Казлы, рэп і наркаман: як зоркі беларускага футбола гуляюць у аматарскай камандзе ў Расіі
З вясны гэтага года ў Расіі набірае папулярнасць новая з’ява — медыяфутбол. Аматарскія каманды з вядомымі асобамі, шырока прадстаўленыя ў медыя, прыцягваюць тысячы фанатаў і маюць салідныя бюджэты. Міма гэтай залатой жылы не прайшлі і беларускія футбольныя зоркі, якіх вы дакладна ведаеце.
Упершыню пра медыйны (ці блогерскі) футбол у Расіі загаварылі ў канцы 2010-х гадоў. Першай вядомай ластаўкай стаў клуб «Эгрысі», заснаваны каментатарам Васілём Уткіным. Паралельна з гульнёй у адной з маскоўскіх аматарскіх ліг «Эгрысі» займеў і ўласнае рэаліці-шоу на Youtube пра жыццё каманды — на сёння выпушчана ўжо пяць сезонаў.
Былі ў расійскім футболе і іншыя вядомыя медыйныя каманды. Той жа «Амкал» (2,8 мільёна падпісчыкаў на Youtube), напрыклад, прыязджаў у Беларусь, дзе згуляў з камандай фанатаў мінскага «Дынама» — той матч сабраў поўны стадыён на сталічнай вуліцы Маякоўскага.
Ці ўзяць 2DROTS (3,3 мільёна падпісчыкаў на Youtube), чый канал, акрамя матчаў, збольшага прысвечаны розным футбольным чэленджам (заданням) з дзіўнымі пакараннямі накшталт «зрабіць дурацкую стрыжку».
Вясной 2022 года блогерскі футбол нарэшце атрымаў уласны чэмпіянат. Першы сезон аматарскай Медыялігі прайшоў з красавіка па ліпень, сабраў дзесяць каманд і 11 тысяч гледачоў на фінальнай гульні. У другім сезоне, што доўжыцца цяпер, камандаў ужо 18, а фінал плануюць правесці на 62-тысячнай «Газпрам Арэне» ў Санкт-Пецярбургу.
У камандаў Медыялігі не толькі салідныя аўдыторыі на Youtube, але і даходы, якім пазайздросцяць некаторыя прафесійныя клубы. Напрыклад, дзейны чэмпіён лігі 2DROTS па кантракце з букмекерам «Фонбет» атрымлівае 10 мільёнаў расійскіх рублёў у месяц, наступным ідзе «Амкал» — 9 мільёнаў у месяц ад кампаніі Pari. Не аднымі аматарамі: у заяўках клубаў Медыялігі шмат зорных расійскіх футбалістаў, што раней гулялі ў моцных прафесійных камандах і нават у расійскай зборнай. Напрыклад, гэта такія вядомыя ў мінулым гульцы, як Ягор Тытоў, Дыніяр Білялетдзінаў, Дзмітрый Сычоў, Раман Паўлючэнка.
А з нядаўняга часу ў Медыялізе ўсё больш беларусаў. Збольшага іх прыцягвае адна з самых экстравагантных камандаў турніру — клуб GOATS, што перакладаецца з англійскай як «казлы», і менавіта так каманду называюць у лізе. У самой камандзе спасылаюцца на тое, што слова GOAT для іх абазначае greatest of all times (найвялікшы ўсіх часоў), але ад асацыяцыі з рагатымі жывёламі не адмаўляюцца: аднойчы GOATS нават выйшлі на перадматчавае пастраенне з жывым казлом.
З «Арсенала» ў расійскую аматарскую лігу
Некалькі тураў таму клуб заявіў на гульню адразу трох былых гульцоў беларускай нацзборнай: Ігара Шытава, Віталя Булыгу і Вячаслава Глеба (брата Аляксандра Глеба, былой зоркі лонданскага «Арсенала» і пераможцы Лігі чэмпіёнаў у складзе «Барселоны»). Цалкам магчыма, што да «казлоў» далучыцца і сам Аляксандр: Глеб-малодшы апісаў імавернасць удзелу брата ў ліге словам «абмяркоўваем».
Акрамя Шытава, Булыгі і Глеба, у Медыялізе засвяціўся Ігар Стасевіч, некалі капітан беларускай футбольнай зборнай. Стасевіч не мае клуба з 16 чэрвеня, калі ён пакінуў «Чайку» з трэцяга дывізіёну расійскага футбола.
Раней паўабаронца трапіў у «чорны» спіс Мінспорту, і цяпер яму адмаўляюць у працы ў беларускіх клубах праз «праявы пратэсных настрояў». Напрыклад, у жніўні 2020 года разам з калегамі па БАТЭ гулец падтрымаў аднаклубніка Антона Сароку, які трапіў на суткі, а праз некалькі месяцаў выставіў на дабрачынны аўкцыён футболку беларускай зборнай з уласным аўтографам, грошы за якую пазней пайшлі ў Беларускі фонд спартыўнай салідарнасці. Гэтай восенню Ігар пачаў выступаць у мінскай аматарскай лізе за каманду «Захад-3», а зараз згуляў за GOATS у матчы з аднымі з лідараў турніра — 2DROTS.
Калі Глеб сапраўды далучыцца да «казлоў», ён атрымае ледзьве не самых экстравагантных аднаклубнікаў у жыцці. У форме каманды, напрыклад, ужо выходзіў на поле рэпер і блогер Эльдар Джарахаў — хлопец з ростам 156 сантыметраў заняў месца брамніка. На той жа гульні чакалі і рэпера Пашу Тэхніка, які нядаўна трапіў у кому, справакаваную ўжываннем наркотыкаў і алкаголю. Але ж Тэхніка да матча не дапусціў арбітр, які палічыў яго стан неадэкватным. І нездарма: адразу пасля стартавага свістка рэпер распрануўся, паралельна раздаючы ўсім інтэрв’ю, а потым вырашыў прадэманстраваць на камеру геніталіі. Пасля матча абвясцілі, што Тэхнік выключаны з каманды за «неспартыўныя паводзіны».
Ці дае турнірныя вынікі такі медыйна-скандальны падыход? Пасля пяці тураў GOATS з шасцю ачкамі займаюць апошняе (дзявятае) месца ў сваёй групе. Але ў медыйным плане яны на кані: трансляцыя гульні GOATS з Джарахавым у складзе супраць 2DROTS сабрала ў пікавы момант больш за 60 тысяч гледачоў, а гэта адзін з найлепшых вынікаў сезона.
«Наша Нiва» — бастыён беларушчыны
ПАДТРЫМАЦЬСкандальнага гімнаста Івана Куляка не дапусцілі на адкрыты чэмпіянат Беларусі. Ён выходзіў з літарай «Z» на грудзях
«Дапамагаю Украіне як магу. Калі ні ў што не верыць, нашто тады жыць?» — беларускі футбаліст Золатаў
З кім футбольная зборная Беларусі згуляе ў адборы на Еўра-2024
Музыка Цім Суладзэ: Розніца 30 гадоў — тое, што адпавядае маім уяўленням пра адносіны41
Каментары