Ва ўзросце 39 гадоў памёр рэдактар вілейскай раёнкі Сяргей Ганчар. Ён перанёс кавід
У Вілейцы 13 снежня памёр былы дырэктар краязнаўчага музея, галоўны рэдактар раённай газеты «Шлях перамогі» Сяргей Ганчар. Яму было 39 гадоў, піша kraj.by.
Без бацькі засталася маленькая дачка. Сябры распавядаюць, што каля месяца таму ён перанёс кавід. Яны мяркуюць, што, магчыма, Сяргей памёр ад наступстваў каранавіруса.
Па словах сяброў, якія ведалі Сяргея са школы, ад яго пастаянна зыходзіла добрае святло.
«Свяцілася ўся Вілейка, — распавядаюць сябры. — Гэта быў рознабаковы пазітыўны чалавек, які гуляў у КВЗ, арганізоўваў і праводзіў творчыя конкурсы, быў адкрыты і спагадны з усімі людзьмі».
Дырэктар Вілейскага краязнаўчага музея Надзея Аўдзей распавяла kraj.by: «Калі ён працаваў дырэктарам музея, ніякай дыстанцыі з падначаленымі ў яго не было. Ён не быў падобны да начальніка. Ён быў падобны да сонца. Я заўсёды называла яго сонцам».
На пасадзе дырэктара Вілейскага краязнаўчага музея Сяргей Ганчар працаваў з сакавіка 2008 года па 2016 год.
«Сяргей паказваў сваю Вілейшчыну ва ўсёй красе ў розных СМІ, у тым ліку, па тэлебачанні. Ветлая добрая ўсмешка ніколі не сыходзіла з яго твару. Смерць Сяргея Ганчара для ўсіх нас стала вялікім ударам і страшным горам. Страта — незаменная», — кажа супрацоўніца музея Надзея Аўдзей.
Цяпер чытаюць
Мсціслаў Мекта: яшчэ адзін рэцыдывіст рвецца ва ўладу, прыкінуўшыся спецназаўцам-ябацькам15
Каментары