Lustra dzion

Lustra dzion

Jazep Siaredzič: “U “Narodnaj voli” bolš siłaŭ,  čym było ŭ “Svabody”

“Narodnaja vola”, centralnaja niezaležnaja hazeta krainy, viadzie až try sudovyja spravy. Jany mohuć značna pahoršyć jaje finansavy stan, ale hałoŭny redaktar Jazep Siaredzič nastrojeny pa-bajavomu.

Suprać hazety padali ŭ sud… sudździ z Žodzina Alina Kłus i Łarysa Fralinkova, namieśnica staršyni Mienskaha haradzkoha sudu Miensku Tamara Złobič i hałoŭny lekar 10-j mienskaj bolnicy Alaksandar Bałakiraŭ.

Razhlad spravy sudździaŭ z Žodzina musić raspačacca 29 lipienia. Jany vinavaciać redakcyju i aŭtara artykułu “Svavolle” Ŭładzimiera Ivanova ŭ “raspaŭsiudzie niepraŭdzivych źviestak” dy patrabujuć kampensacyi — piać miljonaŭ rubloŭ z redakcyi i dva miljony z aŭtara.

Doktar Alaksandar Bałakiraŭ sudzicca z hazetaj i žurnalistkaj Maryjaj Ejsmant “za abrazu honaru i hodnaści”. Jon spadziajecca atrymać z “Narodnaj voli” 10 młn. rubloŭ, a z žurnalistki — miljon.

Seryja publikacyj byłoha aŭtara “Narodnaj voli” Siarhieja Navojeva ŭ 2000 h. stała pryčynaju j sudovaha isku Tamary Złobič (raniej jana pracavała ŭ Centralnym sudzie stalicy). Jana imkniecca spahnać z “Narodnaj voli” 5 młn. rubloŭ.

Užo miesiac aryštavany rachunak “Narodnaj voli”, ale hazeta nie źmianšaje peryjadyčnaści svajho vychadu. Hałoŭny redaktar “Narodnaj voli” Jazep Siaredzič upeŭnieny, što “nijakaj surjoznaj pahrozy dla hazety nie isnuje”. Pavodle jahonych słovaŭ, “Narodnaja vola” nie parušaje zakanadaŭstva, tamu ŭsie “pravakacyi z boku ŭładaŭ pacierpiać krach, jany nia majuć nijakich šancaŭ”. Siaredzič škaduje tolki, što aryštavany rachunak hazety i jejnyja hrošy nie pracujuć, ale nia robić z hetaha trahiedyi.

“Kali ŭłady dumajuć paŭtaryć vopyt Šejmana — tady redaktar “Svabody” nie znajšoŭ hrošy, kab vypłacić štraf, — u ich ničoha nia vyjdzie, — kaža Siaredzič. — U “Narodnaj voli” ciapier bolš siłaŭ, čym było ŭ “Svabody”. Našaja aŭdytoryja macniejšaja, dyj čas užo nia toj. Čas pracuje nie na Šejmana, a na zaŭtrašni dzień Biełarusi. Redakcyja isnavała i budzie isnavać. Kali my źvierniemsia da našych čytačoŭ, choć by da padpisčykaŭ, i kožny ź ich dašle pa 1 tysiačy rubloŭ, my zmožam pakryć vydatki”.

Pozvy ŭ sud redaktar “Narodnaj voli” nazvaŭ “narmalnaj źjavaj”: “Što heta za hazeta, jakaja nie padymaje vostrych pytańniaŭ?!” Jon upeŭnieny, što i ŭ siońniašniaj sytuacyi “treba rabić narmalnuju hazetu i ničoha nie bajacca”.

Mahčyma, što ŭłady, zakryŭšy “Pahoniu”, mohuć zastasavać taktyku zadušeńnia svabodnaj presy mienavita praz takija sudovyja pracesy. Z “Narodnaj volaj” sudzicca nie dziaržava, a jaje hramadzianie. Tamu i ŭładu nia budzie za što papraknuć, kali sudy pryviaduć da zakryćcia apazycyjnaha vydańnia. Kali navat i nie — biaskoncyja sudy pieraškadžajuć narmalnaj pracy hazety. Zhadvajecca prykład eks-premjera Biełarusi Michaiła Čyhira, jakoha ŭžo niekalki hadoŭ biaskonca sudziać i nie dajuć jamu mahčymaści zajmacca palitykaj.

