Sproščanaja pracedura rehistracyi

17 śniežnia prezydent padpisaŭ dekret, jaki spraščaje praces rehistracyi dy likvidacyi jurydyčnych asobaŭ.

Pavodle jaho, adpadaje patreba ŭ “iurydyčnym adrasie”. Ciapier pryvatnyja ŭnitarnyja pradpryjemstvy možna rehistravać “pa miescy prapiski” zasnavalnika.

Raniejšyja dekrety №11 ad 16 sakavika 1999 h. i №222 ad 16 listapada 2000 h., što vyznačali paradak rehistracyi j likvidacyi subjektaŭ haspadarańnia, taksama patrabavali, kab u statucie pradpryjemstva ci firmy byli zapisanyja ŭsie vidy dziejnaści. Ciapier treba paznačać tolki praduhledžanyja zakonam (naprykład, źviazanyja ź niebiaśpiekaj dla zdaroŭja). Kab zaniacca niejkim inšym vidam dziejnaści, dastatkova papiarednie paviedamić pra heta ŭ rehistracyjnyja i padatkovyja orhany.

Likvidavać subjekty haspadarańnia buduć tolki rehistracyjnyja orhany (raniej tre było sklikać likvidacyjnuju kamisiju).

Dziaržaŭnaj rehistracyjaj pradpryjemstvaŭ z zamiežnymi investycyjami budzie zajmacca ŭžo nie Ministerstva zamiežnych spravaŭ, a abłvykankamy i Mienharvykankam.

Adziny abmiežavalny zachad liberalnaha dekretu — u časie rehistracyi daččynych arhanizacyjaŭ zasnavalnik musić dakumentalna zaśviedčyć, što nia maje niavykananych hramadzianska-pravavych zabaviazańniaŭ (kštałtu nieaddadzienaha kredytu). Kali hetkija jość, a zhody kredytoraŭ na zasnavańnie pradpryjemstva niama, jano nia budzie zarehistravanaje.

Novy dekret nie admianiaje, a dapaŭniaje staryja: tyja, chto ŭžo zarehistravaŭsia pavodle starych praviłaŭ, nia musiać pierarehistroŭvacca.

Aleś Kudrycki

mierkavańnie eksperta

Juryst Siarhiej Bałykin miarkuje, što hety dekret tolki krychu ablehčyć stan niekatorych pradprymalnikaŭ i rehistracyjnych dy kantrolnych orhanaŭ. Toje, što pryvatnyja UP dazvolili rehistravać pa chatnim adrasie, – stanoŭčy fakt, ale čamu nielha rehistravać takim ža čynam ZAT, TDA i h.d.? Dekret praduhledžvaje, što ŭ vypadku rehistracyi UP pa miescy žycharstva apłata kamunalnych pasłuhaŭ budzie vieścisia pavodle paradku, vyznačanaha Saŭminam. Jak padkazvaje praktyka, heta aznačaje stoadsotkavuju apłatu. Spraščeńnie pracesu likvidacyi ablahčaje žyćcio tolki rehistracyjnym orhanam, ale nie pradprymalnikam. Toje, što rehistracyju pradpryjemstvaŭ z zamiežnymi investycyjami addali abłvykankamam dy Mienharvykankamu, spravy nie źmianiaje – hałoŭnaje nia toje, chto rehistruje, a praviły rehistracyi. Patreba zapisvać vidy dziejnaści va ŭstanoŭčyja dakumenty tolki źmiakčanaja, a jaje tre było b uvohule admianić. Drenna, što dekret pavialičyŭ kolkaść padstavaŭ dla admovy ŭ rehistracyi, niesudovaj likvidacyi pradpryjemstvaŭ dy kolkaść dakumentaŭ, patrebnych dla rehistracyi. Kali zasnavalnik UP admaŭlajecca puskać pravierku (ličy, da siabie ŭ chatu), dyk heta ŭžo padstava dla niesudovaj likvidacyi. Akramia taho, zaraz daviadziecca nieviadomym čynam dastavać daviedki pra toje, što zasnavalnik nia maje zapazyčanaściaŭ pierad kredytorami. Kali tak, dyk dziaržava sama nia maje prava stvarać unitarnyja pradpryjemstvy, bo maje najvialikšyja zapazyčanaści ŭ krainie.

• 0
• 0
• 0
• 0
• 0
• 0
• 0
• 0