ISW: Украінцы выціскаюць былыя найлепшыя расійскія часткі на ўсходзе і на поўдні
Амерыканскі інстытут вывучэння вайны (ISW) у штодзённай зводцы пацвярджае, што ўкраінская армія пашырае зону кантролю і на паўночным усходзе, на кірунках да Крамянной і Сватава, і ў Херсонскай вобласці. Пры гэтым амерыканскія аналітыкі асабліва адзначаюць, што ў гэтых рэгіёнах украінцам супрацьстаяць часткі, якія раней лічыліся аднымі з найлепшых у расійскай арміі.
«Расійскія групоўкі ў Херсонскай вобласці і на Ліманскім фронце ў вялікай меры складаліся з частак, якія да вайны лічыліся аднымі з найлепшых канвенцыянальных баявых частак Расіі», — пішуць амерыканскія аналітыкі. Гаворка ідзе пра 144-ю гвардзейскую мотастралковую дывізію ў выпадку з Ліманам і 76-ю гвардзейскую паветрана-дэсантную дывізію ў выпадку з Херсонскай вобласцю.
ISW, абапіраючыся на паведамленні расійскага генштаба, расійскіх вайскоўцаў блогераў, звесткі з украінскіх крыніц, вынікі геалакацыі здымкаў і відэа, піша, што ўкраінцы пашыраюць зоны кантролю на ўсход ад Купянска, Баравой, Лімана, набліжаючыся да гарадоў Крамянная і Сватава і дарогі, што іх злучае.
Аналітыкі пацвярджаюць ISW і інфармацыю аб прарыве ўкраінцаў на поўначы Херсонскай вобласці.
«Поспехі ўкраінцаў у Херсонскай вобласці б'юць па і без таго ўжо нестабільнай расійскай інфармацыйнай прасторы. Чыноўнікі расійскіх акупацыйных адміністрацый усё больш абвінавачваюць выведку NATO ў тым, што яна выкрывае слабасці расійскай абароны ў Херсонскай вобласці, і заклікаюць расійскія сілы рыхтавацца да вулічных баёў і будаваць новыя лініі абароны», — піша ISW, спасылаючыся пры гэтым на тэлеграм-канал чыноўніка «ДНР» Данііла Бяссонава.
У зводцы ўкраінскага генштаба на раніцу 223 дня вайны, звяртае ўвагу BBC, не згадваюцца населеныя пункты, паведамленнямі аб прасоўванні ў раёне якіх у апошнія суткі была поўная благасфера: напрыклад, вёска Дудчаны на беразе Дняпра ў Херсонскай вобласці або вёска Шыйкоўкі на шляху да горада Сватава.
-
Юнак з Бураціі тры гады марыў ваяваць ва Украіне. Падпісаў кантракт на наступны дзень пасля 18‑годдзя — і праз два месяцы загінуў
-
Дональд Туск дапускае прамыя расійскія ўдары па тэрыторыі Польшчы ў найбліжэйшы час
-
У час удару па ўкраінскім памежным пераходзе там былі еўрапейскія дарадцы па бяспецы і Борыс Джонсан
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2525
Каментары