Aleh Tačony

Niazłosnaja Złobič

Tamara Złobič zajaviła karespandentu “NN”, što nia maje na mecie zakryć “Narodnuju volu”. “Ja maju prava baranić svoj honar i hodnaść, — kaža Tamara Złobič. — Hazeta vychodzić nia pieršy hod, i Siaredzič darosły čałaviek. Musić adkazvać za svaje publikacyi. I mnie ŭsio adno — dziaržaŭnaja heta hazeta ci pryvatnaja. Kali b “Narodnaja hazieta” mianie tak abraziła, ja i na jaje padała b u sud”.

Złobič śćviardžaje, što jana dziejničaje samastojna i za joj nichto nie staić. “Kožny čałaviek na maim miescy zrabiŭ by hetaksama”, — kaža jana.

Bałakiraŭ ničoha jašče nie buryŭ

Hałoŭny lekar 10-j haradzkoj bolnicy Alaksandar Bałakiraŭ kaža, što “ŭsio svajo žyćcio pracavaŭ dla narodu i dziaržavy”: “U publikacyi mianie nazvali niejkim razburalnikam. Što tam, dzie pracavaŭ, ja niešta razburaŭ. Ale mnie i samomu było b cikava daviedacca, što i dzie ja razburyŭ. Dumki kalektyvaŭ, dzie ja pracavaŭ, pra mianie tolki dobryja. Žurnalist zrabiŭ niadobrasumlenna, a artykuł u hazecie, vidavočna, byŭ zamoŭleny”.

“NN”: Jakuju kampensacyju Vy chočacie atrymać?

A.B.: Ja prašu kampensacyju nie dla siabie, a na karyść bolnicy. Chaj hetyja hrošy lepš buduć ludziam. Paśla toj publikacyi ja i sam byŭ patrapiŭ u bolnicu…

“NN”: Ci adyhrała niejkuju rolu ŭ Vašym rašeńni sudzicca z hazetaj toje, što jana apazycyjnaja?

A.B.: Mnie ŭsio adno, jakaja heta hazeta. Ja šanuju svoj honar. Ja — medyk u čaćviertym pakaleńni. Nikoli i ničym siabie nia zhańbiŭ.

NN: Jakija hazety Vy čytajecie?

A.B.: Jak kožny cyvilizavany čałaviek, cikaŭlusia abodvuma bakami i paśla rablu vysnovy. Iścina zaŭsiody pasiaredzinie.

A.T.

Navicki śpić za 100 dalaraŭ

Jak i prezydent A.Łukašenka niekalki miesiacaŭ tamu, premjer-ministar Hienadź Navicki vyrašyŭ trochi adpačyć za miežami Baćkaŭščyny. Jon abraŭ sanatoryj “Biełaruś”, što ŭ Jurmale.

Žyvie Navicki ŭ asobnym korpusie, jaki mieścicca na terytoryi sanatoryju, ale bližej da mora. Premjer adpačyvaje ź siamjoj, u prysutnaści ŭradavaj achovy. Jon nie sustrakajecca ź inšymi kurortnikami i navat nia chodzić u ahulnuju stałoŭku, a charčujecca ŭ svaich apartamentach, daviedaŭsia karespandent radyjo “Svaboda”.

Numary ŭ “Biełarusi” niatannyja. Adzin dzień pražyvańnia ŭ dvuchmiesnym dvuchpakajovym luksie abyšoŭsia b vam u 60 łataŭ (100 dalaraŭ). Ale heta ŭ hałoŭnym korpusie. Nakont budynačka, dzie pasialiŭsia Hienadź Navicki, havorka asobnaja, i vieścisia jana pavinna niepasredna z hałoŭnym doktaram Piatrom Baranoŭskim.

Pra znachodžańnie biełaruskaha premjer-ministra ŭ Łatvii nie było viadoma nikomu z tamtejšych vyšejšych słužbovych asobaŭ. Navat łatvijski kaleha H.Navickaha A.Berzyńš daviedaŭsia pra navinu ad karespandenta “Svabody”. I paškadavaŭ, što biełaruski premjer nie skarystaŭ mahčymaści ŭziać udzieł u samicie pa pytańniach pašyreńnia NATO, jaki na tym tydni prachodziŭ u Ryzie.

Šuškievič vydaŭ knihu

Były staršynia Viarchoŭnaha Savietu CHII sklikańnia Stanisłaŭ Šuškievič napisaŭ knihu “Neakamunizm u Biełarusi”. Aŭtar nastojvaje, što heta nie memuary. Pavodle słoŭ Šuškieviča, kniha nia stolki pra histaryčnyja padziei, u jakich jon braŭ udzieł, kolki pra dzień zaŭtrašni, šlach u jaki vyznačaje analiz sučasnych padziejaŭ.

