Z usioj krainy

Z usioj krainy

BPSM siadzić biez zarobkaŭ

Cud zahadaŭ BPSM na praciahu 10 dzion vypłacić skaročanaj supracoŭnicy Haradockaha rajkamu hetaj arhanizacyi Alenie Paršonak zatrymany zarobak, naležnuju pa skaračeńni dapamohu i kampensacyju za praterminavany płaciež. Supracoŭniki aparatu BPSM na Viciebščynie ŭžo 4 miesiacy nie atrymlivajuć zarobkaŭ. Finansavyja prablemy pačalisia paśla pierarehistracyi, kali BPSM była dazvolenaja kamercyjnaja dziejnaść. Tym, chto “byŭ za baćku” na apošnich vybarach, prapanavali zarablać samastojna. Kiraŭnictva BPSM nakiravała prajekt rašeńnia ab finansavańni arhanizacyi praź Minfin z srodkaŭ rezervovaha prezydenckaha fondu, ale “baćka” nie śpiašajecca padpisvać dakument. U strukturach BPSM rychtujucca da dalejšych skaračeńniaŭ.

Michał Čarvinski, Viciebsk

Druhi tur konkursu himnaŭ

9 krasavika ŭ kancertnaj zale Biełdziaržfilarmonii adbyŭsia druhi tur konkursu na Dziaržaŭny himn RB. U vykanańni duchavoha arkiestru, a taksama arkiestru i choru kamisija prasłuchoŭvała 3 varyjanty muzyki i 4 — tekstu, bo na melodyju Nieściera Sakałoŭskaha praciahvajuć pretendavać dva varyjanty słovaŭ — Uładzimiera Karyzny i Źmitraka Marozava. Jany nia duža roźniacca adzin ad adnaho. U varyjancie Karyzny znakamita-rabskaje “z bratniaju Ruśsiu” zachavałasia ŭ pieršym radku, a Marozaŭ pieranosić zhadku pra Ruś u prypieŭ: “Vielič braterstva, postup adziny / Z nami advieku mahutnaja Ruś”. Razam ź imi razhladajucca “Radzima maja darahaja” i “Krasuj, Biełaruś”. Konkurs praciahvajecca.

B.T.

Pamierła najstarejšaja žycharka Ziamli

U sakaviku pamior samy stary čałaviek Ziamli — žycharka Pinsku Ŭścińnia Žarnasiek (“NN” pisała pra jaje sioleta ŭ № 8 ad 22 lutaha). Joj było 116 hadoŭ. Na siońnia ŭ Pinsku žyvuć čatyry kabiety, starejšyja za 100 hadoŭ. Praz tydzień da ich dałučycca jašče adna.

Ciapier samaj staroj žycharkaj planety zastałasia 114-hadovaja japonka Kamata Chonha. Horad Kahasyma — radzima Kamata Chonha — słavicca doŭhim viekam svaich nasielnikaŭ. Sama ž Kamata Chonha pierakananaja, što pryčyna jejnaha doŭhažycharstva — toje, jak jana charčujecca. Ulubionyja stravy japonki — sasymi (tonka narezanaja syraja ryba), rysavaje vino j zialonaja harbata. Vyznačajecca Kamata Chonha j admysłovym režymam: dvoje sutak zapar jana śpić, a potym dvoje sutak nia śpić.

Cikava, što naahuł samym starym mužčynam Ziamli byŭ taksama japoniec — Sihiesijo Idzumi, narodžany ŭ 1865 h. Jon skanaŭ u 120-hadovym vieku ad zapaleńnia lohkich. A siarod kabietaŭ najdaŭžej pražyła na śviecie francužanka Žanna Kalman: jana pamierła ŭ 1997 h., pražyŭšy 122 hady i 8 miesiacaŭ.

Hierantolahi (navukoŭcy, što zajmajucca prablemami stareńnia žyvych arhanizmaŭ) kažuć, što ŭ CHCHII st. siaredniaja praciahłaść čałaviečaha žyćcia dasiahnie 150 hadoŭ. Navukoŭcy ćvierdziać, što asnoŭnyja prablemy, jakija pieraškadžajuć siońniašnim pensijaneram hetak doŭha žyć, — heta paleńnie, schilnaść da tłustaje ježy j niedastatkova aktyŭny ład žyćcia.

