Больш за палову насельніцтва Беларусі штодня глядзяць тэлевізар, і больш за чвэрць слухаюць радыё. Але гэтыя паказчыкі змяншаюцца. Thinktanks.by прааналізаваў статыстыку за вясну 2024 года.
Паводле даных mediameter.by, у маі 2024 года 52,84% беларусаў глядзелі тэлевізар кожны дзень. У параўнанні з папярэднімі месяцамі паказчык прыкметна ўпаў. У красавіку 2024 года сярэднесутачны ахоп аўдыторыі склаў 56,36%, у сакавіку — 58,33%.
Па слухачах радыё няма статыстыкі за травень 2024 года. У красавіку ж сярэднесутачны ахоп радыёслухання склаў 27,2%, у сакавіку — 26,8%.
Аўдыторыя тэлебачання
У сярэднім вясной 2024 года кожны дзень тэлевізар глядзелі 55,8% беларусаў, вясной жа 2023 года тэлегледачоў налічвалася 57,67%.
У траўні 2024 года ў параўнанні з мінулым месяцам скараціўся сярэднесутачны час прагляду ТБ сярод насельніцтва — мінус 11,56%. Калі ў красавіку ў дзень тэлевізар у сярэднім глядзелі 199 хвілін, то ў траўні — 176 хвілін.
Максімальны аб'ём аўдыторыі ў траўні быў зафіксаваны і ў будні, і ў выхадныя — з 18:30 па 23:00.
У траўні бягучага года сярод тэлегледачоў доля жанчын была вышэйшая, чым доля мужчын — 62,8% супраць 37,2% адпаведна.
Таксама ў траўні скарацілася колькасць тэлегледачоў ва ўзроставых групах 55-64 і 65+ гадоў, а колькасць гледачоў у групах 4-17, 18-34 і 35-54 гадоў павялічылася.
Аўдыторыя радыё
У красавіку 2024 года штодня слухалі радыё 728 тысяч беларусаў. Пры гэтым часцей яго слухалі ў Гродзенскай і Брэсцкай абласцях, радзей — у Мінскай.
У красавіку сярэдні час слухання радыё склаў: 62 хвіліны ў дзень сярод усяго насельніцтва, 228 хвілін у дзень сярод слухачоў.
У адрозненне ад тэлевізара, слуханню радыё аддаюць перавагу мужчыны. У красавіку бягучага года палавая структура выглядала наступным чынам: 53% мужчын і 47% жанчын.
34% радыёслухачоў — гэта людзі ва ўзросце 35-44 гадоў.
Перавагі беларускіх тэлегледачоў і радыёслухачоў
У маі 2024 года самым папулярным жанрам на тэлебачанні сталі кінапраграмы, іх прагляду аддаюць перавагу 48% апытаных беларусаў. На другім месцы забаўляльныя праграмы з 17% аўдыторыі.
Самымі папулярнымі каналамі сярод насельніцтва Беларусі сталі: Расія-Беларусь, АНТ, НТВ-Беларусь.
Радыё беларусы слухаюць у асноўным на працы — 44%, ці ў машыне — 36%. Самымі папулярнымі радыёстанцыямі сталі: РадыёРОКС (шансон), Радыё Юністар (поп), Новае Радыё (поп).
Лукашэнка прыгразіў Расіі вайной у выпадку далучэння Беларусі43
Лукашэнка прыгразіў Расіі вайной у выпадку далучэння Беларусі
«Дамоклаў Меч». Канал «Белорусскій сіловік» настолькі прарасійскі, што многія меркавалі: гэта расіяне яго вядуць. Не, за ім стаіць суперагент Лукашэнкі4040
Каментары