Najomnika što byŭ va ŭkrainskim pałonie, viarnuli ŭ Rasiju, a zatym asudzili ŭ Biełarusi nie mienš čym na 10 hadoŭ
Uradženiec Rudzienska Maksim Ziaziulčyk paśla viartańnia z ukrainskaha pałonu byŭ asudžany ŭ Biełarusi pa artykułach «zdrada dziaržavie» i «najomnictva».
Niadaŭna jon atrymaŭ nie mienš za 10 hadoŭ pazbaŭleńnia voli i byŭ nakiravany dla adbyvańnia pakarańnia ŭ papraŭčuju kałoniju № 17 u Škłovie, paviedamili Reform.news pradstaŭniki inicyjatyvy DissidentBY.
Nahadajem, hramadzianin Biełarusi Ziaziulčyk vajavaŭ na baku Rasii ŭ składzie PVK «Redut» i byŭ uziaty ŭ pałon 19 vieraśnia 2022 hoda. Šaŭčenkaŭski rajonny sud Kijeva ŭ studzieni 2023 hoda prysudziŭ jaho da 10 hadoŭ pazbaŭleńnia voli za najomnictva (č. 4 art. 447 KK Ukrainy).
Jak vynikaje z materyjałaŭ suda, kali pačałasia vajna, biełarus, uradženiec Rudzienska, słužyŭ pa kantrakcie ŭ Biełarusi. Ad kamandzira svajoj čaści jon daviedaŭsia pra PVK «Redut» i vyrašyŭ pajści ŭ najomniki. U lipieni 2022 hoda jon pryjechaŭ u rasijski Tamboŭ i padpisaŭ kantrakt z PVK.
Pavodle kantrakta, jon pavinien byŭ atrymlivać hrašovaje zabieśpiačeńnie 3,6 tys. dalaraŭ u miesiac, a taksama strachavańnie žyćcia na 60 tysiač dalaraŭ. Paśla trochdzionnaj padrychtoŭki biełarusa adpravili va Ukrainu na pasadu kulamiotčyka-retranślatara. Pad Krasnapollem jon atrymaŭ ranieńnie i viarnuŭsia ŭ Izium, paśla čaho byŭ pieradysłakavany ŭ siało Svatava Łuhanskaj vobłaści i ŭ siało Karovin Jar u Danieckaj vobłaści. 19 vieraśnia jon atrymaŭ ranieńnie ŭ nahu ad svajho kamandzira i byŭ uziaty ŭ pałon.
U lutym 2023 hoda SBU paviedamiła, što Ziaziulčyk — supracoŭnik KDB, jaki źbiraŭ raźviedvalnuju infarmacyju dla Minska i sprabavaŭ vyśvietlić mahčymyja płany rasijan pa adchileńni Łukašenki ad ułady. U tym ža hodzie jon raspavioŭ pra svaju pracu na KDB Biełarusi ŭ intervju błohieru Uładzimiru Zołkinu i Maksimu Šabuckamu.
U miežach abmienu, jaki adbyŭsia 8 lutaha 2024 hoda, Ukraina pieradała Rasii pałonnaha hramadzianina Biełarusi.
Uvosień 2024 hoda pry pierasiačeńni dziaržaŭnaj miažy RF i Biełarusi jon byŭ zatrymany. 8 žniŭnia 2025 hoda ŭ Mahiloŭskim abłasnym sudzie pačaŭsia praces u zakrytym pasiadžeńni.
Jaho maci, Ała Mikałajeŭna Rysiaviec, źviarnułasia pa padtrymku ŭ ruch «Vieterany Rasii». U svaju čarhu «Vieterany Rasii» sprabavali vyrašyć pytańnie praz pasolstva RF u Biełarusi, adnak tam tolki adznačyli, što «mahčymaści pa abaronie Maksima Ziaziulčyka abmiežavanyja jaho hramadzianstvam RB». U pasolstvie paabiacali damahčysia źniaćcia abvinavačańniaŭ pa artykule 133 KK RB («najomnictva»), uličvajučy jaho bajavyja zasłuhi — jon byŭ uznaharodžany miedalom «Za advahu» (ukaz prezidenta RF ad 26 krasavika 2023 hoda, uznaharoda № 145837).
Nie dapamoh i zvarot da Łukašenki z prośbaj ab pamiłavańni najomnika.
Kamientary
[Zredahavana]