«Нашы мовы зліваліся ў адну». У Лодзі беларусы і палякі разам сустрэлі Вялікдзень
Супольная велікодная імша ў касцёле Святога Юзафа праводзілася па-беларуску і па-польску. Двухмоўнае набажэнства ў Лодзі стала ўнікальным рэлігійным дзействам для каталіцкай Польшчы.
«Гэта адзіная святая імша ў польскім касцёле, якая адразу праходзіла і па-польску, і па-беларуску. Гэта найважнейшая святая імша, якая адбываецца на працягу ўсяго літургічнага года ў касцёле», — тлумачыць адметнасць набажэнства айцец Дзмітрый Прыступа.
Святар кажа, што правесці двухмоўную велікодную імшу прапанавалі палякі.
«Каб не маліцца паасобку, а разам сабрацца на службу палякам і беларусам, што веруюць у Хрыста. Беларусы з энтузіязмам, заангажаваннем, падзякай і радасцю падтрымалі такую прапанову», — адзначае ён.
У Лодзі асела багата беларусаў, якія вымушана пакінулі радзіму. Супольнае польска-беларускамоўнае набажэнства сабрала больш за сто вернікаў.
«Было крута. Калі дазналася, што такая малітва будзе праводзіцца, то сумнявалася, як такое можа быць, але выйшла прыгожа і ўзнёсла. Мовы гарманіравалі адна з адной, і здавалася, што зліваліся нават у адну. І словы патрэбныя гаварыліся: пра мір, спакой, радзіму, веру, надзею і любоў», — падзялілася ўражаннямі адна з верніц.
Летась у лістападзе была падтрымана ініцыятыва беларускай каталіцкай суполкі, каб раз на тыдзень у касцёле Святога Юзафа ладзіліся набажэнствы на беларускай мове. Цяпер беларуская парафія пры гэтай святыні гуртуе да трох дзясяткаў вернікаў. На набажэнствы прыходзяць і праваслаўныя беларусы, каб чуць сваю мову.
«Аб’ядноўвае нас вера ў Хрыста. Мы молімся за нашу трываласць і каб не страціць нашай надзеі, умацаваць сэрцы. Мы верым, што Хрыстос уваскрэс і ўскладаем на яго нашыя надзеі», — кажа айцец Дзмітрый.
Праводзіць богаслужэнні для беларусаў 31-гадовы айцец Дзмітрый Прыступа. Ён з Баранавічаў. Да 2020 года святарстваваў на Брэстчыне. Яму давялося пакінуць радзіму пасля інцыдэнту з вайскоўцам, які разганяў пратэст. Супраць святара была распачата крымінальная справа за «наўмысны гвалт над супрацоўнікам унутраных спраў», і ён у вышуку.
У Лодзі, акрамя правядзення беларускамоўных набажэнстваў, беларускі святар заняты справамі парафіі, адпявае памерлых, вянчае ды выкладае рэлігію ў сярэдняй школе.
У адным з інтэрв'ю айцец Дзмітрый Прыступа казаў, што яго парафіяне — неабыякавыя маладыя людзі, якія клапоцяцца пра сваю Бацькаўшчыну, і большасць з іх размаўляе стала па-беларуску.
Велікоднае набажэнства завяршалася выступленнем беларускага гурта Znak stop.
«Наша Нiва» — бастыён беларушчыны
ПАДТРЫМАЦЬГлядзіце таксама:
Мінскія ўлады забаранілі праводзіць велікодныя службы каля закрытага Чырвонага касцёла
У касцёлах на Дзень Канстытуцыі на загад уладаў будуць маліцца за яднанне
Каментары
расейскай.