Abvieščana čarhovaja sproba arhanizavać u Biełarusi vytvorčaść lehkavych aŭtamabilaŭ. Iranskich!..
Nazyvajucca «Pajkan». Ź biełaruskaha boku memarandum ab stvareńni ŭ Biełarusi, na bazie SEZ «Miensk» zboračnaha cechu iranskaj kampanii «Iran Khodro» padpisaŭ nie dyrektar niejkaha tam AAT «Abaranak», a staršynia kamisii pałaty pradstaŭnikoŭ Alaksiej Vahanaŭ. Vy hatovyja pierasieści z «Holfu» na «Pajkan» tolki tamu, što paśla vybyćcia Chusejna stratehičnym partneram Biełarusi abranyja ajatoły?
Jakraz u hety čas u Viarchoŭnym sudzie byłaja kiraŭnica spravaŭ prezydenta Halina Žuraŭkova vykazała nadzieju, što KDB viernie joj $1.633.273. Sa słovaŭ abvinavačanaj, hetyja hrošy zdali śledčym jaje siabry i svajaki ŭ jakaści kampensacyi za nibyta naniesienuju škodu dziaržavie, jakoj H.Žuraŭkova nie pryznaje. Jana ličyć, što prynosiła krainie karyść i stała achviaraj pastaŭščykoŭ nafty, jakija nikoha nie dapuskajuć na rynak, kab trymać zavyšanyja ceny na naftapradukty. Prakuror u adkaz źviarnuŭsia da sudu z prośbaj ahučyć pakazańni, jakaja H.Žuraŭkova davała padčas śledztva — i prysutnyja ŭ zali pačuli, jak jana jeździła ŭ Niamieččynu, kab atavarycca ŭ butykach, jak padnačalenyja padaryli joj 300 tys. dalaraŭ za paŭtara hodu…
Chto padpisaŭ ukazy ab manapolnym pravie žuraŭkoŭskaj «Biełaj Rusi» na impart cukru, nafty j tytuniu, dziakujučy čamu i źjaviłasia mahčymaść kraści miljony pa karupcyjnaj schiemie? Chto začyniaŭ niezaležnyja hazety, jakija bili ŭ zvon ab stvareńni karupcyjnaje schiemy? U cyvilizavanych krainach palityk, kiraŭnicu spravaŭ jakoha padazrajuć na try miljony, sychodzić u adstaŭku choć by na čas śledztva. (Chtości ŭ Biełarusi vieryć, što H.Žuraŭkovu apraŭdajuć?) A palityk, jaki stvaryŭ karupcyjnuju schiemu, maje prablemy z pravaachoŭnymi orhanami. A palityk, jaki začyniaje niezaležnyja ŚMI, vyklikaje padazreńni…
A tolki ŭ Biełarusi jon praciahvaje kiravać pracesam i navat, mahčyma, chutka pierasadzić nas usich za rul «Pajkanaŭ». Spadziajusia, što heta choć nia hužavy vid transpartu.
Barys Tumar, [email protected]
Kamientary