Mašerava suprać Łukašenki

Deputatka pałaty pradstaŭnikoŭ Natalla Mašerava vyrašyła nia brać udziełu ŭ vybarach 17 kastryčnika. Pra heta jana zajaviła ŭ interviju radyjo «Svaboda»: «Voś ja prajdu i budu znoŭ tam siadzieć i ŭ mienšaści naciskać knopki. Sprava nia ŭ tym, što my tam dobryja ci drennyja. Treba pryncypova mianiać status parlamentu, nia prosta pašyrać paŭnamoctvy, a kanceptualna mianiać staŭleńnie da zakanadaŭčaj haliny ŭłady. Ja nia baču tam nijakaj mahčymaści, mnie ciažka tam pracavać i być źviazanaj pa rukach i nahach… Nie chaču. Chaču być palitykam».Dla spn.Mašeravaj być palitykam — značyć być volnym u svaich acenkach i dziejańniach. N.Mašerava, dačka byłoha pieršaha sakratara CK KPB, ciapier addaje pieravahu nie kamunistyčnaj, a sacyjał-demakratyčnaj idealohii. «Kamunistyčnaja idealohija, naturalna, u hetym tysiačahodździ ŭ čystym vyhladzie ŭžo nia moža być realizavanaj. Prosta heta nierazumna».

Što da mahčymaha svajho ŭdziełu ŭ prezydenckich vybarach 2006 h., to ciapier na hetuju temu N.Mašerava havaryć nia choča, bo pakul nijakaha rašeńnia nie prymała. U 2001 h. N.Mašerava ŭ apošni momant spałochałasia, niahledziačy na imklivy rost svajho rejtynhu, zafiksavany sacyjolahami paśla adnaje jaje zajavy pra hatoŭnaść balatavacca. Z ułaścivaj joj aściarožnaściu filolah Mašerava praviała piać hadoŭ u pałacie ŭ cieni šumnaj «Respubliki».

Spn.Mašerava nie zadavolena tym, što ŭ Biełarusi stanovicca zvyčkaju nehatyŭnaje staŭleńnie da luboha inšadumstva, raspalvajecca kanfrantacyja, što kraina maje drenny vobraz u śviecie: «Treba spyniać stvareńnie imidžu krainy pa adnym čałavieku. U nas kraina inšaja».

A voś što adkazała spn.Mašerava na pytańnie, što budzie ź Biełarusiaj, kali A.Łukašenka zastaniecca na treci termin prezydenctva: «U lubym razie, budzie kraina, jaki b ni byŭ kiraŭnik i kolki terminaŭ jašče ni prabudzie Alaksandar Ryhoravič, u lubym vypadku suverenitet budzie zachavany, a heta vielmi važna. My samastojnaja dziaržava, budziem šukać svajo miesca pamiž vialikaj Eŭropaj i vialikaj Rasiejaj».

Jak biespadstaŭnaje jana acaniła zakryćcio Eŭrapiejskaha humanitarnaha ŭniversytetu, a taksama nehatyŭna vykazałasia nakont zakryćcia karpunktu RTR u Miensku, što, na jaje dumku, moža istotna pahoršyć dvuchbakovyja dačynieńni Biełarusi j Rasiei.

Što aznačajuć hetyja vymoŭnyja zajavy papularnaje deputatki? Jak i Zianon Paźniak, N.Mašerava ličyć, što tolki prezydenckija vybary 2006 h. mohuć źmianić sytuacyju ŭ krainie. Dačka BSSRaŭskaha lidera taksama rasčaravanaja ŭ ciapierašnim kiraŭniku krainy. Bieź jaho spravy ŭ Biełarusi išli b lepiej, miarkuje jana. U hetaj svajoj pazycyi N.Mašerava adbivaje nastroi siaredniaha słoju hramadztva, jaki pa-raniejšamu nie prymaje Alaksandra Łukašenki, niahledziačy na rost dabrabytu i novuju rytoryku.

Upłyvovyja palitolahi Alaksandar Rar i Siarhiej Karahanaŭ dali zrazumieć, što Berlin i Maskva hatovyja padtrymać kandydaturu N.Mašeravaj. Sioleta deputatku Mašeravu prymali ŭ abiedźviuch hetych stalicach.

My kažam «Mašeraŭ» — i ŭspaminajem BSSR, my kažam «BSSR» — i ŭspaminajem Mašerava. A.Łukašenka staranna adradžaŭ BSSRaŭskija duch i tradycyi. Historyja dobra paśmiajecca, kali jamu pryjdziecca zmahacca z dačkoj Mašerava.

Mikoła Buhaj

• 0
• 0
• 0
• 0
• 0
• 0
• 0
• 0