Arkadź Šanski

Pierasiadziem na “Boinhi”

Užo sioleta ŭ biełaruskim avijaparku mohuć źjavicca sučasnyja samaloty zachodniaj vytvorčaści, kaža staršynia Dziaržkamitetu pa avijacyi Fiodar Ivanoŭ. Takija łajnery adpaviadali b novym patrabavańniam Mižnarodnaj arhanizacyi cyvilnaj avijacyi pa ŭzroŭni šumu. Samaloty (chutčej za ŭsio — “Boinhi- 737-500”) buduć nabyvacca ŭ lizynh, z pryciahnieńniem investycyjaŭ. Pary-trojki łajneraŭ chopić, kab adnavić nieabchodnyja rejsy. A pakul što “Biełavija” vymušana spyniła paloty ŭ šerah eŭrapiejskich stalicaŭ, u pryvatnaści Paryž i Vienu.

Safiju nie addali pravasłaŭnym

Połackaja Safija nia budzie pieradadzienaja pravasłaŭnaj carkvie. Pavodle słovaŭ dyrektara Połackaha historyka-kulturnaha zapaviednika Mikałaja Ilnickaha, sabor cudoŭna funkcyjanuje i ŭ ciapierašnim statusie: muzej letaś naviedali 273 tysiačy turystaŭ, i hetaja ličba štohod uzrastaje na 15—20 tys. U najbližejšy čas tut maje adkrycca XVI Mižnarodny festyval staražytnaj i sučasnaj kamernaj muzyki. Pravasłaŭnyja ž słužby ŭ Safii buduć ładzicca tolki ŭ vialikija relihijnyja śviaty.

Budzie pomnik partyzanam

Pomnik biełaruskim partyzanam paŭstanie na skryžavańni Partyzanskaha praspektu j vulicy Jenisiejskaj u Miensku. Jon budzie mieć vyhlad kalony, zavieršanaj symbaličnaj skulpturaj Biełarusi-partyzanki.

Złavili rabaŭnika

Zatrymany adzin z rabaŭnikoŭ ofisu Zadzinočańnia biełaruskich studentaŭ. 15 lutaha dvoje bandytaŭ uvarvalisia ŭ ofis ZBS, źbili supracoŭnikaŭ dy skrali kamputarnuju techniku. Milicyjanty, jakija raśśledujuć hetaje złačynstva, kažuć, što zatrymańnie druhoha bandyta — tolki sprava času.

B.T.

U “Krynicy” apisali prynter

U minuły čaćvier u redakcyi časopisu “Krynica” źjaviŭsia padatkovy inspektar, kab apisać majomaść za pazyki. Na 1 krasavika “Krynica” zavinavaciłasia dziaržavie 63 tysiačy rubloŭ. Za hetuju mizernuju sumu byŭ apisany redakcyjny prynter. Ciapier jon farmalna naležyć padatkovym orhanam, choć i znachodzicca ŭ redakcyi: supracoŭniki mohuć im karystacca, ale nia mohuć pradać.

Hałoŭnaja redaktarka “Krynicy” Ała Kanapielka kaža, što hrašovyja prablemy ŭźnikli tamu, što redakcyja dahetul nie atrymała abiacanaje dziaržaŭnaje datacyi. Finansavańnia, jakoje atrymlivaje “Krynica”, ledź staje na vydańnie numaroŭ časopisu. Sami supracoŭniki zarobku nie atrymlivajuć. “My majem abaviazki pierad čytačami, tamu pracujem zusim biez zarpłaty”, — zaznačyła spn.Kanapielka.

Arkadź Šanski

BURY VUHAL pačnuć zdabyvać u Pietrykaŭskim rajonie — miljon tonaŭ u hod. Zapasy tamtejšaha radovišča hieolahi aceńvajuć niedzie ŭ 35 młn. tonaŭ.

TATALNUJU PRAVIERKU KVATERAŬ ładziać ułady Homielu. Vyjaŭlajuć, ci nie zdajucca pamiaškańni kvatarantam. Siońnia aficyjna zdajuć svaje kvatery tolki 299 homielcaŭ, tady jak nasamreč hetym zajmajucca 3—4 tys. čałaviek. Ułaśnikaŭ “lišnich” kvateraŭ abminać rehistracyju prymušajuć vialikija padatki — pa 1 bazavaj vieličyni (ciapier 10 tys. rub.) za kožny pakoj.

