Z usioj krainy

Z usioj krainy

Biełaruskamoŭnaja kaviarnia

U Horkach zapracavała biełaruskamoŭnaja dziciačaja kaviarnia. Jaje adčyniła Aršanskaja supołka TBM razam z horackaj žanočaj arhanizacyjaj “Lubava”. Ułady biaspłatna dali pad kaviarniu pusty budynačak. Niedziaržaŭnyja abjadnańni adramantavali pamiaškańnie i ładziać tam, jak raskazvaje hramadzki dziajač z Voršy Aleś Šutaŭ, narodnyja śviaty, spektakli dy inšyja zabaŭki dla małodšych dzietak i padletkaŭ.

Pavodle “Našaha słova”

Udavu paškadavali

Smurhonskaja milicyja ŭziałasia razhaniać babulek, što handlujuć la bazaru jajkami, małakom, morkvaj, jabłykami, nie zapłaciŭšy za miescy. Babulki paŭciakali, tolki adna zastałasia. Kazała: “Mnie treba aharodžu mužu-niabožčyku stavić, a pensija małaja. Nikudy nie pajdu”. I milicyjanty adstupilisia.

Buduć mabilniki

U chutkim časie ŭ Smurhoniach źjaviacca mabilniki. Sotavaja sietka achopić horad i častkova rajon. Ustalavańnie aparata budzie kaštavać prykładna 200 tys., abanentnaja płata — 15—17 tys. u miesiac.

Straciŭ prytomnaść

Dniami la pošty sabralisia ludzi: hladzieli, jak “chutkaja” zabiraje čałavieka z akryvaŭlenaj hałavoj, što raptam straciŭ prytomnaść, upaŭ i pabiŭsia. Jaho advieźli ŭ špital. Pieraviazali hałavu i adpuścili. Chaciełasia b skazać “dachaty”, dy hety niedareka — bomž. U jaho znajšli vošy i karostu. Ale hetych chvarob jamu nia vylečyli. Bo ŭ nas niama sanprapusknika (jak u Horadni ci ŭ Miensku). Voś i chodzić jon pa horadzie dy čuchajecca.

Taciana Skarynkina, Smurhoni

Łamanosaŭ pad sudom

Suprać dyrektara Baranavickaj uzbujnienaj drukarni Jaŭhiena Łamanosava ŭzbudzili kryminalnuju spravu. Vinavaciać jaho ŭ kradziažach u asabliva bujnych pamierach.

Rusłan Raviaka, Baranavičy

“02” nie pracuje

U Kobryni niekalki sutak maŭčała častka telefonaŭ rajadździełu milicyi. Adłučyli ich, bo milicyjanty vinnyja vuzłu elektrasuviazi 1,6 młn. rubloŭ.

Batarei łopnuli

Tysiača rubaŭ batarejaŭ spatrebicca, kab adnavić aciaplalnuju systemu ŭ žyłych damach Pinsku paśla avaryi. U sietkach rezka ŭźniaŭsia cisk, avaryjnaja ž aŭtamatyka ź nieviadomaj pryčyny nie spracavała.

Bomby kala Strelny

Kala vioski Strelna (Janaŭščyna) laśnik znajšoŭ dźvie 25-kilahramovyja avijabomby časoŭ druhoj suśvietnaj vajny. Pryjechali sapiory i znajšli pobač jašče 9 bombaŭ. Usie jany byli ŭzarvany na miescy.

Novy pravajder

Na Bieraściejščynie źjaviŭsia novy Internet-pravajder — “Hi Technology Jevolution HTE”. Taryfy ŭ jaho mienšyja za “biełpakaŭskija”, adnak karystalnikam z vobłaści jašče davodzicca dapłačvać za mižharodniaje złučeńnie ź Bieraściem.

I.Chviedarovič, Bieraście

Na Lenina z małatkom

Zrujnavać usie pomniki Leninu dy pasadzić na ich miescy drevy j kvietki vyrašyŭ adzin z žycharoŭ Voršy. Pieršym abjektam napadu stałasia skulptura na płoščy pierad Pałacam kultury lnokambinatu. Pastament tam nievysoki, i złamyśnik uźlez na jaho dy hachnuŭ bronzavamu Illiču małatkom pa śpinie. Ale tut prybiehli milicyjanty i nie dali jamu davieści spravu da kanca. Jak vyśvietliłasia, zatrymany Š. — čałaviek psychična chvory dy nieadnarazova sudzimy. “Śledčaha pa asabliva važnych spravach daŭno minułych časoŭ”, jak jon siabie nazyvaje, adpravili na lačeńnie ŭ Lepiel.

Usio nie supakojacca

Stancyjny prypynak Pahost na čyhunačnaj linii Miensk—Vorša pierajmienavali ŭ Soniečny. Vioska, što mieścicca pobač, pakul zastałasia Pahostam.

