Kampanija «Gallup-Baltic Surveys» paviedamiła abahulnienyja vyniki ekzyt-połu (apytańnia vybarcaŭ na vychadzie z učastkaŭ dla hałasavańnia 17 kastryčnika).
U dadatak da vynikaŭ «referendumnaha» ekzyt-połu «Gallup» (tolki 48,4% «za») była prezentavanaja infarmacyja pra toje, jak biełarusy hałasavali na vybarach. Bolšaść padtrymała demakratyčnych kandydataŭ, śćviardžajuć sacyjolahi!
Vyniki ekzyt-połu staviać pad sumnieŭ amal usie vyniki, abvieščanyja Ł.Jarmošynaj. Pavodle sacyjolahaŭ (pamyłka nia moža być bolšaju za 1%), z 20 akruh, u jakich pravodziłasia apytańnie, tolki ŭ siami znajšlisia kandydaty, jakim u pieršym tury addali svaje hałasy bolš za 50% apytanych (pavodle vybarčych kamisij, deputaty byli vybrany va ŭsich 20-ci akruhach). Pryčym z hetych siami ŭ troch vybary byli biezalternatyŭnymi.
Cikava, što tolki ŭ dźviuch z hetych siami akruh kandydatam ad ułady nie supraćstajali demakraty. A ŭ adnoj, dzie išoŭ dvuboj mocnaha demakratyčnaha kandydata i łukašenkaŭcaŭ, — u mienskaj Staravilenskaj akruzie — ekzyt-poł zafiksavaŭ sapraŭdy elehantnuju pieramohu dyrektara Biełaruskaha liceju Ŭładzimiera Kołasa — 63,27% hałasoŭ!
Druhi tur
Źviestki ekzyt-połu śviedčać: kab hodna vystupić suprać ułady, apazycyja musiła b maksymalna zhurtavacca, zaklikać vybarščykaŭ addać hałasy za adzinaha kandydata-demakrata. U cełym u Miensku, Barysavie i Vaŭkavysku za kandydataŭ ad «Piaciorki-plus», «Eŭrapiejskaj kaalicyi» i «Respubliki» razam uziatych hałasavali 55—65% vybarcaŭ. U Voršy, Žłobinie, Navapołacku, Horadni i viaskovych rajonach bolšaść hałasoŭ sabrali vyłučency ŭłady. Ale navat pry takim raskładzie apazycyjnyja kaalicyi realna mahli raźličvać na 5—7 mandataŭ u 20 akruhach. Naprykład, biespartyjny kandydat mieŭ realny šaniec pieramahčy ŭ Vaŭkavysku. Pradprymalniku Mikałaju Aŭtuchoviču ekzyt-poł davaŭ u pieršym tury 45,61% suprać 42,40%, jakija atrymała dyrektarka himnazii №2 Tamara Navasad, i mahčyma, što jamu ŭ druhim tury adyšli b hałasy kandydataŭ ad partyj «Piaciorki-plus», što padzialili reštu. Hienerał Frałoŭ u mienskaj Masiukoŭščynskaj akruzie sastupaŭ łukašenkaŭcu 35:37, ale ŭ druhim tury mieŭ realnyja šancy pieramahčy, bo jašče 23% hałasoŭ u akruzie ŭziali kandydaty ad «Piaciorki-plus».
Recepty dy antyrecepty
Apazycyja mieła najhoršyja vyniki na vybarach u akruhach, dzie niekalki małaviadomych palitykaŭ spaborničali z papularnym favarytam ułady. Prykład — akruha №27 u Voršy, dzie Ŭładzimier Žvikaŭ, biespartyjny deputat PP NS, pieramoh u pieršym tury i pa-aficyjnamu, i pa-hiełapaŭsku (75,68%), a siarod astatnich piaci kandydataŭ, uklučna z Fadziejem Šamaravym (PKB, 3,15%) dy Fiodaram Muchanavym (BSDP (NH), 7,21%), nie było takoha, chto b nabraŭ bolš za 8%.
Recept pieramohi — adziny kandydat-demakrat. Hety varyjant vydatna spracavaŭ u akruzie Ŭładzimiera Kołasa. Sacyjolahi rajać: kali demakraty chočuć udzielničać u prezydenckich vybarach-2006, jany musiać vyznačycca z adzinym kandydatam.
U ślozy — nia varta, u skoki — zarana
Vyniki ekzyt-połu dajuć apazycyi aściarožnyja padstavy dla aptymizmu: pry sumlennaści padliku hałasoŭ demakraty mieli šancy prajści ŭ parlament. A kali b pieradvybarnaja kampanija była raŭnapraŭnaj, pieramoha nie była b niemahčymaj. Viadoma, što samych prachodnych kandydataŭ ad apazycyi (za małym vyklučeńniem) «zarubili» jašče da vybaraŭ. Tym nia mienš, za kandydataŭ demakratyčnych kaalicyj u cełym u krainie prahałasavali 47% vybarcaŭ. A kali adkinuć tyja akruhi, dzie kandydataŭ-demakrataŭ nie zarehistravali, dyk i 54%.
Infarmacyja «Gallup» nie dazvalaje adnaznačna skazać, chto mieŭ bolšy pośpiech na vybarach — ułada ci apazycyja. Adnak jana daje mahčymaść acanić taktyku i prahnazavać mahčymy zychod vybaraŭ pry raznastajnych raskładkach.
AK
