Сябра прэзідыума Каардынацыйнай рады, былы кіраўнік стачкама МТЗ Сяргей Дылеўскі расказаў «НН» пра свае справы пасля звальнення з завода.
«У адзін дзень пасля змены ля завода мяне чакалі супрацоўнікі КДБ. Яны прадставіліся, паказалі «корачкі».
Мы прайшлі на гутарку ў цудоўны цёмна-сіні аўтобус. Гучалі пагрозы ў бок маёй сям’і, не хачу іх агучваць. Пасля гэтага ў мэтах бяспекі давялося вывезці сям’ю ў Польшчу, цяпер у іх усё нармальна, імі апякуецца наша дыяспара», — сказаў Дылеўскі.
Ехаць следам за жонкай і сынам сам Дылеўскі не спяшаецца. «Пакуль не разглядаю такой магчымасці», — кажа ён.
Ці шукае новую працу Сяргей пасля таго, як яго вымусілі звольніцца з МТЗ?
«Нашы людзі настолькі чароўныя, што мяне ўжо засыпалі прапановамі працы. Выходзіць, што не я шукаю працу, а яна шукае мяне. Мне падабаюцца аўтамабілі, канечне, па трэку ганяць мяне ніхто не возьме працаваць, а гайкі круціць я магу».
«Крыўдна, канечне, што са мной так абышліся на заводзе, — кажа Дылеўскі. На МТЗ працуюць таксама ягоныя мама і тата. — Ціснулі праз бацькоў, мая мама працуе з заробкамі, казалі, што заўсёды ў гэтай сферы можна нешта знайсці, калі пашукаць».
«Працягваем працаваць, куды тут спыняцца», — адказвае Дылеўскі пра свой далейшы ўдзел у палітыцы.
Сяргей Дылеўскі — адзіны сябра прэзідыума Каардынацыйнай рады, які не выехаў з Беларусі і знаходзіцца на волі. У жніўні-верасні ён адседзеў 25 сутак адміністрацыйнага арышту.
Цяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»20
Каментары