁAH. Pa vajnie savieckija ŭłady departavali ŭ Sajuz kala 7 tys. hramadzianaŭ. Siarod ich była tolki jakaja tysiača etničnych čechaŭ, a ŭ liku astatnich šaści tysiačaŭ byli j našy surodzičy, siarod jakich paetka Łarysa Hienijuš ź siamjoj.
Jazapat Zmysła
Kamientary