***
Pry kancy vieraśnia ŭ Prazie prachodziła kanferencyja pravacentrysckich arhanizacyjaŭ Centralnaj i Ŭschodniaj Eŭropy. “Pravuju” Biełaruś prezentavali Vincuk Viačorka i Anatol Labiedźka.
Nichto i nie čakaŭ, što našyja apazycyjanery buduć pryznavacca adzin adnamu ŭ ciopłych pačućciach. Toj ža, chto naziraŭ pavodziny abodvuch lideraŭ, zrazumieŭ: naŭrad ci kali-niebudź u najbližejšaj budučyni AHP i BNF abjadnajucca na adzinaj platformie
Niepryjaznaść Labiedźki da Viačorki i naadvarot kryjecca nie ŭ asabistych pačućciach. Pryčyna chałodnaści stasunkaŭ – uzajemnaje rasčaravańnie: abjadnańnie pad lozunham “Dałoŭ Łuku!” nie atrymałasia. U Prazie palityki praktyčna nie razmaŭlali i hučna papraŭlali vystupy adzin adnaho.
Dośvied dziaržavaŭ z raźvitoj palityčnaj kulturaj śviedčyć, što samotnaja drobnaja partyja nikoli nie adstaić svaich intaresaŭ. Tryvałyja partyjnyja kaalicyi atrymlivajucca tady, kali dźvie-try partyi majuć padobnyja prahramy, idealohiju albo adnolkavy pohlad na niejkuju prablemu. Jak sami razumiejecie, adnaho imknieńnia vyłučyć kandydata ŭ prezydenty z svaich šerahaŭ dla stvareńnia kaalicyi niedastatkova.
Siońnia hałoŭnaje pytańnie – zachavańnie suverenitetu Biełarusi. Mienavita pa staŭleńni da jaho musiać jadnacca i raźmiažoŭvacca palityčnyja siły. U vypadku AHP i BNF siabroŭstva nie atrymajecca. Dla A.Labiedźki neŭtralizacyja Łukašenki pieratvaryłasia ŭ hałoŭnuju metu, a dla partyi V.Viačorki lubyja sastupki Rasiei ŭ pytańni suverenitetu nieprymalnyja. Tamu adnosiny dźviuch partyj sapsavalisia. Chto moh by skłaści niezaležnickuju kaalicyju ŭ takim vypadku?
Zrazumieła, što dla frontaŭcaŭ zastajecca pryncypovaj admova ad luboha supracoŭnictva z kamunistami. A voś levacentrysckija partyi mohuć bracca pad uvahu. Adnak pieršym krokam mahło b stać adnaŭleńnie adzinstva samoha Frontu. Kurjoznym (kali nie trahičnym) padajecca supraćstajańnie byłych adnapartyjcaŭ. Zianon Paźniak nie pavinien sabie dazvalać “zacichać” niedzie ŭ Polščy. Jon byŭ i jość symbalem. Zastavacca na zadvorkach palityki – pamyłka.
Kali staršynia KCHP uśviadomić patrebu ŭ źmienach taktyki, na nastupnych prezydenckich vybarach adzinym kandydatam ad apazycyi nia stanie “čort z tabakierki”
Paźniak moh by ŭžo ciapier viarnucca ŭ aktyŭnuju palityku. Pieršym krokam mahło b stać złučeńnie KCHP-BNF i BNF “Adradžeńnie”. A što dalej? Mahčyma, dobraj padkazkaj budzie niadaŭniaja padzieja ŭ Čechii: staršynia Hramadzianskaha demakratyčnaha forumu Vacłaŭ Kłaŭs admoviŭsia ad partyjnaje pasady, kab pryśviacić siabie tolki baraćbie za prezydencki fatel.
Jaŭhien Sidoryk, Praha
ad redakcyi
Jak udałosia daviedacca našamu karespandentu, imia i proźvišča Zianona Paźniaka zastajecca ŭ śpisach tych, kaho pamiežniki musiać “pry apaznańni zatrymać” na ŭsich biełaruskich pamiežnych pierachodach.
Ciapier čytajuć
Taksistka z Tadžykistana naśmierć źbiła biełarusku ŭ Polščy — i spakojna pakinuła krainu24
Kamientary