Пад Віцебскам падчас паводкі Дзвіна падмыла бераг і разбурыла ўчастак дарогі. Ёсць таксама пагроза абвальвання ў раку дамоў, гаспадарчых пабудоў і іншых збудаванняў, паведаміла МНС.
![](http://nashaniva.com/img/w732d4webp1/photos/z_2023_04/dvina-barvin-20230405-2-gohh4.jpg.webp)
Падмыванне Дзвіной берага з разбурэннем участка грунтавой дарогі паміж ракой і садовымі таварыствамі «Лужасна-1» і «Лужасна-2» каля вёскі Барвін адбылося ўвечары 5 красавіка. Людзі ў выніку надзвычайнай сітуацыі не пацярпелі, аднак узнікла пагроза пабудовам на тэрыторыі гэтых садовых таварыстваў.
![](http://nashaniva.com/img/w732d4webp1/photos/z_2023_04/19-6hrsn.jpeg.webp)
Рашэннем камісіі па надзвычайных сітуацыях пры Віцебскім райвыканкаме сітуацыя класіфікавана як надзвычайная сітуацыя прыроднага характару. Для ўмацавання грунту берагавой лініі і падсыпкі дарогі задзейнічалі 14 адзінак тэхнікі.
![](http://nashaniva.com/img/w732d4webp1/photos/z_2023_04/1-1-dimqt.jpeg.webp)
Акрамя таго, учора ў сувязі з неспрыяльным гідралагічным становішчам, якое склалася ў сувязі з павышэннем узроўню вады на Дзвіне Верхнядзвінскае раённае звяно Віцебскай тэрытарыяльнай падсістэмы грамадзянскай абароны пераведзена ў надзвычайны рэжым функцыянавання.
![](http://nashaniva.com/img/w732d4webp1/photos/z_2023_04/16-v7efj.jpeg.webp)
Пры гэтым у межах Віцебска ўзровень вады ў Дзвіне зніжаецца ўжо другія суткі, праўда, падзенне пакуль нязначнае. На ўчастку ж ракі Полацк — Верхнядзвінск рост узроўню вады працягваецца.
Каментары