Biełarus, jaki staŭ rasijskim najomnikam, viarnuŭsia ŭ Słuck — biez uvahi z boku siłavikoŭ. Zaklikaje inšych nie pamirać za Rasiju

Mužčyna sam vyjšaŭ na suviaź sa stvaralnikam jutub-kanała Slutsk Gorod i prapanavaŭ zapisać intervju, «kab skazać ludziam praŭdu». Bajec pažadaŭ zachavać ananimnaść.

Atrymaŭšy ranieńnie paśla siami miesiacaŭ na linii frontu, jon časova viarnuŭsia ŭ Biełaruś dla lačeńnia i reabilitacyi. Pavodle jaho słoŭ, vajskoŭcam jon maryŭ być ź dziacinstva, ale doma nie prajšoŭ miedkamisiju pa stanie zdaroŭja. Paśla pačatku poŭnamaštabnaj vajny jon pajechaŭ u Rasiju i tolki z treciaj sproby zmoh davieści spravu da zaklučeńnia kantrakta.

Mužčyna śćviardžaje, što vajavać pajšoŭ «za ideju». Paśla dvuchtydniovaj padrychtoŭki ŭ vučebnym centry jaho nakiravali ŭ raźviedvalnaje padraździaleńnie.

Na pytańnie, što b jon moh skazać tym, chto siońnia zadumvajecca pra ŭdzieł u vajnie abo bačyć rekłamu z prapanovami padpisać kantrakt, bajec adkazaŭ vielmi kateharyčna:

«Ja b nie staŭ da hetaha zaklikać. Tam jość śpiecyjalna navučanyja ludzi, jakija hetym zajmajucca. A kali prychodzić čałaviek z hramadzianki, jaki nie viedaje, što takoje vajennaja sprava… Vučebka — heta nie zvyčajnaja armija. Tam idzie vielmi chutkaja padrychtoŭka, treba ŭsio schoplivać na latu. Zvyčajny čałaviek, jaki ničoha nie razumieje, litaralna moža prosta nie vyžyć. Iści ad taho, što doma niejkija prablemy ci ty prosta zachacieŭ niejak pakazacca… — nie varta naohuł tudy iści. Tamu što heta vajna», — padkreśliŭ jon.

Bajec taksama papiaredziŭ pra padman u rekłamie, jakaja abiacaje słužbu ŭ biaśpiečnych tyłavych zonach. Pavodle jaho słoŭ, amal 90% navabrancaŭ niezaležna ad abiacańniaŭ nakiroŭvajuć u šturmavyja padraździaleńni, dzie nazirajecca kałasalny niedachop ludziej.

Jak davodzić najomnik, šturmaviki hinuć vielmi chutka, a z tych, z kim jon pačynaŭ słužbu, u žyvych amal nikoha nie zastałosia:

«U nas na vučebcy było 96 čałaviek, bolšaja častka pajšła ŭ šturmavyja padraździaleńni. Z majho ŭzvoda dvaich zabrali ŭ raźviedku i adnaho ŭ REB. Usie astatnija 18 čałaviek pajšli ŭ šturmaviki. Ich užo nie stała praz dva tydni».

Adkazvajučy na pytańnie, ci viedaje jon choć kaho-niebudź sa svajoj vučebki, chto vyžyŭ za hetyja 7‑8 miesiacaŭ u šturmach, jon koratka adkazaŭ: «Nie».

Bajec acharaktaryzavaŭ sučasny front jak prastoru tatalnaha kantrolu dronaŭ, dzie artyleryja i snajpiery adyšli na druhi płan, a 95% ranieńniaŭ składajuć askołačnyja.

Niahledziačy na ŭłasnyja pieraściarohi i razumieńnie maštabu strat, sam surazmoŭca płanuje viarnucca na front, kab dasłužyć dva miesiacy dziejučaha kantrakta. Pavodle jaho słoŭ, pretenzij z boku biełaruskich pravaachoŭnych orhanaŭ da jaho na hety momant niama.

Kryminalny kodeks Biełarusi praduhledžvaje ad 3 da 7 hadoŭ za najomnictva — udzieł u vajennych dziejańniach na terytoryi zamiežnaj krainy.

• 0
• 0
• 2
• 24
• 3
• 0
• 14
• 0