Baskietboł pa-biełarusku

Mienski «Vitalur» u matčy z «Horadniaj-93» viadzie ŭ finale mužčynskaha čempijanatu pa baskietbole ź likam 2:0. Kali prezydentam klubu «Horadnia-93» byŭ Aleś Milinkievič, kamanda vystupała macniej, piša Aleh Rajaviec.

U minułyja piatnicu i subotu supierniki praviali dva pajadynki ŭ stalicy. 6 traŭnia (i, kali spatrebicca, 7 traŭnia) finalisty zhulajuć u horadzie nad Niomanam. «Vitaluru» dastatkova raz pieramahčy, i hiehiemonija vaśmirazovych čempijonaŭ Biełarusi budzie spyniena.

Novyja favaryty

«Vitalur» — pierajemnik staličnaj RŠVSM (Respublikanskaja škoła vyšejšaha spartovaha majsterstva). Letaś (sezon 2003/2004) RŠVSM upieršyniu startavała ŭ biełaruskim pieršynstvie — i adrazu zavajavała «bronzu». Potym nad kamandaj uziała apieku firma «Vitalur», bujny imparter ryby i rybnaj pradukcyi — klub pamianiaŭ nazvu i ŭmacavaŭsia šeraham mocnych hulcoŭ.

A voś šmatrazovy čempijon krainy (1996, 1998—2004) «Horadnia-93» minułym letam panios značnyja straty. Klub pakinuŭ nia tolki hałoŭny trener zbornaj Biełarusi, samy viadomy ajčynny specyjalist Alaksandar Barysaŭ, ale j šerah viadučych hulcoŭ. Tak, Uładzimier Šarko, Alaksiej Pyncikaŭ i Dzianis Koršuk pierajšli jakraz u «Vitalur», pryvablenyja lepšymi «ŭmovami». Tak što jašče na starcie sezonu eksperty pradrakali mienčukam załatyja medali pieršynstva. Praŭda, haradziencam prahnazavałasia tolki «bronza».

Čempijanat biaz zali

U «Vitaluru», patencyjnaha čempijona Biełarusi, niama narmalnaj, jak z zaŭziatarskaha hledzišča, baskietbolnaj zali. «Vitalur» pravodzić chatnija pajadynki ŭ spartovym kompleksie «Haryzont», što la hałoŭnaha ofisu zavodu. Ale hladackaja trybuna tam adna, pryčym na balkonie.

U piatnicu ŭ spartkompleksie naziraŭsia «anšlah». Kala sotni zaŭziataraŭ raźmiaścilisia adrazu za levym kołcam: niechta pasieŭ na himnastyčnyja łavy, chtoś pryciahnuŭ adniekul kresły, bolšaść stajali. Zrabić toje samaje za pravym kołcam jany nie mahli: hłuchaja ściana. Trybun uzdoŭž piaredniaj linii niama, tut raźmiaščajucca łaŭki treneraŭ, zapasnych i arbitraŭ. Z advarotnaha boku placoŭki — akno z pryhožym vidam na vulicu Kujbyšava.

Tamu druhaja sotnia zaŭziataraŭ, u tym liku i karespandent «NN», akupavała balkon. Na pieršym paviersie balkonu — u adzin šerah łaŭki, dzie pasieli tyja, chto pryjšoŭ zahadzia. Astatnija stajali na «druhim paviersie». U pryncypie, ničoha strašnaha, vosiemdziesiat chvilin adstaiš. Tolki ŭ vialikim pierapynku nia toje što nia sydzieš u bar — navat nia stupiš paru krokaŭ nazad da ściany parazmaŭlać pa mabilniku. Bo tvajo miesca zojmie ščaślivy kaleha-zaŭziatar, jaki spaźniŭsia na matč i dźvie dziesiacichvilinki stajaŭ na dybačkach za tvajoj śpinaj.

Dzień pieršy

«Vitalur», jak i naležyć favarytu, pieršym pakłaŭ u košyk dva punkty. Zrabiŭ heta Dzianis Koršuk, jaki, darečy, piać razoŭ stanaviŭsia čempijonam Biełarusi ŭ składzie «Horadni-93». Zarabiŭ «Vitalur» i pieršy foł — jon na rachunku Eduarda Pryjmy, — i pieršy słem-dank (heta kali miač zabivajuć u kołca źvierchu). Jon taksama na Pryjmavym rachunku.

Pieršuju čverć matču «Horadnia» nie adpuskała mienčukoŭ bolej čym na try-čatyry punkty. Ale potym «Vitalur» irvanuŭ napierad. Čuvać byŭ tolki skryp i šorhat krasovak pa parkiecie. Pry liku 17:13 za dvaccać sekundaŭ da skančeńnia pieršaj čverci trener mienskaha klubu Michaił Fejman uziaŭ tajm-aŭt. Navošta? «Vitalur» pravioŭ vynikovuju ataku i pajšoŭ na pierapynak z žyćcieśćviardžalnym adryvam u siem punktaŭ — 20:13. U druhoj čverci «Vitalur» zamacavaŭ svaju pieramohu — 46:33. Zdavałasia, što ŭsio: Horadnia «papłyła». Ale vychavancy Siarhieja Pahrabniova nie raskiśli, a, ścisnuŭšy zuby, pačali skaračać adstavańnie ŭ liku. Hulnia veteranaŭ klubu Jurja Kačana dy Andreja Vasileŭki, asabliva pierachopy miača pad svaim ščytom, nia raz sarvali apładysmenty mienskaj publiki. I ŭ siaredzinie apošniaj čverci haradziency amal dastali «Vitalur» — 74:69. Ale ž paru razoŭ stracili miač pad «varožym» ščytom, a mienčuki takich chibaŭ nie daravali. Finalny lik — 78:69.

