Аварыя з вадой у Жодзіне: яна вярнулася, але ўжываць яе можна пакуль толькі пасля кіпячэння
У Жодзіне 18 сакавіка з-за аварыі частка горада засталася без электрычнасці, а потым і ўвесь горад — без вады. Неўзабаве яна з'явілася, але ёю нават страшна мыць рукі, не тое што піць, кажуць мясцовыя жыхары. А вось што кажуць мясцовыя службы, піша Tut.by.
![](http://nnexpictures.fra1.digitaloceanspaces.com/img/w732d4webp1/photos/z_2021_03/mer_zhodino_20181012_bur_tutby_phsl_-2826-d3idz.jpg.webp)
Раніцай 18 сакавіка частка Жодзіна засталася без электрычнасці. У МНС паведамілі, што гэта адбылося з-за пашкоджання кабеля 10 кВ. Паводле афіцыйных даных, без электразабеспячэння заставаліся 58 шматкватэрных жылых дамоў, 22 трансфарматарныя падстанцыі і бальніца. У 13.50 электразабеспячэнне было адноўлена.
Але адключэнне электраэнергіі прывяло да адключэння размеркавальнага пункта на падстанцыі БЕЛАЗа, што сілкуе большую частку горада, у тым ліку і водазабор «Паўночны».
Пасля таго, як з'явілася электрычнасць, з'явілася і вада. Але, як кажуць мясцовыя жыхары, ёю нават страшна было мыць рукі.
Днём у чацвер галоўны санітарны доктар Жодзіна Сяргей Канавалаў, паведаміў, што пасля аднаўлення водазабеспячэння ўзятыя пробы вады: гэта з'яўляецца стандартнай працэдурай пры адключэнні водазабеспячэння больш чым на дзве гадзіны. Ён удакладніў, што да вынікаў экспертызы ваду, як і пасля прамыўкі водаправодных камунікацый, ужываць у ежу не рэкамендуецца. Асабліва гэта тычыцца сацыяльных аб'ектаў: дзіцячых садоў, школ, бальніцы і гандлю.
![](http://nnexpictures.fra1.digitaloceanspaces.com/img/w732d4webp1/photos/z_2021_03/voda_v_zhodino-18032021-8mh8e.jpg.webp)
Сёння было паведамлена, што санітарна-хімічныя паказчыкі вады ў норме. А вось вынікі бактэрыялагічнага аналізу будуць вядомыя пазней.
— Варта ўдакладніць, што пасля кіпячэння ваду можна ўжываць у ежу, — напісалі «Жодзінскія навіны».
Не ўсе гэтыя мясцовыя жыхары з гэтым згодныя. Адна з жыхарак паведаміла, што з вадой праблем ужо няма. Яшчэ двое даслалі фатаграфіі вады, якая працягвае цячы з-пад крана раніцай 19 сакавіка.
Мясцовыя камунальныя службы рэкамендуюць добра зліць ваду: «магчыма, застаялася ў трубах, дайце вадзе сцячы».
Жыхароў Жодзіна таксама абурае рэакцыя мясцовых уладаў на аварыю: «Не было ніякага інфармавання, пітную ваду ў крамах умомант разабралі, а цыстэрны не падагналі».
Каментары