3-MILJONNY TELEFONNY ABANENT źjaviŭsia na hetym tydni ŭ Biełarusi. Ustalavańnia telefonu čakajuć jašče kala 440 tys. biełarusaŭ.

NA 25% BOLEJ daviadziecca płacić za śviatło. Ciapier kilavat-hadzina elektraenerhii ŭ damach z hazavymi plitami kaštuje 30, a ŭ damach z elektraplitami — 21,8 rub. Adnačasova ŭ źviazku ź inflacyjaj praindeksavanyja kamunalnyja taryfy, tamu ŭ krasaviku aciapleńnie, lifty, haračaja vada i vyvaz śmiećcia padaraželi na 4%.

SPRAVU AB BANKRUCTVIE “Biełaruskaha biržavoha banku” rychtuje haspadarčy sud. U “BBB” zamała ŭłasnaha kapitału, što supiarečyć zakanadaŭstvu. Miesiac tamu banku zabaranili prymać novyja ŭkłady ad nasielnictva, a na minułym tydni pad zabaronu patrapili taksama aperacyi z pradpryjemstvami.

AD 50 DA 100 TYS. RUBLOŬ ŠTRAFU buduć davać kiraŭnikam kałhasaŭ i saŭhasaŭ, u jakich na sielhasmašynach niama śpidometraŭ. Ad 50 da 200 tys. rubloŭ “śviecić” haspadarkam, što nia zdolejuć dać spravazdaču, kolki paliva i jak jany vykarystali. Hetak dziaržkantrol i milicyja sprabujuć spynić kradziažy benzynu i salarki padčas pasiaŭnoj.

ŽYCHARAM MAŁYCH VIOSAK (da 10 čałaviek) u “čarnobylskaj” zonie chutka prapanujuć źjechać u bujniejšyja nasielenyja punkty, kab skaracić sacyjalnyja vydatki. Aproč taho, urad maje dać ilhoty pa padatkach usim investaram u zabrudžanyja rajony, kab stvaryć novyja pradpryjemstvy i papoŭnić miascovyja biudžety.

NOVYJA MARŠRUTY prapanuje biełaruskaja čyhunka. Z krasavika pačaŭ chadzić ciahnik Miensk—Talin, naščadak znakamitaj “Čajki”, z 3 červienia stvarajecca rejs vahonu Horadnia—Pieciarburh, a z 5 červienia — ciahnika Bieraście—Miensk—Baku.

NA 2,5% PADARAŽEŁA HAREŁKA. Ahułam z pačatku hodu jaje košt uzros užo na 10%.

ČATYROCHPAŁOSNAJ zrobicca ŭsia trasa Bieraście—Miensk—miaža Rasiei. Na rekanstrukcyju spatrebicca bolej za 22 młn. dalaraŭ. Pracu raźličvajuć skončyć da 2005 h.

40 MŁN. DALARAŬ skłała ŭ pačatku krasavika zapazyčanaść pa zarobkach. Najbolš zavinavacilisia svaim pracaŭnikam kałhasy (16 młn. dalaraŭ), pramysłovyja pradpryjemstvy (11,5 młn.) i saŭhasy (5,1 młn.).

LEKI PA LHOTNYCH CENACH na Mahiloŭščynie pradajuć tolki ŭ ekstrannych vypadkach, bo biudžet vobłaści zavinavaciŭsia tutejšym farmaceŭtam 650 tys. dalaraŭ. Ahułam prava na lhotnyja medykamenty maje tracina žycharoŭ rehijonu.

REHIJANALNY PADATAK na ŭtrymańnie infrastruktury na Viciebščynie pavialičyŭsia z 2 da 3%. Hrošy źbirajuć na “Dažynki”, što sioleta adbuducca ŭ Połacku.

SKASAVANYJA LICENZII investycyjnych fondaŭ “Dajnova-Invest” i “Majski”. Fondy mielisia źbirać u nasielnictva pryvatyzacyjnyja čeki “Majomaść” i mianiać ich na akcyi pradpryjemstvaŭ. Adnak apošnim časam hety biznes syšoŭ na ništo: dziaržava dazvalała pryvatyzavać tolki nieperspektyŭnyja pradpryjemstvy, u siarednim na adnu akcyju prypadała kala 15—20 rubloŭ dyvidendaŭ, tamu bolšaść ludziej svaich “vaŭčaraŭ” ŭ fondy nia nieśli.

