Rodnaja siastra minimałki

Z 1 sakavika ŭrad padvysić taryfnuju staŭku pieršaha razradu dy bazavuju vieličyniu. Nia vyklučana, što apošniuju padymuć u paŭtara-dva razy. Što nam z hetaha budzie?

Zarobak i vieličynia

Ciapier «minimałka» isnuje chiba dla taho, kab my viedali, jak mała nam majuć prava zapłacić. Paralelna joj uviali minimalny zarobak za hadzinu — kab stvaryć hrunt dla pierachodu na pahadzinnuju taryfikacyju apłaty pracy (ciapier pryniataja miesiačnaja). Zarobki biudžetnikam dy raznastajnyja płaciažy naličvajuć z dapamohaj nie MZ, a taryfnaj staŭki pieršaha razradu (z 1 studzienia jana roŭnaja 25 tys. rubloŭ). Tych, chto pracuje ŭ pramysłovaści, źmiena taryfnaj staŭki nia tyčycca: tam jaje vyznačajuć asobna, u zaležnaści ad efektyŭnaści pracy pradpryjemstva.

1 sakavika 2002 h. «minimałku», jakaja dahetul była 10 tys. rubloŭ, padvysili da 17 tysiačaŭ. Novaŭviedzienaja bazavaja vieličynia skłała 10 tys. Lohika zrazumiełaja: u ciapierašnich umovach minimalny zarobak musić raści davoli šparka, kab nablizicca da ŭzroŭniu spažyvieckaha minimumu — toj sumy, na jakuju možna niejak žyć. A voś bazavaja vieličynia robicca spadkajemnicaj «staroha» minimalnaha zarobku, pra jaki «zajcy» ŭzhadvali tolki tady, kali ich łaviŭ biez kvitka kantralor u aŭtobusie.

Padzieł na minimalny zarobak dy bazavuju vieličyniu daŭ uładam bolšuju volu. Pavodle zakonu, minimałku možna źmianiać tolki raz na hod — 1 studzienia. Rabić heta tak redka niemahčyma dziela inflacyi. Tamu padvyšeńnie «minimałki» ciaham hodu nazyvali «indeksacyjaj». Adbyvałasia jana adpaviedna rostu cenaŭ. Paśla ŭviadzieńnia bazavaj vieličyni ŭsio pajšło pa-inšamu. Minimalny zarobak da kanca 2002 h. nivodnaha razu nie padvyšali. Navošta, kali štrafy dy dziaržpošliny ad jaho bolš nie zaležać? A voś bazavuju vieličyniu za hety čas pierahladali dva razy. Sakavickaje padvyšeńnie budzie trecim. Vidać, pamier bazavaj vieličyni rehuluje nie inflacyja, a dziaržaŭny apetyt.

Kamu heta vyhadna

Padvyšeńnie BV prynosić i karyść niekatorym katehoryjam nasielnictva. Vyhadu majuć biudžetniki dy vajskoŭcy, jakija źbirajucca na pensiju. Čym bolšaja bazavaja vieličynia, tym bolš dziaržava im płacić. Z padvyšeńniem BV bolej hrošaj atrymlivajuć studenty, vybitnyja spartoŭcy dy ich trenery, dziejačy, jakija majuć tytuł «narodny», Hieroi Savieckaha Sajuzu, represavanyja dy ich rodnyja. Padvyšajucca sumy, na jakija dziaržava strachuje supracoŭnikaŭ padatkovych inspekcyjaŭ, senataraŭ i deputataŭ pałaty pradstaŭnikoŭ.

U niekatorych vypadkach rost BV vyhadny biznesoŭcam. Zamiest 24% padatku z prybytku jany mohuć płacić 15%, kali balansavy prybytak pradpryjemstva za hod nie pieravysi 5 tysiačaŭ BV (50 młn. rubloŭ). Firmy, jakija majuć da 15 supracoŭnikaŭ, mohuć płacić padatki pa sproščanaj systemie — 10% ad vałavaj vyručki, kali ciaham dvuch kvartałaŭ apošniaja była nia bolšaj za 5 tys. BV. Finansavyja aperacyi pamiž fizyčnymi asobami staviacca pad asablivy kantrol, kali jany pieravyšajuć 2 tys. BV (dla jurydyčnych asobaŭ — 20 tys.) za raz abo ciaham miesiaca. Čym vyšejšaja BV — tym bolšymi sumami možna aperavać biaź lišniaje vałakity.

