Vyspa Ŭkraina

U samy razhar žarściaŭ vakoł vyspy Tuzła mnie daviałosia pabyvać va Ŭkrainie na sustrečy pravaj moładzi, pryśviečanaj pašyreńniu Eŭraźviazu.

Ukraina siońnia nahadvaje ahramadnuju dziŭnuju vyspu. Płyvučy subkantynent płoščaj 600 tys. kv.km dy z nasielnictvam 48 młn čałaviek užo adyšoŭ ad bierahoŭ Rasiei j jašče nie prystaŭ da Eŭropy. Vyspa Ŭkraina ŭsio addalajecca i ad Biełarusi: skroź ukrainskaja mova, žoŭta-błakitnaja reklama j svajo, asobnaje žyćcio ŭ začaravanym płavańni.

Damba ad Kubani da Tuzły — apošniaja rasiejskaja sproba začapicca za vialikuju ŭkrainskuju vyspu — atrymałasia pa-miadźviežamu niaŭkludnaj. Usia Ŭkraina ŭžo katory tydzień burlić: nadta ŭžo vidavočnaj vyhladaje ahresija. I ŭłada, i apazycyja patryjatyčna ŭzbudžanyja; narod surjozna baicca vajny. Addaj rasiejcam Tuzłu — adkusiać Krym. Ukrainskija pamiežniki vystaŭlajuć kardon z pantonaŭ dy raskopvajuć ziemsnaradami pratoku: my — vyspa!

Jość u hetym niešta brytanskaje. Abo navat irlandzkaje.

Što cikava, i sama Biełaruś uvieś apošni hod ukrainizujecca — pieratvarajecca ŭ hieapalityčnuju vyspu postsavieckaha archipelahu. Vymušanaje dziaržaŭnictva ŭłady adasablaje nas ad Rasiei, i voś užo hasnuć maskoŭskija kanały, i ŭschodni bierah achinaje hazavaja smuha, i adzin tolki Alaksandar Ryhoravič, jak toj Leanid Daniłavič, viedaje, u jaki bok my ciapier drejfujem.

Maładyja eŭrapiejcy, što sabralisia na Kijeŭski forum, byli, vidać, krychu źbiantežanyja. Ahramada Ŭkrainy, Biełaruś dy Małdova ich pałochali j fihuravali ŭ razmovach jak smutny dalahlad Ajkumieny. Ukrainu aściarožna chvalili, Biełaruś uhołas škadavali, Małdovie pryhadvali kamunistaŭ.

Ukraincy nasiadali na Eŭropu, patrabujučy pryncypovaha rašeńnia ab terminie čarhovaha pašyreńnia.

Najlepšyja ŭražańni pakinuŭ Juščanka — na prezydenckich vybarach, što projduć va Ŭkrainie praz hod, jon jaŭny favaryt (rejtynh — 24%, u premjera Janukoviča — 14%). Hetki zdarovy intelihientny mužyk ź cichaj charyzmaj. Na sustrečy z eŭrapiejcami ja zapytaŭsia ŭ jaho pra Biełaruś. Pierakładčyki niečakana zamoŭkli — pytańnie było pa-biełarusku, — i zamiežniki pačali machać rukami: «In English!», «In Russian». A Juščanka z trybuny: «Kažycie pa-biełarusku, ja pierakładu!» Najvialikšaj pamyłkaj Eŭropy, pavodle Juščanki, było b skazać: «Biełaruś nie adbyłasia». I ŭžo da nas: «Zmahajciesia za Biełaruś, my z vami!»

Eŭrapiejcy zhodna kivali hałovami. Juščanku pravodzili avacyjami stojačy.

Pavał Sieviaryniec, lider niezarehistravanaha «Maładoha frontu»

• 0
• 0
• 0
• 0
• 0
• 0
• 0
• 0