Siaržuk Ivanoŭski

Achviary pasiaŭnoj

Ad pačatku pasiaŭnoj užo zahinuli 6 viaskoŭcaŭ

U Małaryckim i Dobruskim rajonach traktarystaŭ zaciahnuła nieabharodžanym kardannym vałam, na Hancaviččynie adzin niebaraka zavodziŭ ruchavik z “puskača” pry ŭklučanaj pieradačy, a ŭ Pinskim rajonie mechanizatar vyvaliŭsia z kabiny traktara i trapiŭ pad kultyvatar. U Rečyckim rajonie i na Mahileŭščynie kałhaśniki patrapili pad koły techniki pa nieaściarožnaści. Vynik ža va ŭsich vypadkach adzin: zahinuli ludzi.

U departamencie pa achovie pracy padličyli, što kožny miljon tonaŭ zbožža “kaštuje” 7—8 žyćciaŭ viaskoŭcaŭ. Pryčyny viadomyja: kałhasy i saŭhasy nia majuć hrošaj, kab davieści techniku da ładu, i čaściakom vypuskajuć u pole traktary, hruzaviki i kambajny biez aharodžańniaŭ, blakirovak dy jašče i z sapsavanymi tarmazami. “Ekanomiać” taksama na specvopratcy, navučańni technicy biaśpieki, na štodzionnych medyčnych ahladach. Dyj potym, ci nie ŭ pałovy “kałhasnych” achviaraŭ daktary kanstatujuć stan mocnaha atručańnia alkaholem.

S.I.

futboł

Dvanaccaty — dvanaccataha

U piatnicu 12 krasavika raspačynajecca 12-y čempijanat krainy

BT źbirajecca całkam tranślavać matč pieršaha turu “Dynama” (Miensk) — “Homiel” (pačatak u 18.55). Niekatoryja skažuć, što naš čempijanat małacikavy: kudy jamu da Lihi čempijonaŭ. Adnak majem toje, što majem, i naš futbolny čempijanat — adna z prajavaŭ našaha žyćcia. Jon nia moža byť našmat lepšym abo našmat horšym, čym inšyja prajavy. Kamu nie padabajecca — niama prablemaŭ, jość inšyja televizijnyja kanały (jak, ułasna, i inšyja krainy).

My ŭvajšli ŭ druhoje dziesiacihodździe niezaležnaj biełaruskaj futbolnaj historyi. Za pieršyja dziesiać hadoŭ adbyłosia 11 čempijanataŭ, bo dva čempijanaty, ŭ 92-m i ŭ 95-m, byli ŭsiečanyja — dziela taho kab spačatku pierajści na systemu vosień-viasna, a potym viarnucca znoŭ da zvykłaj systemy.

Hetym razam buduć hulać 14 kamandaŭ, jak i letaś. Adnak “na vylet” zaplanavanaja tolki adna kamanda.

Namiecili adnavić pieršapačatkovuju kolkaść (16). Zamnoha ŭvahi nadajecca ŭ nas pošukam aptymalnaj kolkaści kamandaŭ. Kali heta sapraŭdy navukovy pošuk i kali pierajšli byli na 14, dyk tre było spynicca, “nabrać statystyku” za niekalki sezonaŭ, kab potym praanalizavać stan spravaŭ. A tak vyhladaje na zvyčajnuju baraćbu intaresaŭ. Tym bolš što letašni čempijanat, — moža, praŭda, tut prostaje supadzieńnie, — vyjšaŭ samym niepradkazalnym siarod usich papiarednich.

Šmat havaryłasia pra niejkuju nienaturalnaść minułahodniaha čempijonstva “Biełšyny”. A daremna. Narmalny ŭ nas čempijon. Škada tolki, što pa inšych kamandach razbryłasia pałova jaho čempijonskaha składu. Ci budzie kamu hulać u Eŭropie?

Najlepšyja šancy ŭ sioletnim čempijanacie majuć mienskaje “Dynama” (trener Małafiejeŭ) dy barysaŭskaje BATE (kamanda nabyła kolki dobrych futbalictaŭ). Zrešty, u BATE trener taksama vydatny.

A.U.