Navukoŭcy nanava adkryli vid kavy, jaki dziesiacihodździami nichto nie bačyŭ u pryrodzie. Pa ich słovach, hetaja raślina moža dapamahčy zabiaśpiečyć budučyniu kavy, jakaja zaraz znachodzicca pad pahrozaj praź źmienu klimatu.
Daśledčyki, praca jakich była apublikavanaja ŭ časopisie Nature Plants, śćviardžajuć, što vuzkalistavaja kava — tak hučyć nazva raśliny — lepiej vytrymlivaje vysokuju tempieraturu, čym inšyja vidy kavy. U pryvatnaści, razmova idzie pra aravijskuju kavu (arabiku) i kavu rabusta, jakija składajuć adpaviedna 56 i 43 pracenty suśvietnaj vytvorčaści kavy. U dadatak, vuzkalistavaja kava, pa słovach ekśpiertaŭ, maje cudoŭny vodar, padobny da arabiki, piša Reuters.
Šmat fiermieraŭ z krain, dzie raście kava, užo adčuvajuć drennyja nastupstvy źmieny klimatu. Naprykład, ad paciapleńnia pakutuje arabika, i daśledčyki ličać, što suśvietnaja vytvorčaść hetaha vida kavy moža pamienšać da siaredziny stahodździa jak minimum u dva razy. Dla industryi, košt jakoj aceńvajecca ŭ šmat miljardaŭ dalaraŭ, heta surjoznaja pahroza.
Brytanski batanik Aaran Devis, kiraŭnik daśledavańnia, pra jakoje idzie havorka, ličyć, što vuzkalistavaja kava moža ŭ takim vypadku zabiaśpiečyć narmalnaje funkcyjanavańnie industryi vytvorčaści kavy. Heta važna, bo industryja padtrymlivaje ekanomiku niekalkich trapičnych krain i źjaŭlajecca krynicaj zarobka dla bolš čym sta miljonaŭ fiermieraŭ. U budučym, pa słovach Devisa, vuzkalistavaja kava moža dapamahčy stvaryć novaje pakaleńnie ŭstojlivych da śpiakoty kavavych raślin z cudoŭnym vodaram.
Ale i sama vuzkalistavaja kava zaraz znachodzicca pad pahrozaj. Jana raście ŭ troch krainach — Śjera-Leone, Hviniei i Kot-dJIvuary, dzie isnuje vialikaja prablema źniknieńnia lasoŭ. Tamu i vuzkalistavaj kavie jak raślinie zaraz pahražaje vymirańnie.
Kamientary