Нафтавы баланс могуць узгодніць на найбліжэйшым пасяджэнні Саюзнага Саўміна

Беларусь і Расія дамовіліся ўзгадніць нафтавы баланс на 2013 год на найбліжэйшым пасяджэнні Савета міністраў Саюзнай дзяржавы.

Мінэнерга РФ і Мінэканомікі Беларусі даручана завяршыць узгадненне балансаў па нафце і нафтапрадуктах на 2013 год і ўнесці іх на разгляд чарговага пасяджэння саюзнага ўрада, якое можа прайсці ў верасні-кастрычніку.

Балансы паліўна-энергетычных рэсурсаў, якія рэгулярна ўзгадняюць абедзве краіны, складаюцца з сямі пазіцый: газ, нафтавая сыравіна, аўтамабільны бензін, дызпаліва, топачны мазут, вугаль і электраэнергія. Да гэтага часу ўзгодненыя тры балансы на 2013 год — па прыродным газе, электраэнергіі і вугалі.

Баланс нафтавай сыравіны, дзе прапісаныя аб’ёмы паставак у Беларусь расійскай нафты, на ўвесь 2013 год пакуль не ўзгодненыя.

Паводле інфармацыі БелаПАН, пасля таго, як будзе вырашанае гэтае пытанне, Беларусь і Расія падпішуць і іншыя балансы — па бензіне, дызпаліве і топачным мазуце. Пакуль жа Расія ажыццяўляе пастаўкі нафты ў Беларусь у рамках графікаў паставак, якія зацвярджаюцца штоквартальна.

Вырашэнне пытання па нафтавым балансе расійскі бок увязвае з ходам рэалізацыі двухбаковых праектаў у рэальным сектары эканомікі.

У прыватнасці, у ліпені гэтага года Мінэнерга Расіі заявіла: пастаўляючы нафту ў Беларусь на бяспошліннай аснове, расійскі бюджэт нясе страты. Кампенсаваць гэтыя страты расійскі бок лічыць магчымым шляхам стварэння СП на базе буйных прадпрыемстваў Беларусі і Расіі.

Цяпер абмяркоўваецца магчымасць рэалізацыі сумесных праектаў на базе МАЗа і КамАЗа, Мінскага завода колавых цягачоў, «Гродна Азота», «Інтэграла».

Пры гэтым расійскі бок не раз выказваў незадавальненне хуткасцю рэалізацыі такіх праектаў. «Праект па аб’яднанні МАЗа і КамАЗа абмяркоўваецца ўжо паўтара года, за гэты час можна было рэальна нарасціць выпуск абедзвюх мадэлей», — заяўляў вясной гэтага года ў інтэрв’ю БелаПАН пасол РФ у Беларусі Аляксандр Сурыкаў.

На думку экспертаў, калі канкрэтных крокаў па рэалізацыі беларуска-расійскіх праектаў у рэальным сектары не адбудзецца, узгадненне нафтавага балансу будзе працягвацца ў штоквартальным рэжыме.

Тым часам беларускі бок ініцыюе падпісанне нафтавага балансу адразу на год, як гэта было да гэтага года. Першы віцэ-прэм’ер Уладзімір Сямашка ў жніўні паведаміў, што расійскаму боку прапанавана падпісаць паліўна-энергетычны баланс не толькі да канца 2013-га, але і на ўвесь 2014 год.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