Vyniki hetaha analizu nie pakidajuć u aŭtara sumnieńniaŭ, što ciapier my nazirajem viartańnie i panavańnie ŭ Biełarusi starych kamunistyčnych paradkaŭ. Hety praces kiravaŭsia Alaksandram Łukašenkam, ale jahonuju dziejnaść sp.Šuškievič nia ličyć samastojnaj, uviazvajučy jaje z pamknieńniami specsłužbaŭ.

Na pieradapošniaj staroncy svajho tvoru Stanisłaŭ Šuškievič sprabuje zaścierahčy čytačoŭ. Jon nie vyklučaje, što “čyrvonaja dyktatura ŭ Biełarusi”, kali dać joj mahčymaść “razraścisia ŭ neakamunistyčny placdarm... zdolnaja destabilizavać vialiki rehijon”. Kab hetaha nie adbyłosia, na dumku Šuškieviča, dastatkova, kab Rasieja spyniła padtrymku dyktatarskaha režymu ŭ Biełarusi.

Kniha byłoha kiraŭnika našaj dziaržavy vyjšła nakładam 1000 ekzemplaraŭ u smalenskim vydaviectvie “Skif” na rasiejskaj movie: takaja była ŭmova amerykanskaha Fondu Makarturaŭ, jaki prafinansavaŭ vydańnie. Jana nie pryznačanaja dla prodažu. U budučyni Šuškievič planuje vydać pašyrany varyjant svajoj pracy i pa-biełarusku.

BNF maryć pra “eŭradabrabyt”

Sojm Partyi BNF na čarhovym pasiadžeńni 13 lipienia ŭchvaliŭ prahramu “Eŭrapiejskaja inicyjatyva”, jakuju pradstaviŭ Vincuk Viačorka. Vystupajučy na pasiadžeńni, kiraŭnik partyi adznačyŭ, što asłableńnie pazycyj Łukašenki ŭ adnosinach z Rasiejaj, jakoje nazirajecca apošnim časam, pahražaje strataj suverenitetu krainy.

Lider BNF raskrytykavaŭ tych, chto bačyć u budučyni A.Łukašenku zmaharom za niezaležnaść, a Rasieju — pastaŭnicaj demakratyi ŭ Biełaruś. Abodva mierkavańni škodnyja i iluzornyja, ličyć V.Viačorka. Adkinuŭšy ideju “raŭnapraŭnaha sajuzu” z Rasiejaj, staršynia BNF zajaviŭ, što Biełarusi patrebien Eŭraźviaz, a taksama členstva ŭ NATO. Pavodle słoŭ Viačorki, heta vyrašyć usie prablemy: daść krainie realny suverenitet, adkryje miežy dla vyjezdu ŭ cyvilizavany śviet, daść svabodu pradprymalnictvu i darohu investycyjam, a taksama šmat inšych vyhod.

Pryniaŭšy prahramu, Sojm daručyŭ kiraŭnictvu i orhanam partyi terminova raspracavać kankretnyja prapanovy pa takich napramkach, jak “Eŭradabrabyt”, “Eŭrabiaśpieka”, “Eŭraekalohija” i inšych. Byŭ uchvaleny i papiaredni śpis budučych kandydataŭ u miascovyja vybary pa Miensku.

Adyšoŭ adzin ź jararchaŭ Rasiejskaj pravasłaŭnaj carkvy, archijapiskap Piermski j Salikamski Afanasi (Alaksandar Kudziuk).

Naradziŭsia jon 18 lutaha 1927 h. u Krasnym Siale na Biełastoččynie, pad Bielskam. U 1945 h. staŭ pasłušnikam Žyrovickaha manastyra, a potym vučyŭsia ŭ Maskoŭskaj duchoŭnaj seminaryi j Maskoŭskaj duchoŭnaj akademii, byŭ rukapakładzieny ŭ jeramanachi. Atrymaŭ navukovuju stupień kandydata bahasłoŭja, vykładaŭ u Maskoŭskaj duchoŭnaj seminaryi, a potym — u Mienskaj duchoŭnaj seminaryi. Tak los znoŭ viarnuŭ jaho ŭ Biełaruś, u Žyrovicki manastyr. Tut ajciec Afanasi byŭ uźviedzieny ŭ san archimandryta, a 31 žniŭnia 1980 h. zrabiŭsia japiskapam Pinskim, vikaryjem Mienskaj japarchii. Z sakavika 1984 h. uładyka Afanasi ŭznačalvaŭ Piermskuju japarchiju. Sioleta ŭ sakaviku jon padaŭ u Synod prośbu ab sychodzie na adpačynak, bo mieŭ užo 75 hadoŭ. Da samaje śmierci ajciec Afanasi zastavaŭsia biełaruskim patryjotam.