Piatro Bryhadzin u pryvatnaj razmovie skazaŭ, što Ŭładzimier Kołas dyrektaram nia budzie ni pry jakich umovach. Ale kandydaturu Ščarbačevič pierahledzieć možna.
Abarona Liceju pierajšła ŭ nastupnuju fazu: supracoŭnictva ź Ministerstvam adukacyi ciapier vyhladaje niemahčymym. Takoje ŭražańnie zastałosia paśla sustrečy ŭ Licei ź ministram P.Bryhadzinym 13 červienia.
Jana nahadvała razmovu ślapoha z hłuchim. Ministar zaznačyŭ, što pryznačeńnie Tamary Ščarbačevič «było zroblenaje abdumana». Na dovady, što U.Kołas vydatna kiruje i niama patreby jaho źmianiać, ministar adkazvaŭ adno: «My trymajemsia palityki ratacyi kadraŭ». Adkazu na pytańnie «Čamu ž pry takich dobrych pedahahičnych jakaściach Vy panižajecie Kołasa z de-fakta dyrektara da namieśnika?» prysutnyja tak i nie pačuli. «My čakali ministra, a da nas pryjechaŭ klerk, ad jakoha ničoha nie zaležyć», — kaža Vincuk Viačorka, syn jakoha Franak vučycca ŭ licei.
U tuju piatnicu 13-ha ŭ Licei čakali i namieśnika kiraŭnika Administracyi prezydenta Aleha Pralaskoŭskaha. Nie dačakali. Tamu vyrašyli źviarnucca ŭ Administracyju asabista: 17 červienia tudy zanieśli zvarot liceisty, 18-ha — ichnyja baćki. Choć vialikaha spadzievu na zvaroty jany nia majuć. U.Kołas paviedamiŭ, što Minadukacyi rychtuje likvidacyju «buntoŭnaj» ustanovy. Heta niby paćviardžaje čutka, što haradzkija ŭłady źbirajucca rabić z škoły №22 himnaziju imia Jakuba Kołasa.
Ideja pieratvareńnia Liceju ŭ niedziaržaŭnuju navučalnuju ŭstanovu nabyvaje ŭsio bolšy padmacunak. «Niama nijakaha žadańnia supracoŭničać z hetym Ministerstvam adukacyi», — kanstatuje U.Kołas. «My zrabili što mahli. Ciapier moža vyrašyć spravu tolki hołas šyrokaj hramadzkaści», — zaznačyŭ Lavon Barščeŭski. Da jaje baćki j liceisty majuć namier źviarnucca praz vuličnyja akcyi. Haradzkija ž ułady tradycyjna dazvolili im pikietavać Banhalor zamiž placoŭki pierad Ministerstvam adukacyi dy Michajłaŭskaha skveru ŭ centry horadu. Kudy pojduć daviedzienyja da rospačy abaroncy Liceju, na toj čas, kali pišacca hety artykuł, jašče nieviadoma. Jasna adno — pakul hazeta budzie drukavacca, jany ŭžo vyjduć na vulicy.
Arkadź Šanski
Ciapier čytajuć
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy18
Kamientary