З усіх старон

Пра Беларусь ва Ўроцлаве

Ва Ўроцлаве 28—29 кастрычніка пройдзе кaнфэрэнцыя «Польскaя ўсходняя пaлітыкa». Мерапрыемства ладзіць недзяржaўны фонд «Кaлегіюм Усходняе Эўропы» пры ўдзеле Міністэрствa зaмежных спрaў Польшчы, катэдры па вывучэньні Ўсходняе Эўропы пры Вaршaўскім унівэрсытэце ды мэра Ўроцлaвa.

Мяркуецца, што ў адкрыцьці кaнфэрэнцыі возьме ўдзел міністaр зaмежных спрaў Польшчы Адам Ротфэльд.

Алесь Курсевіч

Пасол з Алтаю ў Беларусь

Як стала вядома газэце «Коммерсантъ», Крэмль узгадніў з А.Лукашэнкам кандыдатуру новага расейскага пасла ў Менску. Ім стане былы алтайскі губэрнатар Аляксандар Сурыкаў. Апошні час ён займаў пасаду памочніка прадстаўніка Пуціна ў Сібірскай фэдэральнай акрузе.

Адамкус адвёў душу перад Шродэрам

У часе візыту ў Бэрлін літоўскі прэзыдэнт Валдас Адамкус пайшоў на канфлікт з экс-канцлерам Герхардам Шродэрам, паведамляюць нямецкія газэты. Свае рэзкія прэтэнзіі на адрас бэрлінскага кіраўніцтва Адамкус выказаў як падчас асабістай сустрэчы са Шродэрам у Бэрліне, так і ў размове зь нямецкімі журналістамі.

Мова ідзе пра нямецка-расейскае пагадненьне аб будаўніцтве трубаправоду ў абыход усходнеэўрапейскіх краінаў і пра нямецкую палітыку адносна афіцыйнага Менску. Паводле ягоных словаў, і Нямеччына, і Эўропа пакінулі без падтрымкі беларускі народ і дэмакратычную апазыцыю. Як паведамляюць нямецкія мэдыі, экс-канцлер Шродэр застаўся незадаволены, што размова паміж ім і Адамкусам адбылася больш чым шчырая і адкрытая.

Адамкус выказаў надзею, што Ангеле Мэркель удасца «паўплываць на няўдалыя рашэньні Шродэра».

У абарону авечак

У Новай Зэляндыі забароняць гуляць у рэгбі з авечкамі. У краіне вельмі папулярныя так званыя гульні з жывёламі ў перапынках паміж матчамі ў рэгбі. Дзеці ганяюцца за авечкамі, апранутымі ў спартовую форму, адпрацоўваючы тым самым гульнявыя сутыкненьні і захваты. Свой катэгарычны пратэст выказалі таварыствы па ахове жывёлаў, і цяпер жывёлін пакінуць у спакоі. Між тым авечкі ўвайшлі ў гісторыю навазэляндзкага спорту №1 ня толькі гэтым. Знакаміты гулец Колін Мідз бегаў па ўзгорках зь дзьвюма авечкамі пад пахамі, трэніруючы тым самым выносьлівасьць.

Мікола Бугай

• 0
• 0
• 0
• 0
• 0