Chabarniki, spadkajemcy, deputaty…

Uvieś Hramadzianski kodeks, jaki rehuluje pravy ŭłasnaści, trymajecca na bazavaj vieličyni.

Vy majecie prava zabrać sabie reč, jakaja valajecca biez patreby na vašaj ziamli, tolki tady, kali jana kaštuje vidavočna mienš za 5 BV — 50 tys. rubloŭ.

Ad bazavaj vieličyni zaležyć i pamier aficyjna dazvolenaha «chabaru»: zabaraniajecca rabić padarunki koštam bolš za 5 BV dziaržaŭnym słužboŭcam, supracoŭnikam špitalaŭ, adukacyjnych ustanovaŭ i h.d. Kali vy padazrajacie niekaha ŭ plahijacie, možacie patrabavać praz sud kampensacyju ŭ pamiery ad 10 da 50 tys. bazavych vieličyniaŭ.

Kali znajomy prosić pazyčyć hrošaj na sumu, bolšuju za 10 BV, — majecie prava ŭziać u jaho raśpisku. Adnak, kab patrabavać pracenty, treba dać u piać razoŭ bolej — 50 BV.

Kali niechta daŭ vam na zachavańnie reč koštam bolš za 10 BV i patrabuje piśmovaj damovy, nie aburajciesia: jon maje na toje prava. Adnak kali potym jon pra tuju reč zabudziecca ci nie zachoča brać nazad, vy možacie navat pradać jaje z aŭkcyjonu — praŭda, dla hetaha košt rečy pavinien być bolšy za 100 BV.

Kali patelefanujuć z banku i skažuć, što bahaty rodzič pakinuŭ vam u spadčynu bujnuju sumu na rachunku, vy nia zmožacie źniać bolš za 100 BV, pakul nie pakažacie paśviedčańnia, što daje prava na spadčynu.

Razam z bazavaj vieličynioj padvyšajucca kampensacyi za niasvoječasovuju dastaŭku pasažyraŭ dy hruzaŭ, a taksama hrašovyja sumy, jakija musiać pakinuć tamu, čyju majomaść kanfiskuje sud.

Navat toj, chto siadzić za kratami, moža mieć vyhadu ad pavieličeńnia BV: adpaviedna joj bolšaje suma, jakuju jon moža vydatkavać na ježu dy cyharety. Vyjhrajuć kandydaty na dziaržaŭnyja pasady, jakim vydajuć ź biudžetu peŭnuju kolkaść bazavych vieličyniaŭ na pieradvybarčuju kampaniju.

Treba płacić

Adnak usio zhadanaje vyšej — vypadki redkija. Bolšaść hramadzianaŭ maje spravu z bazavaj vieličynioju tady, kali davodzicca addavać hrošy dziaržavie. Razam z BV rastuć štrafy, dziaržpošliny, płata za vydaču raznastajnych licenzijaŭ dy paśviedčańniaŭ, a taksama za padaŭžeńnie terminu ich dziejańnia, za dziaržaŭnuju rehistracyju abstalavańnia i h.d. Apošnim časam urad pačaŭ pierachodzić da novaj taktyki. Nie čakajučy padvyšeńnia bazavaj vieličyni, prymajucca pastanovy, što pavialičvajuć kolkaść BV, jakija treba spłačvać u tym ci inšym vypadku. Tak, 8 studzienia ŭrad pastanaviŭ brać za licenziju na vytvorčaść i aptovy prodaž alkaholu dy tytuniu 80 BV zamiest 15. Za praciah terminu dziejańnia licenzii buduć brać 40 BV zamiest 7. Pradprymalniki, jakija nie źjaŭlajucca jurydyčnymi asobami, buduć płacić za licenziju 10 BV (raniej — 2), za jaje praciah — piać BV zamiest dźviuch.

Aleś Kudrycki

• 0
• 0
• 0
• 0
• 0
• 0
• 0
• 0