Апынуліся ў замежжы і адчуваеце, што не спраўляецеся з цяжарам праблем? Сабралі спіс ініцыятыў, дзе беларусы ў такой сітуацыі могуць атрымаць псіхалагічную дапамогу.
Літва
У Віленскім цэнтры псіхічнага здароўя (Vasaros g., 5) працуе клініка Samopomoch. Там бясплатна абслугоўваюць украінцаў і беларусаў, што ўцяклі са сваіх краін ад вайны і рэпрэсій. У «Самапомачы» аказваюць і псіхалагічную, і медыцынскую дапамогу, прымаюць пацыентаў у любым узросце і працуюць на ўкраінскай і рускай мовах.
Працоўны графік: панядзелак-серада — 11:00—19:00, чацвер-пятніца — 8:00—16:00. Тэлефон: +37067202735.
Цэнтр інфармацыі па міграцыі «Я выбіраю Літву» дае да 10-ці бясплатных кансультацый псіхолага, скарыстацца імі могуць і замежныя грамадзяне, якія жывуць у Літве. Каб запісацца на кансультацыю, просяць накіраваць электронны ліст па адрасе [email protected], коратка апісаць у ім вашу праблему і назваць найбольш зручны час для кансультацыі: раніца (8—12 гадзін), дзень (12—16 гадзін) ці вечар (16—19 гадзін). Пасля рэгістрацыі з вамі звяжацца спецыяліст.
Кансультацыі праходзяць альбо вочна па адрасе A. Jaksto g., 12, або дыстанцыйна праз платформу Microsoft Teams. Мова кансультацый — літоўская, англійская ці руская. Дакладней можна прачытаць на сайце Цэнтра інфармацыі па міграцыі.
Ёсць у Літве і свае тэлефоны даверу. Можна звяртацца на любы з іх, бо ў краіне большая частка насельніцтва разумее рускую мову і, верагодна, падтрымае з вамі гутарку. Але ж ёсць адзін нумар, па якім дакладна абяцаюць адказваць па-руску:
- лінія даверу — 880077277 (працуе з 16 да 19 гадзін).
Польшча
Заходняя суседка Беларусі, на жаль, не дае так шмат магчымасцяў бясплатнай псіхалагічнай дапамогі, як Літва. Тым не менш, і тут ёсць да каго звярнуцца. У Польшчы працуе шмат тэлефонаў даверу, і на некаторых з іх абяцаюць падтрымаць гутарку па-руску:
- 669981038 — бясплатны экстранны тэлефон Польскага міграцыйнага форума, працуе на ўкраінскай і рускай мовах (пн 16—20, ср 10—14, пт 14—18);
- 225662227 — бясплатны тэлефон службы падтрымкі медыцынскага цэнтра Damian на польскай і рускай мовах (аўт 8—13, ср 17—20, пт 8—13).
Што да звычайных сесій з псіхолагам, паспрабуйце звярнуцца ў асацыяцыю Unicorn. Там гатовыя бясплатна папрацаваць не толькі з украінцамі, іх сваякамі, але і з усімі, каму патрэбная псіхалагічная дапамога і падтрымка ў крызіснай сітуацыі, звязанай з вайной. Кансультацыю можна атрымаць і анлайн, і афлайн у Кракаве. Падрабязнасці чытайце тут.
Латвія
У гэтай краіне таксама можна скарыстацца тэлефонамі даверу. Разлічаныя яны, перш за ўсё, на латвійскую мову, але і размову па-руску, хутчэй за ўсё, там падтрымаюць:
- +37167222922 і +37127722292 — тэлефоны крызіснай лініі цэнтра «Скалбес»;
- +37128495847 — тэлефон даверу каталіцкай царквы, на якім, як сцвярджаюць, працуюць духоўныя сёстры. Яны гатовыя пагутарыць з 9 гадзін раніцы да 9 вечара.
- 116123 — а вось па гэтым тэлефоне вам дакладна адкажуць і на рускай, і на англійскай мове. Што асабліва зручна, лінія працуе кругласуткава.
Эстонія
Людзі, што знаходзяцца ў Эстоніі і перажываюць або перажылі крызісную сітуацыю, могуць пазваніць па тэлефоне псіхасацыяльнай крызіснай падтрымкі Дэпартамента сацыяльнага страхавання 116006 (+3726147393). Калі не жадаеце гутарыць, можна скарыстацца крызісным чатам для перапіскі, што знаходзіцца тут. Спецыялісты падтрымаюць гутарку на эстонскай, англійскай і рускай мовах.
Анлайн
Псіхолагі з Беларусі і Украіны ладзяць праект бясплатнай дапамогі We may help. Па запыце кожны, хто мае такую патрэбу, можа атрымаць тры дармовыя сесіі ў псіхолага. Для гэтага трэба толькі звязацца з праектам праз тэлеграм. We may help дапамагае пацярпелым ад вайны ва Украіне і ад рэпрэсій у Беларусі і Расіі, а таксама валанцёрам і родным людзей, што перажылі досвед, звязаны з першымі дзвюма сітуацыямі.
Раскажам і пра новы праект «Алівія», што дапамагае жанчынам, якія церпяць ад хатняга гвалту. Праз сайт праекта можна пазваніць ці напісаць у лінію даверу, дзе дапамогуць карыснай інфармацыяй, акажуць псіхалагічную і прававую дапамогу. Праект працуе для беларусак, якія жывуць у самой краіне, а таксама ў Грузіі, Украіне, Літве і Польшчы. Гарачая лінія інфармацыйнай і псіхалагічнай дапамогі працуе па панядзелках і серадах з 10 да 18 гадзін, лінія інфармацыйнай і прававой дапамогі — па аўторках і чацвяргах з 10 да 18 гадзін. Таксама можна пісаць у праект праз электронную пошту і месенджары, усе кантакты знойдзеце на сайце.
«Наша Нiва» — бастыён беларушчыны
ПАДТРЫМАЦЬ«Наша пакаленне ў любым выпадку застанецца траўмаваным». Псіхолаг пра жыццё падчас рэпрэсій і вайны
«У тых, хто застаўся ў Беларусі, свая ізаляцыя. У тых, хто з'ехаў — свая». Лекар-псіхіятр — пра эміграцыю, інтэграцыю і самаідэнтыфікацыю
«У тых, хто перажыў гора страты Радзімы, няма адчування будучыні». Як гаруюць беларусы
«Яна не ў турме, а на спецдачы КДБ!» Канспіролагі накінуліся на Калеснікаву12
Каментары