Viktar Lutynski, Vorša

I ź miortvych, i z žyvych

Z 20 sakavika z tych, chto traplaje ŭ stacyjanar Klimavickaj CRB i sielskich učastkovych bolnicaŭ, biaruć hrošy za paścielnuju bializnu i spodniaje. Pry žadańni pacyjent moža ŭziać usio heta z chaty. Pasłuhi patolahaanatamičnaha adździaleńnia taksama płatnyja: uskryćcio mužčynskaha trupa — 960 rub., žanočaha — 1280; apranańnie i vydača mužčynskaha trupa — 2879 rub., žanočaha — 3519 rub.

“Rodnaja niva”, Klimavičy

Milicyja razahnała viaskoŭcaŭ

U Voršy milicyjanty razahnali stychijny rynak małočnych praduktaŭ, jaki štoranicy razhortvaŭsia la prystupak pierachodnaha mostu na Pryvakzalnaj płoščy. Siudy na pryharadnych ciahnikach źjaždžalisia ludzi z navakolnych viosak, źbiralisia pakupniki. Trochlitrovy słoik małaka tut možna było kupić za tysiaču rubloŭ. Taki handal vyhadny i dla viaskoŭcaŭ, bo Aršanski małakazavod prymaje małako pa nizkich cenach, a hrošaj davodzicca čakać 3—4 miesiacy. Viaskoŭcy paśla razhonu handlujuć na samim moście, dzie ich pakul nichto nie čapaje. Raniej aršanskija ŭłady spynili handal tannym chlebam, jaki sa Smalensku pryvoziŭ pryvatny pradprymalnik. Rasiejski chleb kaštavaŭ na sto rubloŭ mieniej za aršanski.

Zarobki — miasam

U Voršy chodziać čutki, što chutka zarobki pačnuć vypłačvać admysłovymi talonami na ajčynnyja tavary. A pakul što na naturalnuju apłatu — miasnymi kanservami — pieraviedzieny kalektyŭ Aršanskaha miasakambinatu.

Michał Čarvinski, Viciebsk

Hłyboki śled
na ziamli

Jość ludzi, jakija za svajo žyćcio pakidajuć hłyboki śled na ziamli dziela słužeńnia svajmu narodu i na jaho karyść. Da takich ludziej možna adnieści i Apanasa Cychuna, zasłužanaha nastaŭnika Respubliki Biełarusi, piśmieńnika, historyka i aktyŭnaha hramadzkaha dziejača, jakomu 5 traŭnia spoŭnicca 92 hady.

U svaich vieršach Apanas Cychun bičuje tych, chto schilny parušać našu maral, pjanstvuje, žyvie za košt ašukanstva ci svaimi pavodzinami rujnuje hramadzki paradak, razburaje siamju, pieraškadžaje ludziam narmalna žyć i pracavać.

Apanas Piatrovič naradziŭsia ŭ sialanskaj siamji ŭ vioscy Kuncaŭščyna, što ŭ Haradzienskim rajonie. Bolš za paŭstahodździa nastaŭničaŭ, udzielničaŭ u druhoj suśvietnaj, maje ŭznaharody. Niahledziačy na invalidnaść i hady, Apanas Cychun zachavaŭ fizyčnuju i tvorčuju zdolnaść, zachaplajecca ihroj na skrypcy, jakoj mnohija dziesiacihodździ viesialiŭ i praciahvaje viesialić ludziej.

Illa Barysaŭ, Skidziel

Biełarusa vykrali
ŭ Murmansku

Ceły tydzień, z 26 sakavika da 3 krasavika, biełaruski pradprymalnik prasiadzieŭ zamknionym u padvale domu vioski Umba Murmanskaj vobłaści, pakul nia zdoleŭ vybracca i źviarnucca ŭ milicyju. Jon zajaviŭ, što jaho pasadzili pad zamok dva nieznajomyja, jakija dapamahali jamu zbyć zakupleny na radzimie tavar. Pierakanaŭšy paciarpiełaha, što Umba — vialikaje bahataje pasielišča, ašukancy pryvieźli jaho ŭ zakinutuju viosku na bierazie Biełaha mora, adabrali hrošy i začynili ŭ lochu.

Zaprašajuć studentaŭ z SND

Rasieja choča pryciahvać bolš hramadzian SND u rasiejskija VNU. Pačynajučy z 2003 h. planujecca vydzialać 1000 dziaržaŭnych stypendyj dla hramadzian krain SND, jakija chočuć vučycca ŭ rasiejskich universytetach.

Zamierzłyja ŭ krasaviku

Za minułyja vychadnyja ŭ Maskvie naśmierć zamierźli dva čałavieki. Takim čynam, kolkaść achviaraŭ choładu ŭ Maskvie z kanca vieraśnia 2001 h. dasiahnuła 397 čałaviek.

Pavodle Internetu