Dzień druhi

U subotu matč pačynaŭsia a 12-j, što było vielmi zručna: a 19-j u staličnych klubach u žyvym etery pakazvali futbolny matč anhielskaj premjer-lihi pamiž «Bołtanam» i «Čełsi», dzie klub Ramana Abramoviča aformiŭ čempijonstva. A 16-j na stadyjonie «Traktar» pačynaŭsia adzin z hałoŭnych matčaŭ futbolnaha pieršynstva: MTZ-RIPA — «Šachcior» (Salihorsk). Zaŭziatar, što siadzieŭ pobač sa mnoj, navat paśpieŭ na druhi tajm matču rasiejskaj futbolnaj premjer-lihi miž «Zenitam» i «Lakamatyvam», jaki pačaŭsia a 13-j pa mienskim časie.

U paraŭnańni ź piatnicaj hledačoŭ pamienšała napałovu. «Anšlah» 29 krasavika, vidać, byŭ abumoŭleny kancom pracoŭnaha dnia. A ŭ subotu bolšaść paspalitaha ludu tresłasia ŭ transparcie, kirujučysia na Kamaroŭku. Usio ž na nastupny dzień byŭ pravasłaŭny Vialikadzień.

Pieršaja pałova matču naradziła intryhu. Paśla pieršaj čverci «Horadnia» viała ź likam 22:21. U druhoj čverci biez baraćby spačatku addała dziesiać ačkoŭ mienčukam, a potym kinułasia naŭzdahon — 39:42. A voś treci peryjad staŭ fatalnym dla hadavancaŭ Siarhieja Pahrabniova: jany nabrali tolki čatyry (!) ački i pajšli na apošni pierapynak, sastupajučy dvaccać punktaŭ — 43:63.

Častka hledačoŭ pakinuła zalu, astatnija sfakusavalisia na indyvidualnym majsterstvie hulcoŭ. Apladziravali «trochačkovikam» «mienčukoŭ» Uładzimiera Šarka, Hieorhija Kandrusieviča i Dzianisa Koršuka i «haradzienca» Andreja Vasileŭki, jaki nabraŭ najbolšuju kolkaść bałaŭ u matčy — 18.

Apošni ŭ adzinočku zaciata zmahaŭsia za kožny metar placoŭki, pokul jahonaja kamanda adbyvała numar. Eks-haradzieniec, a siońnia kapitan «Vitaluru» Ŭładzimier Šarko naahuł patrapiŭ u kołca metraŭ ź dziesiaci, vyklikaŭšy avacyi.

Paviesialiŭ chłopčyk-servismen. U treciaj čverci pad kołcam «Horadni» ŭ vyniku baraćby ŭtvaryłasia vieličeznaja mokraja plama. Chłopčyka, jak Śniahurku, klikali chviliny dźvie. Źjaviŭsia małady čałaviečak sa švabraj vyšej za hałavu i… uračysta addaŭ jaje «vitaluraŭcu» Kandrusieviču. Toj ź viedańniem spravy — usio ž dziesiać hadoŭ pravioŭ u baskietbole — pracior placoŭku. Šuravańnie dało plon. Rozyhryš miača — dva ački ŭ «košyku».

Finalny śvistok zafiksavaŭ kančatkovy lik — 79:58. Ja byŭ pasunuŭsia paśla matču pa kamentar da S.Pahrabniova (nakont pryčyn pravału ŭ druhoj pałovie hulni), ale, ubačyŭšy jahony strašenna stomleny i spustošany tvar, schavaŭ dyktafon u sumku.

Sucelnyja prablemy

Słovazłučeńnie «biełaruski baskietboł» prymusić zaŭziatara lišni raz uzdychnuć. Žanočy čempijanat krainy składajecca z čatyroch klubaŭ. U kastryčniku na start mužčynskaha pieršynstva vyjšli vosiem kamandaŭ, da finišu dabralisia siem. «Barysaŭ» praź finansavuju nendzu źniaŭsia z čempijanatu.

Va ŭsim śviecie baskietboł źbiraje pa 10—15 tys. hledačoŭ na trybunach, na čym možna źbirać niemałyja hrošy. Baskietboł (pieradusim zaakijanski i eŭrapiejski) — vidoviščnaja hulnia. Tut nie zaśnieš, jak na futbole, čakajučy 90 chvilin adnaho miača. Padziei źmianiajucca vielmi chutka (na ataku — 24 sekundy). Pry narmalnym staŭleńni da baskietbołu Biełaruś mahła b stać mocnym areškam u Eŭropie, a nie cielapacca na zadvorkach. U 1994 h. na moładzievym čempijanacie Eŭropy my byli pieršymi. Dyj hienafond naš blizki da litoŭskaha. Ale stolki stracili za dziesiać hadoŭ.

Sychodziačy z subotniaha pajadynku, złaviŭ siabie na paradaksalnaj dumcy: voś jašče adzin arhument hałasavać na vybarach-2006 za Milinkieviča. Byŭ ža jon prezydentam klubu «Horadnia-93», pryčym jakraz u 1995/96 hh., kali haradziency zavajavali svajo pieršaje «zołata». Niaŭžo, kali stanie prezydentam, pakinie lubimuju hulniu pa-za ŭvahaj? Bo ŭ siońniašniaj sytuacyi spadziavacca na padtrymku baskietbołu z boku ŭładaŭ nie vypadaje. A vielmi chočacca vidoviščaŭ i narmalnaha staŭleńnia da hledača.

• 0
• 0
• 0
• 0
• 0
• 0
• 0
• 0