Tramp vyrašyŭ zachoplivać rasijskija tankiery, bo Pucin jaho «stamiŭ»
Prezident ZŠA Donald Tramp uchvaliŭ rašeńnie ab zachopie tankieraŭ tak zvanaha rasijskaha cieniavoha fłotu, a taksama padtrymaŭ prasoŭvańnie zakonaprajekta pra «razhromnyja sankcyi», tamu što ŭsio bolš rasčaroŭvaŭsia va Uładzimiry Pucinu i pačaŭ ličyć jaho hałoŭnaj pieraškodaj dla spynieńnia vajny va Ukrainie. Pra heta piša vydańnie The Telegraph sa spasyłkaj na infarmavanyja krynicy.
Jak adznačajuć surazmoŭcy vydańnia, takija dziejańni Biełaha doma źjaŭlajucca sihnałam Maskvie, što času na pošuk mirnaha vyrašeńnia zastajecca ŭsio mienš.
U atačeńni Trampa ličać, što Pucin śviadoma zaciahvaje pieramovy. Adna z krynic, blizkich da najbližejšaha koła prezidenta ZŠA, acharaktaryzavała jahony padychod jak «bizun i piernik», dadaŭšy, što «piernik faktyčna ŭžo skončyŭsia». Inšy surazmoŭca padkreśliŭ, što rasijskaja taktyka «dva kroki napierad — adzin nazad» stanovicca dla Trampa ŭsio bolš stamlalnaj.
The Telegraph nahadvaje, što raniej Tramp niaredka vykazvaŭsia pra Pucina ŭ pazityŭnym klučy i častkova ŭskładaŭ adkaznaść za zaciahvańnie kanfliktu na Ukrainu. Adnak, pavodle słoŭ dziejnych i byłych amierykanskich čynoŭnikaŭ, pazicyja jaho administracyi pastupova zbližajecca z padychodam jeŭrapiejskich sajuźnikaŭ, jakija pierakananyja, što Maskva śviadoma ciahnie čas i nie imkniecca da realnaha miru.
Były pradstaŭnik administracyi ZŠA adznačyŭ, što Vašynhton usio čaściej sutykajecca ź situacyjaj, kali Rasija demanstruje hatoŭnaść da damoŭlenaści, ale pry abmierkavańni kankretnych punktaŭ albo ŭzmacniaje svaju pazicyju, albo časova vychodzić ź pieramoŭ. Pry hetym, pavodle jaho słoŭ, Ukraina vyhladaje bolš schilnaj da kampramisaŭ.
Vydańnie taksama zhadvaje, što raniejšyja zajavy Trampa pra vieru ŭ ščyraść mirnych namieraŭ Pucina vyklikali zaniepakojenaść u jeŭrapiejskich partnioraŭ Kijeva. U Jeŭropie źviartali ŭvahu, što paśla ciopłych kantaktaŭ pamiž Trampam i Pucinym časta adbyvalisia rakietnyja i dronavyja ŭdary pa cyvilnaj infrastruktury Ukrainy. Adzin z brytanskich čynoŭnikaŭ zajaviŭ, što na hetym fonie «mientalitet» administracyi Trampa ciapier bližejšy da jeŭrapiejskaha pohladu na vajnu, čym kali-niebudź raniej, bo «pastajannaja žorstkaść Pucina, jaho cyničnyja pavodziny i hulni nie zastajucca niezaŭvažanymi».
9 studzienia Bierahavaja achova ZŠA zachapiła ŭ Atłantyčnym akijanie tankier Olina (raniej — Mivera M), jaki znachodziŭsia pad sankcyjami za pieravozku rasijskaj nafty. Heta ŭžo piaty za apošni čas tankier, na jaki vysadzilisia amierykanskija siły. Raniej byli zatrymanyja sudny Bella 1, źviazanaje z rasijskim «cieniavym fłotam», i M Sophia. Pavodle źviestak The New York Times, ZŠA ciapier pieraśledujuć u ahulnym liku 16 tankieraŭ. Niekatoryja ź ich, naprykład Veronica (pierajmienavany ŭ Galileo), terminova źmianiajuć nazvy i rehistrujucca pad rasijskim ściaham, kab paźbiehnuć zatrymańnia.
Akramia taho, Donald Tramp daŭ zialonaje śviatło novamu zakonaprajektu pra «źniščalnyja sankcyi», inicyjavanamu sienataram-respublikancam Lindsi Hremam. Dakumient praduhledžvaje ŭviadzieńnie myt na 500% na impart z krain, jakija nabyvajuć rasijskija enierhanośbity i syravinu.
Tramp zarepościŭ artykuł «Pustasłoŭje Pucina pra «ŭdar» pa im pakazvaje, što mienavita Rasija staić na pieraškodzie miru»
«Nadakučyli sustrečy dziela sustreč». Tramp rasčaravaŭsia i ŭ Pucinie, i ŭ Zialenskim
Zatrymać siońnia naftavy tankier amierykancam dapamahli ŭłady Vieniesueły. Tramp imi zadavoleny
U ekipažy zatrymanaha tankiera rasijskaha cieniavoha fłotu — 17 ukraincaŭ
Sienatar Hrem nazvaŭ krainu, jakuju nieŭzabavie moža napatkać los Vieniesueły
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary