Śviata nie biez adrenalinu

26 i 27 lipienia adbylisia dziasiatki mierapryjemstvaŭ, prymierkavanych da Dnia Niezaležnaści. Choć u hetyja dva dni i abviaščałasia pra stvareńnie kaalicyj dy kaalicyjaŭ kaalicyj, śviatkavali apazycyjanery ŭ asnoŭnym niezaležna adzin ad adnaho.

26 lipienia Narodnaja Hramada zładziła mižnarodnuju kanferencyju da stahodździa Biełaruskaj sacyjalistyčnaj hramady i 13-j hadaviny Niezaležnaści. Uzrovień dyskusii davaŭ zrazumieć, što mižnarodny sacyjał-demakratyčny ruch pieražyvaje kryzis idejaŭ.

U hety ž dzień Kanservatyŭna-chryścijanskaja partyja BNF ustalavała ŭ Kurapatach sorak novych kryžoŭ uzdoŭž kalcavoj aŭtadarohi.

27 lipienia deputaty Viarchoŭnych Savietaŭ 12 i 13-ha sklikańniaŭ, čalcy hrupy "Respublika" dy pradstaŭniki stvoranaj uviesnu Asamblei deputataŭ miascovych savietaŭ praviali śviatočnuju viečarynu. Kamernaje mierapryjemstva prachodziła ŭ mienskaj kaviarni "Jelaana". Vystupajučy na śviatkavańni, Stanisłaŭ Šuškievič skazaŭ, što, na jaho dumku, adna z pryčynaŭ prychodu ŭ 1994 h. da ŭłady Łukašenki - toje, što "VS 12-ha sklikańnia zanadta chutka pracavaŭ nad pryniaćciem Kanstytucyi". Na dumku inšaha śpikiera, Miečysłava Hryba, admoŭnuju rolu ŭ našaj dalejšaj historyi adyhrała toje, što "padziei "cichaj revalucyi" nie supravadžalisia ŭsieahulnym abnaŭleńniem ułady, u strukturach jakoj zastalisia kiraŭniki z byłoj savieckaj namenklatury. Prystasavaŭšysia da novych umovaŭ i vykarystaŭšy svajo słužbovaje stanovišča padčas pierapadziełu nacyjanalnaha bahaćcia, jany ciapier moŭčki pahadžajucca z usim, što tvorycca ŭ našaj krainie". Jašče adna prablema - u pačatku 90-ch kiraŭnictva krainy nia mieła adzinaje dumki pra toje, jak Biełaruś budzie budavać niezaležnaje žyćcio i jakija abirać pryjarytety.

Arhanizatary sustrečy vyrašyli sumiaścić pryjemnaje z karysnym i prosta ŭ kaviarni padpisać pahadnieńnie ab supracy pamiž "Respublikaj" i Asamblejaj deputataŭ miascovych savietaŭ. U vyniku kaardynatar "Respubliki" Siarhiej Skrabiec podpis pastaviŭ, a kaardynatary Asamblei - pakul nia ŭsie.

U hety ž dzień na śviatočnym pasiedžańni CK BSDP (NH) było deklaravanaje stvareńnie Eŭrapiejskaj kaalicyi, a paśla, a 14-j, u Kupałaŭskim skvery aktyvisty partyi ŭskłali kvietki da pomnika paetu. Sabrałosia kala 40 čałaviek. Da akcyi dałučylisia pradstaŭniki "Maładoha frontu", jakija naładzili pikiet pad lozunham "Ja lublu Biełaruś!". Zatrymanych nie było, u adroźnieńnie ad akcyi "zubroŭ", jakaja prajšła a 12-j na placy Niezaležnaści. Na vychadzie z Čyrvonaha kaściołu zubroŭcy stali z raściažkaj "Žyvie niezaležnaja Biełaruś!" i razdavali ŭlotki-vinšavańni. Milicyja zatrymała niekalki aktyvistaŭ, a taksama siabra KCHP-BNF Ryhora Kijka, što jakraz vychodziŭ z kaściołu i vyrašyŭ abaranić chłopcaŭ.

Śviatkavali Dzień Niezaležnaści i ŭ Prazie. U adnym z samych prestyžnych klubaŭ "№11" u centry českaj stalicy sabralisia pradstaŭniki biełaruskich emihracyjnych arhanizacyjaŭ i českija palityki. Na ŭvachodzie ŭ klub visieli dva vielizarnyja ściahi: biełaruski nacyjanalny j česki dziaržaŭny.

Haradzienskija apazycyjnyja arhanizacyi sustreli trynaccatuju hadavinu Niezaležnaści vyviešvańniem na vysotnych damach u roznych punktach horadu bieł-čyrvona-biełych ściahoŭ. Usiaho ich było piać. Dva ściahi naranicu 28-ha jašče łunali nad miestam.

Bieł-čyrvona-biełyja ściahi byli ŭźniatyja i ŭ Barysavie. Miascovyja zubroŭcy vyviesili ich u troch rajonach horadu. A ŭ Maładečnie adzin ź ściahoŭ źjaviŭsia nasuprać harvykankamu.

Barysaŭskija "zubry" zładzili j futbolny turnir na "Kubak niezaležnaści". Za ŭznaharodu 26-27 lipienia zmahalisia kamandy z Homielu, Barysava, Maładečna, Mahilova, Miensku dy Smalavičaŭ. Pieramahli haspadary.

Hałoŭny ž futbolny turnir adbyŭsia ŭ Miensku 27 lipienia. Zmahańnie za "Kubak Svabody imia Hienadzia Karpienki" stała samym kaalicyjnym śviatkavańniem hadaviny Deklaracyi. Hulali čatyry kamandy apazycyjnych partyjaŭ (BNF, AHP, BSDP (NH), PKB) i kamanda žurnalistaŭ. Kamanda žurnalistaŭ zapomniłasia dobraj i stabilnaj hulnioj, a kamanda Partyi BNF - stabilnym rasiejskim matam, jaki nie škadavaŭ vušej dzietak, što pryjšli pahladzieć na turnir. Kubak atrymali žurnalisty.

Štohod, adkryvajučy hety tradycyjny ŭžo turnir, palityki kazali: "Naleta budziem hulać na "Dynama"! Hetym razam vyrašyli pramaŭčać

Alaksiej Šein

• 0
• 0
• 0
• 0
• 0
• 0
• 0
• 0