26 і 27 ліпеня адбыліся дзясяткі мерапрыемстваў, прымеркаваных да Дня Незалежнасьці. Хоць у гэтыя два дні і абвяшчалася пра стварэньне кааліцый ды кааліцыяў кааліцый, сьвяткавалі апазыцыянэры ў асноўным незалежна адзін ад аднаго.
26 ліпеня Народная Грамада зладзіла міжнародную канфэрэнцыю да стагодзьдзя Беларускай сацыялістычнай грамады і 13-й гадавіны Незалежнасьці. Узровень дыскусіі даваў зразумець, што міжнародны сацыял-дэмакратычны рух перажывае крызіс ідэяў.
У гэты ж дзень Кансэрватыўна-хрысьціянская партыя БНФ усталявала ў Курапатах сорак новых крыжоў уздоўж кальцавой аўтадарогі.
27 ліпеня дэпутаты Вярхоўных Саветаў 12 і 13-га скліканьняў, чальцы групы "Рэспубліка" ды прадстаўнікі створанай увесну Асамблеі дэпутатаў мясцовых саветаў правялі сьвяточную вечарыну. Камэрнае мерапрыемства праходзіла ў менскай кавярні "Еляана". Выступаючы на сьвяткаваньні, Станіслаў Шушкевіч сказаў, што, на яго думку, адна з прычынаў прыходу ў 1994 г. да ўлады Лукашэнкі - тое, што "ВС 12-га скліканьня занадта хутка працаваў над прыняцьцем Канстытуцыі". На думку іншага сьпікера, Мечыслава Грыба, адмоўную ролю ў нашай далейшай гісторыі адыграла тое, што "падзеі "ціхай рэвалюцыі" не суправаджаліся ўсеагульным абнаўленьнем улады, у структурах якой засталіся кіраўнікі з былой савецкай намэнклятуры. Прыстасаваўшыся да новых умоваў і выкарыстаўшы сваё службовае становішча падчас перападзелу нацыянальнага багацьця, яны цяпер моўчкі пагаджаюцца з усім, што творыцца ў нашай краіне". Яшчэ адна праблема - у пачатку 90-х кіраўніцтва краіны ня мела адзінае думкі пра тое, як Беларусь будзе будаваць незалежнае жыцьцё і якія абіраць прыярытэты.
Арганізатары сустрэчы вырашылі сумясьціць прыемнае з карысным і проста ў кавярні падпісаць пагадненьне аб супрацы паміж "Рэспублікай" і Асамблеяй дэпутатаў мясцовых саветаў. У выніку каардынатар "Рэспублікі" Сяргей Скрабец подпіс паставіў, а каардынатары Асамблеі - пакуль ня ўсе.
У гэты ж дзень на сьвяточным паседжаньні ЦК БСДП (НГ) было дэкляраванае стварэньне Эўрапейскай кааліцыі, а пасьля, а 14-й, у Купалаўскім сквэры актывісты партыі ўсклалі кветкі да помніка паэту. Сабралося каля 40 чалавек. Да акцыі далучыліся прадстаўнікі "Маладога фронту", якія наладзілі пікет пад лёзунгам "Я люблю Беларусь!". Затрыманых не было, у адрозьненьне ад акцыі "зуброў", якая прайшла а 12-й на пляцы Незалежнасьці. На выхадзе з Чырвонага касьцёлу зуброўцы сталі з расьцяжкай "Жыве незалежная Беларусь!" і раздавалі ўлёткі-віншаваньні. Міліцыя затрымала некалькі актывістаў, а таксама сябра КХП-БНФ Рыгора Кійка, што якраз выходзіў з касьцёлу і вырашыў абараніць хлопцаў.
Сьвяткавалі Дзень Незалежнасьці і ў Празе. У адным з самых прэстыжных клюбаў "№11" у цэнтры чэскай сталіцы сабраліся прадстаўнікі беларускіх эміграцыйных арганізацыяў і чэскія палітыкі. На ўваходзе ў клюб віселі два велізарныя сьцягі: беларускі нацыянальны й чэскі дзяржаўны.
Гарадзенскія апазыцыйныя арганізацыі сустрэлі трынаццатую гадавіну Незалежнасьці вывешваньнем на высотных дамах у розных пунктах гораду бел-чырвона-белых сьцягоў. Усяго іх было пяць. Два сьцягі нараніцу 28-га яшчэ луналі над местам.
Бел-чырвона-белыя сьцягі былі ўзьнятыя і ў Барысаве. Мясцовыя зуброўцы вывесілі іх у трох раёнах гораду. А ў Маладэчне адзін зь сьцягоў зьявіўся насупраць гарвыканкаму.
Барысаўскія "зубры" зладзілі й футбольны турнір на "Кубак незалежнасьці". За ўзнагароду 26-27 ліпеня змагаліся каманды з Гомелю, Барысава, Маладэчна, Магілёва, Менску ды Смалявічаў. Перамаглі гаспадары.
Галоўны ж футбольны турнір адбыўся ў Менску 27 ліпеня. Змаганьне за "Кубак Свабоды імя Генадзя Карпенкі" стала самым кааліцыйным сьвяткаваньнем гадавіны Дэклярацыі. Гулялі чатыры каманды апазыцыйных партыяў (БНФ, АГП, БСДП (НГ), ПКБ) і каманда журналістаў. Каманда журналістаў запомнілася добрай і стабільнай гульнёй, а каманда Партыі БНФ - стабільным расейскім матам, які не шкадаваў вушэй дзетак, што прыйшлі паглядзець на турнір. Кубак атрымалі журналісты.
Штогод, адкрываючы гэты традыцыйны ўжо турнір, палітыкі казалі: "Налета будзем гуляць на "Дынама"! Гэтым разам вырашылі прамаўчаць
Аляксей Шэін
Цяпер чытаюць
Ад рэкету да продажу фота магіл. Як выглядае знутры групоўка Project X, якая вярбуе людзей для перавозкі мігрантаў з Беларусі ў ЕС9
Каментары