Беларускі пракурор: Расіяне, якія забівалі людзей у Бучы і Ірпені, павінны быць арыштаваныя ў Беларусі
Адзін з дзейных пракурораў, які застаецца на службе (мы не называем яго імя), пракаментаваў для «Нашай Нівы» дзеянні расійскіх войскаў у Кіеўскай вобласці з пазіцыі беларускага заканадаўства. Ён сцвярджае, што Крымінальны кодэкс прадпісвае арышт падазраваных на тэрыторыі Беларусі.
«Згодна з часткай 3 артыкула 6 Крымінальнага кодэкса (дзеянні КК да асоб, якія ўчынілі злачынствы на тэрыторыі іншых дзяржаў), адносна шэрагу злачынстваў ён павінен ужывацца незалежна ад крымінальнага права месца здзяйснення злачынства, — кажа наш суразмоўца. —
Збольшага такая норма тычыцца так званых ваенных злачынстваў: генацыд, злачынствы супраць чалавечнасці, парушэнне законаў вядзення вайны і гэтак далей.
Тыя страшэнныя кадры і словы сведак, якія масава паліліся ў сеціва ўвечары 2 красавіка, можна кваліфікаваць з дапамогай некалькіх артыкулаў КК. Самы відавочны — артыкул 128, злачынствы супраць бяспекі чалавецтва.
Да такіх злачынстваў адносяць: незаконнае ўтрыманне ў няволі, выкраданне людзей з іх знікненнем, катаванні і жорсткасць, здзейсненыя ў сувязі з нацыянальнай, этнічнай прыналежнасцю, палітычнымі поглядамі і інш.
Відавочна, што тое, што здарылася ў Ірпені, Гастомелі, Бучы, наўпрост падпадае пад названы артыкул. Ды і адразу пад некалькі іншых.
Такім чынам, людзі, якія ўчынілі такія злачынствы і не асуджаныя за іх у іншых дзяржавах, павінны быць прыцягнутыя да крымінальнай адказнасці ў нашай краіне.
Вядома таксама, што ваенныя часці, якія стаялі ў Кіеўскай вобласці, маглі выходзіць праз тэрыторыю Беларусі ці нават цяпер знаходзяцца тут.
Стартам для расследавання можа служыць заява ўкраінскіх уладаў аб ідэнтыфікацыі нумароў і назваў частак, якія стаялі ў Ірпені і Бучы, — відавочна, што беларускія ваенныя і ўлады добра ведаюць, хто з расіян цяпер стаіць на нашай зямлі.
Беларускі СК, пракуратура і іншыя органы, згодна з патрабаваннямі Крымінальна-працэсуальнага кодэкса, павінны тут жа завесці крымінальную справу і прыняць меры.
Гэта ж не які-небудзь крадзеж пеўня ці ровара ў вёсцы, а міжнародныя злачынствы, якія нясуць небяспеку ўсяму чалавецтву. Ад такіх злачынстваў больш за ўсе пакутавалі менавіта беларусы ў часы Вялікай Айчыннай вайны, што, дарэчы, і абумовіла з'яўленне гэтых артыкулаў у нашым Крымінальным кодэксе.
Я лічу, што справа гонару для айчынных сілавікоў — пачаць праверку, апрасіць ваеннаслужачых тых частак, якія выйшлі з тэрыторыі Украіны, завесці крымінальныя справы і прыцягнуць да адказнасці вінаватых.
Дарэчы, папулярнае ў сеціве відэа з Мазырскага офіса СДЭК, на якім расійскія ваенныя адпраўляюць некуды велізарную колькасць маёмасці, у суме з заявамі сродкаў масавай інфармацыі таксама можа служыць падставай для пачатку крымінальнай справы з адсылкай да часткі 3 артыкула 6 КК:
адвольнае і маштабнае прысваенне маёмасці, не выкліканае ваеннай неабходнасцю, таксама з’яўляецца ваенным злачынствам.
Вінаватыя павінны быць прыцягнутыя да адказнасці нашымі гераічнымі сілавікамі, якія абсалютна нецярпімым да ваенных злачынстваў і масштабна расследуюць цяпер аналагічныя падзеі Другой сусветнай вайны ў частцы злачынстваў супраць беларусаў, — іранізуе пракурор. —
І гэта справа не толькі жадання ці нежадання, а яшчэ і абавязак органаў крымінальнага пераследу. Нагод і падстаў згодна з Крымінальна-працэсуальным кодэксам хапае. Ігнараванне такіх злачынстваў — само па сабе злачынства».
Целы са знакамі катаванняў, трупы на вуліцах, брацкія магілы. Расійскія войскі пакінулі на Кіеўшчыне страшныя сляды
Што за чамадан носіць каля Лукашэнкі ягоны ахоўнік? Не, там не ядзерная кнопка20
Каментары