Навукоўцы нанава адкрылі від кавы, які дзесяцігоддзямі ніхто не бачыў у прыродзе. Па іх словах, гэтая расліна можа дапамагчы забяспечыць будучыню кавы, якая зараз знаходзіцца пад пагрозай праз змену клімату.
Даследчыкі, праца якіх была апублікаваная ў часопісе Nature Plants, сцвярджаюць, што вузкаліставая кава — так гучыць назва расліны — лепей вытрымлівае высокую тэмпературу, чым іншыя віды кавы. У прыватнасці, размова ідзе пра аравійскую каву (арабіку) і каву рабуста, якія складаюць адпаведна 56 і 43 працэнты сусветнай вытворчасці кавы. У дадатак, вузкаліставая кава, па словах экспертаў, мае цудоўны водар, падобны да арабікі, піша Reuters.
Шмат фермераў з краін, дзе расце кава, ужо адчуваюць дрэнныя наступствы змены клімату. Напрыклад, ад пацяплення пакутуе арабіка, і даследчыкі лічаць, што сусветная вытворчасць гэтага віда кавы можа паменшаць да сярэдзіны стагоддзя як мінімум у два разы. Для індустрыі, кошт якой ацэньваецца ў шмат мільярдаў даляраў, гэта сур’ёзная пагроза.
Брытанскі батанік Ааран Дэвіс, кіраўнік даследавання, пра якое ідзе гаворка, лічыць, што вузкаліставая кава можа ў такім выпадку забяспечыць нармальнае функцыянаванне індустрыі вытворчасці кавы. Гэта важна, бо індустрыя падтрымлівае эканоміку некалькіх трапічных краін і з’яўляецца крыніцай заробка для больш чым ста мільёнаў фермераў. У будучым, па словах Дэвіса, вузкаліставая кава можа дапамагчы стварыць новае пакаленне ўстойлівых да спякоты кававых раслін з цудоўным водарам.
Але і сама вузкаліставая кава зараз знаходзіцца пад пагрозай. Яна расце ў трох краінах — Сьера-Леонэ, Гвінеі і Кот-д'Івуары, дзе існуе вялікая праблема знікнення лясоў. Таму і вузкаліставай каве як расліне зараз пагражае выміранне.
Цяпер чытаюць
Пальчыс заявіў, што гэта ён каардынаваў пратэсты 2020 года з Мінска і пісаў планы першых маршаў46
Пальчыс заявіў, што гэта ён каардынаваў пратэсты 2020 года з Мінска і пісаў планы першых маршаў
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх2121
Каментары