Нямецкая кампанія e-volo распрацавала 18-ротарны двухмесны лятальны апарат Volocopter VC200 і гатовая правесці першы палёт у бліжэйшыя месяцы, піша Wired.
Двухмесны апарат з электраматорам можа разганяцца да 100 км/г і лётаць на вышыні да 2 км. Апарат кіруецца джойсцікам — так жа лёгка, як невялікія беспілотнікі, сцвярджаюць стваральнікі.
Вялікая колькасць ротараў забяспечвае стабільнасць апарату ў паветры і лёгкасць кіравання, а таксама прадухіляе здарэнні ў выпадку непаладак аднога з іх. Wired параўноўвае кіраванне апаратам з кіраваннем аўтамабілем ў паветры.
З 2013 года Volocopter VC200 выпрабоўваецца як беспілотны апарат, але ў бліжэйшыя месяцы правядуцца выпрабаванні з жывым пілотам. Папярэдні апарат e-volo, VC1, стаў першым мультыкоптарам, што перавозіў людзей.
e-volo разлічвае на камерцыйную вытворчасць VC200 і яго продаж па цане каля 340 тысяч даляраў. Стваральнікі апарата працуюць над новым інтэр’ерам кабіны, абнаўленнем электроннага начыння і больш трывалымі батарэямі — на сёння «валакоптар» можа правесці ў паветры толькі 20-30 хвілін.