Nieprymalnyja idei

Nieprymalnyja idei

Dyskusija pra novyja ŭzajemaadnosiny apazycyi i ŭładaŭ, što pačałasia na staronkach “NN”, pierakinułasia ŭ inšyja vydańni i patrabuje kamentaru redakcyi.

Siarhiej Dubaviec, nahadajem, šukaŭ realistyčnych šlachoŭ pierachodu ad śmiarotnaje bojki ŭłady i apazycyi da cyvilizavanaha spabornictva. Što padobnaja evalucyja nie mahła b adbycca biez adpaviednych krokaŭ nasustrač z boku ŭładaŭ, vidavočna. “Niechacia nasustrač”, — tak i nazyvaŭsia pieršy kamentar Dubaŭca na hetuju temu. Lepšaha (dla intaresaŭ nacyi, a nie pryvatnaha interasu prezydenta A., apazycyjanera B. i žurnalista V.) raźvićcia padziejaŭ aŭtar na hetym etapie nia bačyŭ.

Kamentatar “Biełorusskoj diełovoj haziety” paviarnuŭ sprečku inšym bokam. Palemika, na jahonuju dumku, vyjaviła “novuju alternatyvu”: z Łukašenkam, ale biez Rasiei abo z demakratyjaj i rynkam, ale z Rasiejaj. Jon robić vybar na karyść apošniaha varyjantu i śćviardžaje, što “Dubaviec hatovy źmirycca ź pieršym”.

Takaja alternatyva isnuje tolki ŭ hałovach idealistaŭ-rusafiłaŭ.

Maskvu cikavić stratehičny kantrol nad ekanomikaj, infarmacyjnaj i kulturnaj prastoraj krainaŭ SND. Dziela jaho Kreml paśladoŭna padtrymlivaŭ siły, dalokija ad demakratyi, rynku, a časta i zdarovaha hłuzdu — ukrainskich i małdaŭskich kamunistaŭ, abchaskich nacyjanalistaŭ, biełaruskich łukašystaŭ, prydniaproŭskich mafijozi. Rasieja nikoli nie vyjaŭlała žadańnia macavać demakratyju i rynak u krainach SND. Bo demakratyja i rynak, jak słušna zaŭvažaje kamentatar “BDH”, pryvodziać da ŭmacavańnia suverenitetu. Što nie ŭvachodzić u plany Maskvy. Dzie rasiejski ŭpłyŭ mienšy (Prybałtyka, Centralnaja Eŭropa), tam rynkavaja ekanomika raźvivajecca bolš paśpiachova.

Dalejšaja intehracyja Biełarusi i Rasiei aznačała b pieradzieł miežaŭ. A prychod rasiejskaha kapitału ŭ Biełaruś na jahonych umovach pryvioŭ by da rezkaj sacyjalnaj i ekanamičnaj destabilizacyi. Dla biełaruskich viarchoŭ, tutejšych biznes-elitaŭ, hramadztva Biełarusi ŭ cełym, vialikich dziaržavaŭ — pry tych ci inšych niuansach — takija scenary nieprymalnyja. Heta vielmi važny kansensus, jaki akurat i daje vialikija šancy raźvićciu rynku i demakratyi ŭ krainie. Pra toje, jak vykarystać hety kansensus, i viałasia havorka ŭ “NN”. Niahledziačy na inercyju postsavieckaha myśleńnia i aktyŭnaść revanšystaŭ, taki kansensus z kožnym palityčnym sezonam pramaloŭvajecca ŭsio bolš vyrazna, vyvodziačy palityčnaje žyćcio z tupikoŭ “abo-abo”, dajučy apazycyi šyrokuju palitru vybaru, a hramadztvu — kaštoŭnaje adčuvańnie novaha balansu siłaŭ.